Amelyor nou abilite pour prese—Konmans en konversasyon pour fer temwannyaz enformel
Akoz i enportan: Kan nou pe pres portanport, nou souvan vwar ki bokou dimoun pa kot lakaz. Par kont, nou kapab zwenn zot kan nou pe servi transpor piblik, kan nou pe espere kot dokter, dan ler manze kot travay oubyen kot lekol e lezot landrwa ankor. I lavolonte Zeova ki tou dimoun i ganny sans tann sa mesaz Rwayonm. (1 Tim. 2:3, 4) Souvan, pour arive rann en temwannyaz, nou devret pran linisyativ pour konmans en konversasyon.
Ki mannyer pour fer li:
• Servi bon zizman. Eski sa dimoun i paret zantiy e pare pour koze? Eski sirkonstans i permet pour annan en bon pti konversasyon? Serten proklanmater i get sa dimoun dan son figir e apre fer en pti sourir. Si sa dimoun i fer en sourir li osi, zot esey konmans en konversasyon.
• Fer en pti lapriyer an silans si ou napa kouraz pour koze.—Nee. 2:4; Akt 4:29.
• Konmans avek en senp komanter, petet par dir li bonzour. Zezi pa ti konmans son konversasyon avek sa madanm Samariten par koz lo Rwayonm. (Zan 4:7) Parfwa en konversasyon i kapab konmans avek en konpliman: “Ou annan en bon piti!” Demann en kestyon i en lot fason pour konmans en konversasyon: “Eski ou’n vwar sa nouvel yer swar?”
• Enn fwa konversasyon in konmanse, rod en loportinite pour entrodwir sa bon nouvel me san ki ou bezwen depese. Les sa konversasyon devlop dan en fason natirel. Petet ou kapab dir en keksoz ki evey lentere sa dimoun e ki fer li demann kestyon. Par egzanp, si sa konversasyon i baze lo problenm fanmir, ou kapab dir, “Mon’n vwar bann bon konsey lo konman pour byen elve nou zanfan.” Si ou pe diskit lo en keksoz ki’n pase dan nouvel, ou kapab dir, “Tou resaman mon’n aprann bann bon nouvel dan bann piblikasyon ki mon’n lir.” Pa dekouraze si sa konversasyon i terminen avan ki ou’n kapab donn en temwannyaz.
• Anmenn bann trak oubyen lezot piblikasyon ki ou kapab donn avek en dimoun ki montre lentere.
Esey sa pour sa mwan:
• Sak semenn esey konmans omwen en konversasyon avek lobzektif pour fer temwannyaz enformel.