Kondwir bann letid Labib ki efikas
1. Ki responsabilite bann proklanmater ki kondwir bann letid Labib i annan?
1 Personn pa kapab servi Bondye si Zeova pa “atir li.” (Zan 6:44) Menm si sa i leka, bann proklanmater ki kondwir bann letid Labib i devret fer zot par pour ed bann dimoun apros avek zot Papa ki dan lesyel. (Zak 4:8) Sa i demann en bon preparasyon. Pour ed sa bann etidyan pour konpran sa mesaz e fer progre, i pa ase zis pour lir sak paragraf e demann bann kestyon ki’n ganny mete dan sa liv.
2. Ki en letid Labib efikas pou akonpli?
2 Pour fer bann letid efikas, bann proklanmater i devret ed zot etidyan pour (1) konpran sa ki Labib i dir, (2) aksepte sa ki Labib i dir e (3) met an pratik sa ki Labib i dir. (Zan 3:16; 17:3; Zak 2:26) I kapab pran plizyer mwan pour ed en etidyan akonpli tou sa bann letap. Me sak letap i en staz kot sa etidyan i devlop son relasyon avek Zeova e dedye son lavi avek li.
3. Akoz bann ansenyan efikas i demann bann kestyon lopinyon?
3 Ki sa etidyan Labib pe mazinen?: Pour konnen si nou etidyan Labib i konpran e aksepte sa ki i pe aprann, evite pour koz tro bokou e ankouraz sa etidyan pour eksprim son lekor. (Zak 1:19) Eski i konpran sa ki Labib i dir lo sa size ki zot pe diskite? Eski i kapab eksplik sa size dan son prop mo? Ki mannyer i santi konsernan sa ki i’n aprann? Eski i aksepte ki sa ki Labib i dir i rezonnab? (1 Tesa. 2:13) Eski i konpran ki sa ki i pe aprann i devret ed li pour fer bann sanzman dan son lavi? (Kol. 3:10) Pour arive ganny larepons sa bann kestyon, nou bezwen servi bon zizman ler pe demann bann kestyon lopinyon e apre ekoute.—Mat. 16:13-16.
4. Ki nou devret fer si en etidyan pe ganny difikilte pour konpran oubyen met an pratik sa ki i’n aprann dan Labib?
4 Bann labitid ek fason panse i souvan anrasinen dan leker en dimoun e i pran letan pour retir tousala. (2 Kor. 10:5) Me si nou etidyan i pa aksepte ni met an pratik sa ki i pe aprann? Pasyans i neseser pour ki Parol Bondye ek lespri sen i ganny ase letan pour travay dan leker sa etidyan. (1 Kor. 3:6, 7; Ebr. 4:12) Dan plas met presyon lo li, i pli bon pour al lo en lot size si sa etidyan pe ganny difikilte pour konpran oubyen aplik en lansennyman Labib. Anmezir ki nou kontinyen ansenny li avek pasyans ek lanmour atraver Labib, i kapab ganny motive pour fer bann azisteman neseser.