Rekonfort bann ki dan dey
1 Kan nou perdi en dimoun ki nou kontan dan lanmor, sa i anmenn en gran latristes, spesyalman pour bann ki napa sa lespwar konsernan Rwayonm Bondye. (1 Tesa. 4:13) Bokou dimoun i demann zot lekor: ‘Akoz nou mor? Ki arive avek bann dimoun ki mor? Eski mon pou kapab revwar sa enn ki mon ti kontan ankor?’ Dan bann paragraf swivan i annan detrwa sizesyon konsernan konman nou kapab rekonfort bann dimoun dan predikasyon ki’n perdi en manm fanmir oubyen en zanmi dan lanmor.—Izai 61:2.
2 Port an port: En met lakour i kapab dir nou ki i fek ariv en lanmor dan son fanmir. Nou bezwen esey vwar si i dan latristes oubyen pe plere kan i vin devan laport, ki kapab endike ki sa lanmor in fek arive. Eski kot son lakour i annan bann manm fanmir ki dan latristes? Dan en tel sitiasyon, i pli bon ki nou pa reste tro lontan kot sa lakour pour donn en temwannyaz o profon. (Ekle. 3:1, 7) Petet nou kapab senpatiz avek zot e donn sa met lakour en trak, en magazin, oubyen en brosir apropriye, poliman demann leskiz e ale. Dan en moman pli apropriye nou kapab retournen pour partaz avek li plis mesaz rekonfortan sorti dan Labib.
3 Dan lezot lokazyon, nou kapab esey vwar si nou kapab koz plis avek sa met lakour lo premye vizit. Nou kapab lir avek li sa promes dan Labib konsernan rezireksyon menm si i pa lemoman pour prouve ki serten pwennvi i mal. (Zan 5:28, 29) Oubyen nou kapab montre li ki Labib i dir lo kondisyon bann mor. (Ekle. 9:5, 10) En resi dan Labib konsernan rezireksyon i kapab rekonfort li. (Zan 11:39-44) En lot sizesyon se pour konsider sa bann parol ki Zob, en zonm fidel ki ti annan konfyans dan Bondye ti dir. (Zob 14:14, 15) Avan kit sa lakour, nou kapab ofer brosir, What Happens to Us When We Die?, When Someone You Love Dies, ouswa en lot brosir oubyen trak apropriye. Oubyen nou kapab kit liv Ki Labib i vreman dir?, atir latansyon lo sa lenformasyon dan sapit 6, e fer laranzman pour diskit plis lo sa size ler nou retournen.
4 Dan lezot lokazyon: Si en servis lanterman i ganny fer dan Lasal Rwayonm, eski pou annan bann dimoun ki pa Temwen Zeova? Nou kapab donn zot bann piblikasyon ki pour rekonfort zot. Dan serten pei, dan landrwa kot lekor mor i ganny ekspoze, serten dimoun in apresye kan zot ganny detrwa piblikasyon apropriye pour donn bann manm fanmir ki dan latristes. Parfwa, kan lanons pour lanterman i ganny fer, sa i permet ki en pti let i kapab ganny ekrir pour rekonfort bann manm fanmir ki dan dey. Dan en sitiasyon, apre ki en msye ki son madanm ti’n mor ek son fiy ti’n resevwar en let avek detrwa trak, zot ti al kot lakour sa proklanmater e demande: “Eski zot ki’n anvoy sa let pour mwan? Mon anvi konn plis lo Labib!” Sa zonm ek son fiy ti dakor pour ganny en letid Labib e zot ti konmans asiste renyon.
5 Eklezyast 7:2 i dir: “I pli meyer pour al kot en lakour ki an dey olye al kot en lakour kot i annan lafet.” En dimoun ki an dey i souvandfwa pli pare pour ekout parol Bondye ki bann ki enterese zis avek lanmizman. Fotespere ki nou tou nou rod loportinite pour rekonfort bann ki dan latristes akoz zot in perdi en dimoun ki zot ti kontan dan lanmor.
[Kestyon]
1. Akoz bann dimoun ki’n perdi en dimoun dan lanmor i bezwen ganny rekonforte?
2. Si sa met lakour i dir nou ki i dan latristes, eski nou devret esey donn li en temwannyaz o profon?
3. Si sirkonstans i permet, ki verse Labib nou kapab montre sa met lakour ki dan latristes?
4. Ki bann lezot lokazyon ki nou annan pour donn rekonfor?
5. Akoz ki nou devret rod loportinite pour rekonfort bann dimoun ki dan latristes?