Konman zot pou tande?
1.Akoz sa travay predikasyon i kapab pa fasil parfwa, e akoz nou persiste?
1 Vi ki zour Zeova pe aprose a gran pa, nou pa kapab tarde pour ed plizyer lezot dimoun konn laverite lo Bondye e konsernan son plan pour limanite. (Zan 17:3; 2 Pyer 3:9, 10) Me i pa toultan fasil pour fer sa, akoz en kantite dimoun pa ekout nou oubyen zot boufonn nou akoz nou travay predikasyon. (2 Pyer 3:3, 4) Me kantmenm sa, nou annan tou rezon pour krwar ki i ankor annan dimoun dan nou teritwar ki pou aksepte sa bon nouvel o moman ki zot tande. Me konman zot pou tande si personn pa anons zot sa mesaz?—Rom. 10:14, 15.
2.Ki mannyer legzanp zapot Pol i ankouraz nou?
2 Kan nou rankontre lopozisyon: Lefet ki i ankor annan lezot ki pare pour ekout sa mesaz Rwayonm, nou pa devret bes lebra. Filip ti sa premye lavil Lerop kot dimoun ti kapab tann Pol pe pres sa bon nouvel. Kan Pol ek Silas ti ganny akize lo fo lakizasyon, zot ti ganny bate e ganny met dan prizon. (Akt 16:16-24) Me malgre sa douler ki Pol ti eksperyanse, sa pa ti fer li per pour prese. Kan i ti vizit Tesalonik, sa lot lavil ki i ti pase pandan son vwayaz misyonner, i ti “ganny lardyes sorti kot Bondye.” (1 Tesa. 2:2, NW) Pa legzanp Pol i montre nou akoz ki nou bezwen “pa arete.”—Gal. 6:9.
3.Kwa ki kapab fer serten ki avan sa pa ti enterese sanz zot latitid?
3 Bokou dimoun ki avan sa pa ti ekout nou pour plizyer lannen, aprezan zot in sanz zot latitid. Problenm ekonomik, maladi, lanmor dan en fanmir oubyen kan zot tann bann move nouvel ki pe arive dan lemonn, tousala i kapab fer dimoun sanz zot latitid. (1 Kor. 7:31, NW) Serten zanfan ki zot paran ti opoze, aprezan zot in vin adilt e zot pare pour ekoute. Kan nou kontinyen prese nou pe donn sa bann tel dimoun sa loportinite pour kriy “non Senyer” avan ki i tro tar.—Rom. 10:13.
4.Kwa ki motiv nou pour kontinyen dan nou minister “san arete”?
4 “San arete”: Akoz nou kontan Bondye ek nou prosen, nou ganny motive pour kontinyen fer sa travay predikasyon e fer disip “san arete,” zis parey bann zapot dan premye syek ti fer. (Akt 5:42, NW) En kantite dimoun ozordi pe “zemir e plennyen akoz sa bann keksoz repinyan” ki pe arive dan lemonn. (Ezek. 9:4) Kan zot tann sa bon nouvel, pa sa i anmenn lespwar ek soulazman pour zot! Menm kan laplipar dimoun pa oule ekout nou, dapre Labib nou annan lasirans ki Zeova i vreman apresye zefor ki nou fer.—Ebr. 13:15, 16.