Pran konman legzanp bann profet: Amos
1. Akoz legzanp Amos i kapab en sours lankourazman pour nou?
1 Eski ou’n deza santi ou pa kalifye pour prese akoz ou sorti dan en fanmir senp? Si wi, ou kapab pran konman legzanp kouraz Amos. I ti en senp berze e kan i ti annan demann i ti fer travay labourer, pourtan Zeova ti donn li kouraz pour proklanm en mesaz enportan. (Amos 1:1; 7:14, 15) Pareyman, ozordi Zeova i servi bann dimoun ki senp e ki annan limilite. (1 Kor. 1:27-29) Ki lezot leson nou kapab aprann avek profet Amos ki pou ed nou dan nou minister?
2. Akoz nou kapab reste ferm kan nou fer fas avek lopozisyon dan nou minister?
2 Reste ferm kan ou fer fas avek lopozisyon: Kan Amazya, en pret ki ti ador pti bef dan sa dis tribi dan nor ti tann sa profesi Amos, i ti dir li: ‘Al kot ou! Les nou trankil! Nou annan nou prop larelizyon!’ (Amos 7:12, 13) Pour fer Lerwa Yarobam fer sa profet aret prese, Amazya ti devir parol Amos. (Amos 7:7-11) Me Amos pa ti per. Ozordi, serten sef relizye i rod sipor politik pour persekit pep Zeova. Par kont, Zeova i asir nou ki napa okenn zarm ki pou ganny servi kont nou ki pou reisi.—Iza. 54:17.
3. Ki sa de laspe nou anonse dan nou mesaz ozordi?
3 Anons zizman Bondye ek bann benediksyon a lavenir: Menm si Amos ti profetiz zizman kont sa dis tribi dan nor, i ti termin sa liv Labib ki port son non avek promes Zeova konsernan restorasyon ek benediksyon. (Amos 9:13-15) Nou osi nou koz lo “zour zizman” Bondye ki pe vini, me sa i zis en parti sa “Bonn nouvel Rwayonm” ki nou merit anonse. (2 Pyer 3:7; Mat. 24:14) Ler Zeova pou detri bann move dimoun zour Armagedon, sa pou ouver semen pour en paradi lo later.—Ps. 37:34.
4. Ki lasirans nou annan ki nou kapab fer lavolonte Zeova?
4 Ler nou pres mesaz Rwayonm dan en lemonn ki ranpli avek bann dimoun ki opoz nou, sa i teste nou determinasyon pour nou viv an armoni avek nou dedikasyon pour fer lavolonte Zeova. (Zan 15:19) Toudmenm, nou asire ki Zeova pou kontinyen donn nou sa kapasite pour fer son lavolonte parey i ti fer pour Amos.—2 Kor. 3:5.