Gard ou lespwar antet

1. Ki lespwar Zeova in donn nou?

ZEOVA in donn nou en zoli lespwar. I’n donn nou sa lespwar pour viv pour touzour. Serten i annan sa lespwar pour vin imortel e viv pour touzour dan lesyel. (1 Kor. 15:50, 53) Me laplipar dimoun i annan sa lespwar pour viv pour touzour lo later. Zot pou annan en lasante parfe e zot pou ere. (Rev. 21:3, 4) Ki swa nou annan lespwar pour viv pour touzour dan lesyel oubyen lo later, nou lespwar i presye pour nou.

2. Lo kwa ki nou lespwar i baze e akoz nou dir sa?

² Ler Labib i servi sa mo “lespwar,” sa i kapab vedir ki nou pe “esper bann bon keksoz arive.” Vi ki Zeova ki’n donn nou sa lespwar, nou asire ki sa ki nou pe espere pou vin vre. (Rom. 15:13) Nou konn bann promes Zeova e nou konnen ki i toultan gard son parol. (Nom. 23:19) Nou asire ki Zeova i anvi e i kapab fer tou sa ki i’n dir i pou fer. Alor nou lespwar pa en keksoz ki nou’n imazinen ouswa en keksoz ki nou anvi i arive. Nou lespwar i baze lo sa ki nou konnen i vre.

3. Ki nou pou vwar dan sa lartik? (Psonm 27:14)

³ Nou Papa ki dan lesyel i kontan nou e i anvi ki nou annan konfyans dan li. (Lir Psonm 27:14.) Ler nou annan konfyans dan Zeova, nou pou kapab andir bann difikilte e malgre nenport kwa ki arive dan lavenir, nou pou annan kouraz e nou pou zwaye. Annou vwar ki mannyer sa lespwar ki nou annan i protez nou. Premyerman, nou pou vwar ki mannyer nou lespwar i parey lank en bato e en kask lo nou latet. Apre nou pou vwar ki mannyer nou kapab kontinyen gard nou lespwar antet.

NOU LESPWAR I PAREY LANK EN BATO

4. Ki mannyer nou lespwar i parey lank en bato? (Ebre 6:19)

⁴ Dan let ki zapot Pol ti ekri pour bann Kretyen Ebre i ti dir ki nou lespwar i parey lank en bato. (Lir Ebre 6:19.) Vi ki Pol ti souvandfwa vwayaz lo lanmer, i ti konnen ki lank en bato i anpes sa bato drive. En fwa, i ti annan en tanpet ler Pol ti pe vwayaz par bato. Pandan sa tanpet, i ti vwar bann maren pe zet lank sa bato dan lanmer pour anpes bato mont lo brizan. (Akt 27:29, 39-41) Parey lank en bato i anpes sa bato drive, nou lespwar i ed nou pour reste pros avek Zeova pour ki nou pa elwannyen avek li ler nou annan problenm. Nou lespwar i ed nou pour reste kalm ler nou annan problenm parski nou asire ki keksoz pou amelyore. Gard antet ki Zezi ti dir ki nou pou ganny persekite. (Zan 15:20) Alor ler nou medit lo sa ki Zeova in promet nou, sa pou ed nou pour kontinyen servi li.

5. Ki mannyer lespwar ki Zezi ti annan ti ed li reste fidel ler i ti pe al mor?

⁵ Annou vwar ki mannyer sa lespwar ki Zezi ti annan ti ed li pour reste fidel menm ler i ti konnen ki i ti pou soufer e mor. Lapannkot lannen 33, zapot Pyer ti sit en profesi ki dan liv Psonm pour dekrir lafason ki Zezi ti reste kalm e annan konfyans dan Zeova. Sa verse i dir: “Mon pou kontinyen annan lespwar parski ou pa pou kit mwan dan Latonm e ou pa pou les lekor ou serviter fidel pouri. . . . Ou pou fer mwan vreman zwaye.” (Akt 2:25-28; Ps. 16:8-11) Menm si Zezi ti konnen ki i pou mor, i ti annan lespwar ki Bondye ti pou resisit li e i ti pou zwaye parski i ti pou avek son Papa ankor, dan lesyel.​—Ebr. 12:2, 3.

