“Pran mon zoug”
1 Dan en lemonn ranpli avek presyon ek traka lavi, nou eksperyans en vre soulazman kan nou aksepte lenvitasyon Zezi ki ranpli avek lafeksyon pour trouv repo anba son zoug. (Mat. 11:29, 30) Kan nou aksepte pour pran son zoug e vin son disip, sa i enkli partisip dan en travay ki pa zis en defi me osi ki redonn lafors. I enplik pres sa bon nouvel Rwayonm e ed lezot pour ganny soulazman ansanm avek nou anba zoug Zezi ki fasil.—Mat. 24:14; 28:19, 20.
2 Soulazman atraver nou minister: Zezi pa ti demann son bann disip pour azout son fardo ansanm avek sa ki zot ti pe deza anmennen. I ti envit zot pour fer en lesanz, par pran son fardo ki leze dan plas sa ki pour zot ki lour. Nou nepli anba presyon akoz traka lavi e dan dezespwar akoz sa lemonn; nou pa rente pour ganny larises enserten. (Lik 21:34; 1 Tim. 6:17) Menm si nou annan en progranm byen sarze e nou bezwen travay pour ganny bann keksoz ki nou bezwen dan lavi toulezour, nou devret met ladorasyon Bondye premye plas dan nou lavi. (Mat. 6:33) Si nou gard en bon pwennvi konsernan kwa ki pli enportan nou pa pou vwar nou minister konman en fardo o kontrer nou pou toultan vwar li konman en soulazman.—Fili. 1:10.
3 Normalman, nou kontan pour koz lo tou sa ki nou apresye e ki ofon nou leker. (Lik 6:45) Tou Kretyen i apresye e kontan Zeova ek benediksyon son Rwayonm ki in promet. Pa i en gran soulazman alor, pour koz lo “bon nouvel konsernan bann keksoz meyer” e met dekote nou bann traka toulezour pandan ki nou partisip dan predikasyon! (Rom. 10:15) Byensir, ler nou fer en keksoz pli souvan nou kapab fer sa keksoz pli byen e eksperyans plis lazwa. Alors, kan nou pas plis letan dan predikasyon, depan lo nou sitiasyon, nou pou ganny plis soulazman. Pa i en lankourazman kan en dimoun i byen reakte anver nou mesaz! (Akt 15:3) Menm kan nou zwenn bann dimoun ki pa enterese oubyen ki opoz nou, nou minister pou soulaz nou dan en sans spirityel si nou gard antet ki nou zefor i fer Zeova plezir e ki nenport bon rezilta ki nou pou gannyen i gras a son benediksyon.—Akt 5:41; 1 Kor. 3:9.
4 Par aksepte lenvitasyon Zezi, nou rezwir sa privilez pour servi akote li konman Temwen Zeova. (Iza. 43:10; Rev. 1:5) Nanryen pa pou kapab anmenn plis soulazman ki sa!