Nouvo progranm lasanble spesyal

Tenm progranm lasanble spesyal pour lannen servis 2009 i “Kontinyen vey ou minister . . . , pour ki ou akonplir li,” baze lo Kolosyen 4: 17, NW. Konman Kretyen, nou pran sa konsey o serye. Nou lobzektif se pour fidelman ranpli nou devwar dan nou minister parey Zezi ti fer. (Zan 17:4) Zapot Pol osi in kit en bon legzanp pour nou dan sa domenn. I ti determinen pour fini sa travay ki i ti’n ganny konfye dan son minister.—Akt 20:24.

Parti sa diskour ki pou ganny devlope par sirveyan rezyonal pou montre konman plizyer proklanmater pe sirmont bann defi ki zot fer fas avek dan zot minister. Sa diskour “Kiltiv sa ki ou’n plante” pou met lanfaz lo konman nou kapab ed bann ki annan “sa bon kondisyon leker pour ganny lavi eternel.” (Akt 13:48, NW) Sa orater viziter pou premyerman diskit 2 Korentyen 6:1-10, verse par verse, dan sa diskour “Konman nou kapab fer tou nou posib konman bann serviter Bondye.” Dan apre midi, i pou adres lodyans lo sa tenm “Annan en gran lapresyasyon pour ou minister.” San dout ou pou ganny lankourazman dan sa de diskour “Bann zenn ek bann aze kontan zot minister” e “Bann zenn ki pe akonplir zot minister.” Bann ki swete senboliz zot dedikasyon par batenm delo dan enn sa bann lasanble ki pe vini i bezwen enform sirveyan prezidan oplivit posib. En laspe enportan dan tou nou bann lasanble se kan nou egzamin Latour Veyer. Anmenn ou kopi ki pou ganny etidye pandan semenn lasanble spesyal.

Kan nou veye ki nou akonplir nou minister nou devret fer bokou zefor pour fer sir ki nou pa les lezot keksoz oubyen aktivite pas pour pli enportan ki sa ki Zeova in konfye nou. Sa lankourazman baze lo Labib ki nou pou gannyen atraver nou lasanble spesyal i devret ed nou tou pour konpran sa ki nou bezwen fer pour gard nou regar fikse lo sa ki pli enportan e pour reflesir lo sa ki nou pe fer dan nou minister afen ki nou kapab akonplir li pli plennman.