Vwar bon rezilta ou travay dir
1. Kwa ki kapab afeblir nou devouman dan predikasyon?
1 Imen in ganny fer avek sa abilite pour “vwar bon rezilta” pour son travay dir. (Ekle. 2:24) Par kont, nou kapab dekouraze kan nou pa ganny bon rezilta dan predikasyon, e sa i kapab anpes nou trouv lazwa e afeblir nou devouman. Kwa ki kapab ed nou kontinyen annan en leta lespri pozitif?
2. Akoz nou lekspektasyon konsernan predikasyon i devret rezonnab?
2 Annan en lekspektasyon rezonnab: Kantmenm pa bokou dimoun ki ti ekout Zezi, nou kapab dir ki son minister ti en lareisit. (Zan 17:4) Dan son parabol semer lagrenn, Zezi ti predir ki en kantite lagrenn, setadir mesaz Rwayonm, pa ti pou tonm lo sa bon later oubyen leker. (Mat. 13:3-8, 18-22) Kantmenm sa, nou pou ganny bon rezilta kan nou travay avek devouman.
3. Ki mannyer nou kapab “raport bann fri” menm si bokou dimoun pa ekoute?
3 Fason ki nou raport bann fri: Dapre sa legzanp ki Zezi ti servi, bann ki aksepte sa mesaz ti pou “raport bann fri.” (Mat. 13:23) Apre ki en tiz dible i matir, sa ki i prodwir i pa bann pti tiz dible, me en nouvo lagrenn. Alor, sa fri ki bann Kretyen i prodwir i pa neseserman bann nouvo disip, me sa kantite lagrenn ki zot kontinyen senmen, setadir sa kantite fwa ki zot koz lo mesaz Rwayonm. Sa i anmenn “bon rezilta” e nou ganny bokou satisfaksyon, menm si bann dimoun pa ekoute. Ler nou fer sa, nou pe ede sanktifye non Bondye. (Iza. 43:10-12; Mat. 6:9) Nou kontan sa privilez pour travay ansanm avek Bondye. (1 Kor. 3:9) Kan nou loue Zeova “par nou labous,” sa i fer li plezir.—Ebr. 13:15, 16.
4. Ki rezilta nou minister i kapab anmennen san ki nou konnen?
4 An plis ki sa, nou travay dir i kapab anmenn bon rezilta ki nou pa vwar. I posib ki serten ki ti ekout mesaz Zezi ti vin son bann disip apre son lanmor. Pareyman, sa mesaz Rwayonm ki nou senmen pa pou pran rasin deswit dan leker en dimoun, e sa dimoun i kapab vin dan laverite san ki nou konnen. Wi, nou minister i anmenn bokou byenfe. Alor, annou kontinyen “raport bokou fri” e prouve ki nou bann vre disip Zezi!—Zan 15:8.