Pa oubliy bann ki dan bann lenstitisyon pour bann aze
1. Akoz nou bezwen al partaz sa bon nouvel avek bann ki reste dan bann lenstitisyon pour bann aze?
1 Bokou dimoun pe fer fas avek lefe lavyeyes. (Ekle. 12:1-7) Serten pe reste dan bann lenstitisyon pour bann aze, alor i pa toultan posib pour zwenn zot ler nou al pres portanport. Sa i osi leka dan serten pei kot bann paran aze i normalman al reste kot zot zanfan oubyen lezot fanmir. Menm si zot pa kapab deplase oubyen rapel bokou keksoz, bann aze ek lezot ki reste dan bann lenstitisyon pour bann aze i ankor kapab aprann, apresye e kontan Zeova. Ki mannyer nou kapab partaz sa bon nouvel konsernan sa zoli lespwar ki nou annan avek zot?—Tit 2:13, NW.
2. Ki mannyer nou kapab ganny kontak bann lenstitisyon pour bann aze pour nou kapab al vizite?
2 Pour konmanse: Normalman nou kapab ganny kontak bann lenstitisyon pour bann aze dan nou rezyon dan liv telefonn. Tyek bann kategori tel parey “Specialised Care Nursing,” “Regional Home and Hospice” ek “Home For The Elderly.” Sirveyan servis i kapab fer laranzman pour swazir bann proklanmater kalifye pour al vizit sak sa bann landrwa. Si nou organiz nou byen e depan lo Zeova, i souvan posib pour konmans en letid Labib an group.—Prov. 21:5; 1 Zan 5:14, 15.
3, 4. (a) Lekel ki nou devret koz avek pour konmans sa letid Labib an group? (b) Ki mannyer nou kapab eksplik bann laranzman pour sa letid?
3 Lafason ki sa letid pou ganny fer i depan lo sa landrwa. Dan bann landrwa ki gran kot i annan bokou rezidan ek travayer, i pli bon koz avek sa dimoun lo resepsyon e demande pour koz avek sa ki ansarz pour organiz bann aktivite. Dan bann pti lenstitisyon pour dimoun aze kot napa bokou rezidan oubyen zis detrwa dimoun ki pe pran swen avek zot, i kapab pli bon si nou pran en randevou pour koz direkteman avek propriyeter sa landrwa.
4 Dan tou le de ka, eksplike ki ou pe volonterman donn ou letan pour ankouraz bann dimoun ki kontan lir e diskit bann resi dan Labib. Demande si i annan en rezidan ki ti a kontan partisip dan en diskisyon lo Labib an group pour apepre 30 minit par semenn. Plizyer piblikasyon i kapab ganny servi, me bokou in kontan servi Mon Liv Zistwar Labib ek The Greatest Man Who Ever Lived akoz i pli efikas. Ou kapab montre sa bann piblikasyon avek sa dimoun ansarz. Ou kapab fer laranzman avek li konsernan zour, ler ek landrwa ki zot pou fer sa letid e i kapab ganny mete lo kalandriye oubyen lo bord sa lenstitisyon. Pa bezwen kanmi pour dir zot ki ou en Temwen Zeova. An menm tan, ed sa direkter pour konpran ki ou pa pe vin fer en servis relizye, me ou pe vin donn ledikasyon lo Labib.
5. Ki sizesyon pratik ki pou fer sa letid gou e itil?
5 Kondwir sa letid: Lafason ki ou pou kondwir sa letid i depan lo sirkonstans ek sa landrwa, alor fodre ki nou adapte e annan bon zizman. Sa kondikter i devret anmenn plizyer kopi sa piblikasyon ki pou ganny egzaminen e a lafen letid i devret anmas tou. I kapab neseser pour anmenn bann piblikasyon avek gro lekritir pour serten dimoun. Paragraf i kapab ganny lir, kestyon i kapab ganny demande e larepons i kapab ganny donnen parey nou fer labitid. Bann ki kapab e ki anvi i kapab lir bann paragraf oubyen verse Labib. Pandan letid, esey ankouraz zot pour partisipe, reste pozitif e amikal. Avek permisyon sa direkter, tanzantan ou kapab montre enn bann video nou lorganizasyon ki batir lafwa dan Labib oubyen ki fer resorti bann pwen enportan dan en serten resi Labib. I kapab posib pour fer en lapriyer senp o konmansman ek finisyon sa letid. Serten proklanmater in menm entrodwir bann kantik.
6. Ki mannyer ou kapab reponn en lobzeksyon?
6 Me, si en rezidan i pa dakor avek en keksoz ki’n ganny lir oubyen dir pandan letid? Demontre bon zizman kan ou pe reponn. (Kol. 4:6) Petet ou kapab partaz en verse Labib ki senp dapre sa ki i’n demande. Si i pa posib pour fer li, alor i pour pli bon pou remersye li pour son komanter e apre ofer pour diskit lo sa size avek li tousel apre letid.
7. Ki ou kapab fer si en rezidan i annan en kestyon personnel oubyen demontre en gran lentere?
7 I kapab arive ki en rezidan i demann en kestyon oubyen i oule aprann plis. En ser i servi sa lapros: “Sa i en bon kestyon. Me vi ki sa i ou kestyon personnel, alor annou esper letid fini. Apre nou a kapab diskit lo la ansanm.” I souvan posib pour fer laranzman pour kondwir en letid Labib avek enn ki enterese en lot zour dan en landrwa apropriye.