6. Ki en frer ti dir konsernan lespwar?

⁶ Sa lespwar ki nou annan in ed en kantite nou bann frer ek ser pour andire. Annou vwar legzanp en frer ki apel Leonard Chinn ki ti reste Langleter. Pandan Premye Lager Mondyal, i ti ganny mete dan prizon parski i ti refize antre dan larme. Pour de mwan, i ti ganny mete dan en kaso li tousel. Apre sa, i ti ganny forse pour fer bann travay vreman difisil. I ti ekri: “Sa ki’n arive avek mwan, in ed mwan realize ki nou bezwen annan lespwar pour nou kapab andire. Nou annan legzanp Zezi, bann zapot, bann profet e nou annan bann zoli promes ki dan Labib. Tousala i donn nou lespwar pour lavenir e i donn nou lafors pour andire.” Lespwar ki Leonard ti annan ti azir parey lank en bato e i ti anpes li elwannyen avek Zeova. Nou lespwar i kapab fer parey pour nou osi.

7. Ki mannyer bann problenm i fer nou lespwar vin pli reel? (Romen 5:3-5; Zak 1:12)

⁷ Ler nou andir bann difikilte e nou vwar pour nou menm ki mannyer Zeova i ed nou, sa pou fer nou realize ki nou annan son laprouvasyon e nou lespwar pou vin pli reel. (Lir Romen 5:3-5; Zak 1:12.) Nou lespwar pou pli reel ki ler nou ti aksepte sa bon nouvel. Satan i anvi ki nou dekouraze akoz nou bann problenm. Me avek led Zeova nou kapab andir tou nou bann problenm.

NOU LESPWAR I PAREY EN KASK LO NOU LATET

8. Ki mannyer lespwar i parey en kask lo nou latet? (1 Tesalonisyen 5:8)

⁸ Labib i osi dir ki nou lespwar i parey en kask lo nou latet. (Lir 1 Tesalonisyen 5:8.) En solda i met en kask lo son latet pour protez son latet ler lennmi i esey tap li lo son latet. Satan i nou lennmi e nou bezwen protez nou lespri kont son bann latak. I servi diferan keksoz pour esey tant nou pour li kapab gat nou fason panse. Zis parey en kask i protez latet en solda, nou lespwar i protez nou fason panse pour ki nou kapab reste fidel avek Zeova.

9. Ki i arive avek dimoun ki napa lespwar?

⁹ Sa lespwar ki nou annan pour viv pour touzour pou ed nou fer bann desizyon ki saz. De lot kote, si nou nepli gard nou lespwar antet e nou konmans mazin lo zis nou bann dezir, nou kapab oubliye ki nou annan lespwar pour viv pour touzour. Annou vwar sa ki ti arive avek serten Kretyen ki ti viv dan lavil Korent dan premye syek. Zot ti’n perdi lafwa dan enn bann promes Bondye ki enportan. Sa i sa lespwar ki dimoun pou ganny resisite. (1 Kor. 15:12) Pol ti dir ki bann dimoun ki pa krwar ki bann mor pou ganny resisite i viv zis pour satisfer zot bann dezir. (1 Kor. 15:32) Ozordi en kantite dimoun pa krwar dan bann promes Bondye e zot fer nenport kwa pour zot ere. Me nou, nou diferan parski nou annan konfyans dan bann promes Bondye pour lavenir. Nou lespwar i parey en kask lo nou latet ki protez nou lespri e ki ed nou pour pa mazin zis nou prop lekor parski sa ti pou gat nou lanmitye avek Zeova.​—1 Kor. 15:33, 34.

10. Ki mannyer lespwar ki nou annan i kapab protez nou kont bann fo rezonnman?

¹⁰ Nou lespwar i osi protez nou e anpes nou krwar ki nou pa pou zanmen kapab fer Zeova plezir. Par egzanp, serten i kapab mazinen: ‘Mon pa pou zanmen parmi bann ki pou viv pour touzour. Mon pa alaoter. Mon pa pou zanmen kapab fer sa ki Bondye i anvi mon fer.’ Rapel ki Elifaz, enn bann swadizan zanmi Zob ti dir en keksoz en pe parey. Elifaz ti dir: “Eski en senp imen i kapab pir?” I ti osi dir: “Gete! Bondye napa konfyans dan son bann sen e menm lesyel pa pir dan son lizye.” (Zob 15:14, 15) Sa ti bann mansonz! Rapel ki Satan ki anvi ou mazin koumsa. I konnen ki si ou kontinyen mazin koumsa ou pou konmans oubliy ou lespwar. O kontrer rezet sa bann mansonz e konsantre lo bann promes Zeova. Ou kapab asire ki i anvi ou viv pour touzour e i pou ed ou fer sa.​—1 Tim. 2:3, 4.

KONTINYEN GARD OU LESPWAR ANTET

11. Akoz nou devret demontre pasyans anmezir nou esper Zeova akonplir son bann promes?

¹¹ I pa toultan fasil pour gard nou lespwar antet. I kapab ki nou fatige espere ziska ki Zeova i akonplir son bann promes. Me Zeova i eternel e sa ki paret en kantite letan pour nou, i en ptigin letan pour li. (2 Pyer 3:8, 9) I pou fer sa ki in promet dan sa pli bon fason me petet i pa pou azir dan sa moman ki nou, nou ekspekte. Kwa ki kapab ed nou gard nou lespwar antet anmezir nou esper Zeova akonplir son bann promes?​—Zak 5:7, 8.

