Annou demontre konpasyon
1. Kwa ki dimoun i vreman bezwen ozordi?
1 Zanmen dan listwar in deza annan en sitan gran kantite dimoun ki bezwen led ek rekonfor. Kondisyon sa lemonn pe sitan deteryore ki bokou pa santi zot zwaye, dan depresyon e san okenn lespwar. Plizyer milyon dimoun i bezwen led e nou konman Kretyen nou annan sa loportinite pour demontre lentere senser pour nou prosen. (Mat. 22:39; Gal. 6:10) Ki mannyer nou kapab demontre lentere senser pour lezot?
2. Ki sa pli bon fason pour demontre konpasyon?
2 En travay ki demontre konpasyon: Bondye i sa sel sours vre konsolasyon. (2 Kor. 1:3, 4) Zeova i ankouraz nou pour imit li pour “annan konpasyon” e i’n donn nou sa travay pour vizit nou prosen e partaz sa bon nouvel lo Rwayonm avek zot. (1 Pyer 3:8) Pli bon fason pour rekonfort “bann ki annan leker brize” se partisip plennman dan sa travay, akoz Rwayonm Bondye i sa sel lespwar pour bann imen ki pe soufer. (Iza. 61:1) Akoz i annan konpasyon pour son pep, byento Zeova pou retir tou mesanste e etablir en nouvo lemonn kot pou annan ladrwatir.—2 Pyer 3:13.
3. Ki mannyer nou kapab vwar dimoun parey Zezi ti vwar zot?
3 Vwar Dimoun parey Zezi ti vwar zot: Menm kan i ti pe pres avek bann lafoul dimoun, Zezi ti vwar plis ki zis en ta dimoun. I ti vwar zot konman bann endividi avek en bezwen spirityel. Zot ti parey bann mouton ki ti napa berze pour gid zot. Sa ki i ti vwar ti tous son leker e sa ti pous li pour ansenny zot avek pasyans. (Mark 6:34) Si nou vwar dimoun parey Zezi ti vwar zot, sa pou motiv nou pour demontre vre konpasyon pour zot endividyelman. Sa pou vin evidan dan nou ton lavwa ek lekspresyon lo nou figir. Predikasyon pou vin nou priyorite e nou pou swazir nou parol byen kan nou adres bezwen sak dimoun.—1 Kor. 9:19-23.
4. Akoz nou bezwen demontre konpasyon?
4 I annan en gran lafoul dimoun sorti dan tou nasyon ki pe reakte dan en fason pozitif anver sa mesaz Rwayonm e anver sa lentere senser ki nou pe demontre dan zot. Nou bezwen demontre bokou konpasyon akoz sa i anmenn loner e i fer plezir nou Bondye Zeova ki ranpli avek konpasyon.—Kol. 3:12.