Nou annan bann trezor presye
pour partaze
1 Parol Bondye i ranpli avek en kantite trezor spirityel ki nou apresye. (Ps. 12:6; 119:11, 14) En zour, Zezi ti servi bann legzanp pour montre diferan laspe sa Rwayonm epi i ti demann son bann disip: “Eski zot in konpran tousala?” Apre ki zot ti’n dir ki zot ti’n konpran, i ti dir zot: “Pour sa rezon tou profeser Lalwa ki vin en disip Rwayonm lesyel i parey en propriyeter ki tir sa ki nef ek sa ki vye dan son trezor.”—Mat. 13:1-52.
2 Laverite dan Labib ki nou ti aprann ler nou ti fek konmans etidye, i kapab aprezan ganny vwar konman bann vye trezor. Me anmezir ki nou ogmant nou konnesans atraver nou letid endividyel lo bann keksoz profon dan Parol Bondye, nou kapab trouv lezot laverite dan Labib ki pour nou i bann nouvo trezor. (1 Kor. 2:7) An plis ki sa, nou arive konpran sa bann nouvo trezor atraver “lesklav fidel e pridan.”—Mat. 24:45, NW.
3 Nou vreman apresye sa bann trezor spirityel, ki swa vye oubyen nouvo. Sa i pous nou pour fer zefor pour ganny sa formasyon ek leksperyans konman bann ansennyan Parol Bondye e partaz avek zenerozite sa laverite presye ki nou’n aprann avek lezot.
4 Aprann atraver legzanp Zezi: Pour montre konman i ti santi an rapor avek sa bann trezor, Zezi ti fer tou sa ki i ti kapab pour partaz sa bann trezor avek lezot. Menm kan i ti fatige, i pa ti aret tir trezor dan son “stor.”—Zan 4:6-14.
5 Lanmour ki Zezi ti annan pour bann ki ti napa en bon konprenezon lo Bondye ek son plan, ti pous li pour partaz bann trezor dan Parol Bondye ki donn lavi. (Ps. 72:13) I ti pran pitye pour bann ki ti anvi aprann konn Bondye ek son plan e sa ti pous li pour “ansenny zot bokou keksoz.”—Mark 6:34.
6 Imit Zezi: Kan nou vreman apresye sa trezor ki nou annan parey Zezi, nou pou anvi montre dimoun sa laverite presye direkteman dan Labib. (Prov. 2:1-5) Menm si parfwa nou fatige, nou pou koz lo laverite dan Labib avek lantouzyasm e avek tou nou leker. (Mark 6:34) Nou lapresyasyon profon pour sa trezor pou pous nou pour fer tou sa ki nou kapab dan nou minister e touzour rode konman ki nou kapab fer plis.