En lasanble rezyonal ki pou ed nou protez nou spirityalite
1. Lekel enn parmi bann provizyon ki Zeova in fer pour ed nou akonplir sa travay ki i’n donn nou?
1 Dan en fason zenere, Zeova i fourni sa lenformasyon, formasyon ek lankourazman ki nou bezwen pour akonplir sa travay ki i’n donn nou. (Mat. 24:14; 2 Tim. 4:17) Nou lasanble rezyonal ki ganny fer tou le-z-an i enn parmi sa bann provizyon. En nouvo progranm pour lannen servis 2010 pou devlop sa tenm “Protez ou spirityalite,” baze lo Romen 8:5 ek Zid 17-19. Sa progranm pou ganny donnen dan lemonn antye apartir semenn le 31 Out 2009.
2. (a) Ki mannyer nou pou benefisye avek lasanble rezyonal? (b) Ki mannyer bann lasanble rezyonal dan lepase in ed ou dan ou minister?
2 Ki mannyer i pou benefisye nou: Sa progranm pou averti nou konsernan bann danze parey bann distraksyon ki menase pour pran tou nou letan e retir nou latansyon lo sa ki vreman enportan. Nou pou aprann konman pour evite annan sa latitid pour toler serten keksoz e osi kwa ki fer en dimoun matir spirityelman. Sa diskour an plizyer parti ki pou ganny fer Dimans pou montre ki mannyer bann endividi ek fanmir i kapab pran bann pa pour ranforsi zot spirityalite kan zot rankontre bokou presyon ek tes serye an rapor avek zot lafwa. Sa progranm pou ed nou protez nou leker, gard nou for spirityelman e gard antet bann benediksyon merveye ki pe esper sa bann ki protez zot spirityalite.
3. Kan ki prosen lasanble rezyonal pou ganny fer e ki ou devret determinen pour fer?
3 Desito ou konnen kan e kote prosen lasanble rezyonal pou ganny fer, fer laranzman pour ou prezan e atantif lo tou sesyon tou le de zour. Reste asire ki Zeova i beni lanmen sa enn ki devoue.—Prov. 21:5.
4. Ki nou asire nou pou gannyen dan prosen lasanble rezyonal?
4 Vreman, Zeova i sa Enn ki’n fourni sa bon kado. Sa progranm ki’n ganny prepare par lesklav fidel i sanmenm ki nou pou bezwen pour kontinyen reste bann minis Kretyen. Nou rekonesan anver Zeova pour tou sa bann provizyon ranpli avek lanmour ki ed nou pour “tenir ferm nou lesperans.”—Ebr. 10:23-25; Zak 1:17.