Servi bann laspe dan sa liv Ki Labib i dir dan en fason efikas

Anmezir ki en etidyan Labib i aprann sa ki Labib i vreman dir e met an aplikasyon sa ki i pe aprann, i pou grandi spirityelman e raport fri. (Ps. 1:1-3) Nou kapab ed nou bann etidyan progrese par servi byen serten laspe dan sa liv Ki Labib i dir.

Kestyon lentrodiksyon: Sak sapit i konmans avek bann kestyon ki ganny reponn dan sa leson. Ou kapab demann sa bann kestyon pour fer sa etidyan reflesir e donn li lanvi ekout sa lot diskisyon ki zot pou gannyen. Ou osi kapab envit li pour diskit an bref lo sak kestyon. Si i pa donn en bon larepons, pa bezwen koriz li deswit. Son komanter pou ed ou remark bann pwen ki ou bezwen port latansyon e met lanfaz lo la.​—Prov. 16:23; 18:13.

Lezot lenformasyon: Si sa etidyan i konpran e aksepte sa lenformasyon dan sa bann leson, ou kapab ankouraz li pour egzamin lo li menm lezot lenformasyon deryer sa liv. Ler ou fer sa lot leson, ou kapab pran detrwa minit pour fer sir ki i’n konpran. Me pour ki sa i benefisye li, ou bezwen pran letan pandan letid pour egzamin lezot lenformasyon deryer oubyen en porsyon ladan par lir bann paragraf e demann bann kestyon ki ou’n prepare davans.

Bwat revizyon: Sa bwat revizyon a lafen sak sapit i donn larepons sa bann kestyon ki trouve lo konmansman. Ou kapab servi sa laspe pour fer sir ki sa etidyan i konpran e kapab eksplik bann pwen enportan. Lir for ansanm sak larepons e osi bann verse ki’n ganny site. Apre envit sa etidyan pour servi sa bann verse pour eksplike akoz sa larepons i vre.​—Akt 17:2, 3.