Eski mon pe fer ase?
1. Ki bann konsern ki en Kretyen fidel i annan?
1 Eski ou’n deza demann ou lekor sa kestyon? Petet lavyeyes, problenm lasante oubyen plis responsabilite familyal i fer ou partisip mwens dan predikasyon konpare avek oparavan e sa i fer ou dekouraze. En ser ki annan trwa zanfan ti ekrir ki parfwa i santi li koupab akoz kantite letan ek lenerzi ki i depanse pour pran swen avek son fanmir i limit lakantite ki i kapab fer dan predikasyon. Kwa ki pou ed nou pour vwar keksoz dan en fason balanse?
2. Kwa ki Zeova i ekspekte avek nou?
2 Sa ki Zeova i ekspekte avek nou: San dout, nou tou nou ti a kontan fer plis dan predikasyon. Me souvan i annan en gran diferans ant sa ki nou ti a kontan fer ek sa ki an realite nou kapab fer. Lefet ki nou ti a kontan fer plis i montre ki nou konsernen. I byen pour nou rapel ki Zeova i konn nou limit e ki i pa ekspekte plis ki sa ki nou kapab fer. (Ps. 103:13, 14) Kwa ki i ekspekte avek nou? I anvi ki nou servi li avek tou nou leker e donn li nou meyer.—Kol. 3:23.
3. Ki mannyer nou kapab evalye zefor ki nou fer dan predikasyon?
3 Kwa ki pou ed nou pour konnen kwa ki rezonnab pour nou? Nou kapab demann Zeova pour ed nou pour vwar nou sityasyon parey i vreman ete. (Ps. 26:2) En zanmi ki ou kapab annan konfyans ladan, en Kretyen matir ki konn nou byen e ki pa per pour dir nou si nou bezwen amelyore, i osi kapab ed nou. (Prov. 27:9) Mazinen osi ki i byen ki nou evalye nou sityasyon regilyerman vi ki sirkonstans i sanze.—Efe. 5:10.
4. Ki mannyer nou merit vwar bann rapel ki baze lo Labib konsernan predikasyon?
4 Fason nou merit vwar bann rapel konsernan predikasyon: Pandan en lakours, souvandfwa bann spektater i kriye pour donn bann partisipan lankourazman. Zot bi se pour ed sa bann atlet me pa pour dekouraz zot. Pareyman, bann lankourazman baze lo Labib ek bann rapel ki nou gannyen dan nou bann renyon ek piblikasyon pour pres sa bon nouvel san tarde i pour nou prop benefis. Me i pa pe sey dir nou ki nou zefor i pa ase. (2 Tim. 4:2) Nou kapab asire ki si nou toultan fer nou mye, Zeova pou rapel nou lanmour ek travay.—Ebr. 6:10.