8. Ki mannyer bann letid an group e endividyel ki regilye i devret ganny konte?
8 I pli bon ki sa menm Temwen i kondwir sa letid an group toultan. Nenport proklanmater ki partisipe i kapab kont zot letan. Ler sa letid in vin regilye, sa proklanmater ki pe diriz sa letid i kapab kont en retourn vizit sak fwa ki sa letid an group i ganny fer e en letid Labib sak mwan. Bann letid Labib avek en rezidan tousel ki kapab konpran e aprann i kapab ganny konte parey labitid.
9, 10. Ki kalite bann ki pe fer sa travay i devret annan? Eksplike.
9 Kontinyen: I byen pour progranm en zour ek ler pour fer sa letid an group. Bann rezidan ek travayer pou ekspekte ki i ganny fer regilyerman e konmans e fini a ler. (Mat. 5:37) Alor, sa pou demann bann sakrifis, devouman ek lord. Leksperyans i montre ki i pli bon si de proklanmater kalifye i travay ansanm pour kondwir sa letid an group. (Ekle. 4:9, 10) Dan bann pli gran landrwa, petet i pou bezwen annan plis proklanmater.
10 I osi enportan pour amikal e demontre en lentere personnel dan bann dimoun. (Fili. 2:4) Zour sa premye vizit, pran letan pour koz avek sak rezidan ki vin asiste. Ekri e esey rapel zot non avan sa lot letid. Par kont, serten dimoun pa kontan si en dimoun ki zot pa konnen i adres zot par zot non. Pasyans ek konpasyon pou fer tou dimoun santi zot alez e apresye.
11. Ki mannyer bann ki kondwir sa letid Labib an group i kapab demontre respe pour bann travayer, manm fanmir ek rezidan?
11 I osi enportan pour demontre respe ek labonte anver bann travayer ek fanmir bann rezidan. Ler laranzman letid in fini ganny fer, i pa en bon lide pour sanz ler oubyen lafason ki i pou ganny fer san koz avek sa dimoun ki ansarz. Tanzantan, demann li ki bann rezidan i dir lo lafason ki letid pe ale. Kan bann manm fanmir i vizit bann rezidan pandan letan letid, pran linisyativ pour koz avek zot. Eksplik zot ki bi sa letid Labib. Montre zot ki ou annan en lentere senser pour zot fanmir. Envit zot pour asize pour ekout sa letid.
12, 13. Rakont leksperyans ki montre byenfe ki i annan pour rann temwannyaz dan lenstitisyon bann dimoun aze.
12 Rezilta: Bann sirveyan rezyonal ek kongregasyon in raport bann zoli rezilta atraver sa kalite servis. Dan en landrwa, i ti annan apepre 20 rezidan ki ti asiste sa premye diskisyon. An rezilta, sis rezidan ti konmans en letid Labib endividyel. Enn parmi ti menm batize. En letid dan en lot lenstitisyon ti pous en madanm 85 an pour asosye avek en kongregasyon e eksprim son dezir pour ganny batize. Kan en lenstitisyon ti deside pour diminyen lakantite aktivite ki zot organize e fer arete sa letid an group ki Temwen Zeova ti pe kondwir, bann rezidan ti fer konplent avek sa direkter. Anfet, finalman sa letid ti rekonmanse e ant 25 a 30 dimoun ti asiste.
13 Sa lanmour ki nou demontre anver bann dimoun ki dan sa bann lenstitisyon napa en gran lefe zis lo bann rezidan. Par egzanp, i arive ki en travayer i asize e menm partisip dan letid. Sa zefor ki nou fer pour demontre lentere dan bann ki pe reste dan bann lenstitisyon pour bann aze i donn en bon temwannyaz osi. (1 Pyer 2:12) Apre ki i ti’n konpran bi sa letid, en administrater ti dir: “Akoz zot in tarde pour ofer sa letid? Kan ki zot kapab konmanse?” En lot direkter ti ekrir: “Mon ti pou vreman kontan pour rekomann sa letid an group avek nenport ki lenstitisyon pour bann aze dan sa rezyon. Temwen Zeova i rann sa servis kominoter gratwitman.” Enn sa lenstitisyon Awai ti donn Temwen Zeova en pri pour sa servis volonter ki zot ti dir i en “trezor presye” pour bann ki dan sa lenstitisyon.
14. Akoz nou devret anvi ed bann ki dan lenstitisyon pour bann aze?
14 Zeova i envit bann aze pour loue li. (Ps. 148:12, 13) Sa lenvitasyon i enkli bann ki dan bann lenstitisyon pour bann aze. Eski i annan bann lenstitisyon pour bann aze dan ou teritwar kot bann aze pou benefisye avek sa bon nouvel? Avek led bann ansyen dan sa rezyon ek direkter sa bann lenstitisyon, nou pou kapab donn en bon temwannyaz avek bann ki dan sa lenstitisyon. Kan nou pran swen avek bann aze, nou pe imit Zeova.—Ps. 71:9, 18.
[Bwat lo paz 4]
Diskisyon an group kot en lenstitisyon pour bann aze
• Fer sa dimoun lo resepsyon ek sa enn ki ansarz bann aktivite konnen kan ou’n arive pour sa progranm letid.
• Anmenn ase kopi sa piblikasyon ki pou ganny etidye avek sa group. Met sa bann piblikasyon dan en sak apropriye e apre letid anmase.
• Esey toultan zantiy, amikal e alez. Servi non sa bann rezidan.
• Lir e diskit en paragraf alafwa.
• Demann bann pti kestyon. Zantiman felisit zot tou pour zot komanter.
• Reponn bann kestyon oubyen bann lobzeksyon en lot ler avek sa dimoun ki’n demann sa kestyon an prive.
• Reponn kestyon bann travayer ek manm fanmir dan en fason senp e direk.
• Sezi loportinite pour konmans en letid Labib endividyel avek bann rezidan, fanmir ek travayer.