‘Zot devret touzour pare pour fer tou bon travay’
1 Kan Zezi ti konmans en nouvo kanpanny predikasyon i ti pran letan pour prepar son bann disip. (Mat. 10:5-14) Menm si nou tou nou byen okipe, kan nou pran detrwa minit pour prepare avan ki nou partisip dan predikasyon portanport sa pou ed nou pour ganny bann bon rezilta.—2 Kor. 9:6.
2 Ki mannyer pour prepare: En bon preparasyon i premyerman enplik konn sa lenformasyon dan sa piblikasyon ki nou anvizaze ofer. Nou devret osi mazin bann dimoun dan nou teritwar. Ki bann topik ki enteres zot? Ki krwayans relizye ki nou souvandfwa bat avek dan teritwar? Pour ganny bann lide nou kapab konsilte sipleman prezantasyon dan Nou Minister Rwayonm ek liv Reasoning From the Scriptures.
3 Kan nou ekout atantivman bann demonstrasyon ki ganny fer dan Renyon Servis, sa pou osi ed nou. Anmezir ki nou servi nou prezantasyon nou pou ganny leksperyans e nou pou bezwen mwens letan pour prepare. Me si sak fwa avan ki nou al dan predikasyon, nou mazin en pe lo sa ki nou pou dir e kontinyen amelyor nou prezantasyon, nou pou vin pli efikas. Nou devret osi pran en moman pour vwar si nou annan tou sa ki nou pou bezwen dan nou sak predikasyon.
4 Kwa ki pou ed nou rapel nou prezantasyon? En fason pour gard sa ki nou anvi dir antet se par egzers aotvwa. Serten proklanmater i kontan fer bann sesyon legzersis pandan zot letid fanmir. Lezot i vwar ki kan zot ekrir zot prezantasyon an bref lo en bout papye e zet en koudey lo la zis avan ariv kot laport en dimoun i ed zot.
5 Akoz i anmenn byenfe: Kan nou byen prepare i fer nou vin pli efikas e trouv lazwa dan nou minister. I ed nou pour santi pli alez e kalm kot laport en dimoun. I permet nou donn en pli gran latansyon sa met lakour olye preokip nou avek sa ki nou pe al dir. Anplis, kan nou familye avek sa piblikasyon sa pou ed nou pour annan plis lantouzyasm kan nou pe ofer li.
6 Lekritir i ankouraz nou pour ‘touzour pare pour fer tou bon travay.’ (Tit 3:1) Ki pli bon travay ki nou annan ki pres sa bon nouvel? Par fer en bon preparasyon, nou demontre respe pour sa met lakour ki pare pour ekoute e pour Zeova, sa Bondye ki nou pe reprezante.—Iza. 43:10.