12. Dapre Ebre 11:1, 6, akoz nou bezwen annan lafwa pour nou kapab annan lespwar?

¹² Zeova ki pou akonplir sa bann promes. Alor ler nou reste pros avek li sa pou ed nou gard nou lespwar antet. Anfet, Labib i dir ki pour nou annan lespwar nou bezwen annan lafwa ki Zeova i egziste e ki i “rekonpans sa bann ki pe vreman rod li.” (Lir Ebre 11:1, 6.) Si nou vreman krwar ki Zeova i egziste, nou pou pli asire ki i pou fer tou sa ki i’n promet. Annou vwar serten fason ki nou kapab vin pli pros avek Zeova ki pou ed nou gard nou lespwar antet.

13. Ki mannyer nou kapab vin pros avek Bondye?

¹³ Priy Zeova e lir son Parol. Menm si nou pa vwar Zeova, nou kapab vin pros avek li. Nou kapab koz avek li dan lapriyer parski nou asire ki i pou ekout nou. (Zer. 29:11, 12) Nou kapab ekout Bondye par lir son Parol e medit lo la. Ler nou lir konsernan lafason ki Zeova ti pran swen avek son bann serviter fidel dan lepase, sa pou fer nou lespwar vin pli reel. Tou sa ki’n ganny ekrir dan Parol Bondye, in “ganny ekrir pour ansenny nou pour ki atraver nou landirans ek rekonfor ki Lekritir i donn nou, nou kapab annan lespwar.”​—Rom. 15:4.

14. Akoz nou bezwen medit lo sa ki Zeova in fer pour lezot?

¹⁴ Medit lo lafason ki Zeova in gard son bann promes. Annou vwar sa ki Bondye ti fer pour Abraam avek Sara. Zot ti tro vye pour ganny zanfan. Me Zeova ti promet ki zot ti pou ganny en zanfan. (Zen. 18:10) Ki mannyer Abraam ti reazir? Labib i dir: “Abraam ti annan lespwar ek lafwa ki i ti pou vin papa en kantite nasyon.” (Rom. 4:18) Menm si dapre pwennvi imen i ti enposib pour Abraam ganny zanfan, Abraam ti asire ki Zeova ti pou gard son promes e sa zonm fidel pa ti dezapwente. (Rom. 4:19-21) Bann resi koumsa i ansenny nou ki nou kapab annan konfyans ki Zeova pou gard son bann promes menm ler i paret enposib.

15. Akoz nou devret reflesir lo sa ki Bondye in fer pour nou?

¹⁵ Reflesir lo sa ki Zeova in fer pour ou. Reflesir lo bann byenfe ki ou’n gannyen avek lakonplisman bann promes ki dan Labib. Par egzanp, Zezi in promet ki son Papa pour donn ou sa ki ou bezwen pour viv. (Mat. 6:32, 33) Zezi in osi asir ou ki Zeova pou donn ou lespri sen ler ou demann li. (Lik 11:13) Zeova in gard sa bann promes. I tre probab ki ou mazin lezot promes ki Zeova in fer ki konsern ou personnelman. Par egzanp, i promet pour pardonn ou, pour rekonfort ou e pour donn ou sa ki ou bezwen pour reste pros avek li. (Mat. 6:14; 24:45; 2 Kor. 1:3) Ler ou medit lo sa ki Bondye in fer pour ou, sa pou fer ou pli asire ki Zeova pou fer sa ki i’n promet pour fer pour ou dan lavenir.

REZOUI AKOZ NOU LESPWAR

16. Akoz nou lespwar i en kado presye?

¹⁶ Sa lespwar ki nou annan pour viv pour touzour i en kado presye sorti kot Bondye. Nou pe esper en lavenir merveye, enn ki nou asire pou arive. Nou lespwar i parey lank en bato. I ed nou pour pa elwannyen avek Zeova ler nou fer fas avek problenm, ler nou ganny persekite e ler nou fer fas avek lanmor. Nou lespwar i parey en kask lo nou latet ki protez nou fason panse pour nou kapab rezet sa ki mal e fer sa ki byen. Sa lespwar ki Labib i koz lo la i ed nou vin pli pros avek Bondye e i montre nou ki kantite Bondye i kontan nou. Alor, ler nou kontinyen gard nou lespwar antet, sa pou anmenn en kantite byenfe pour nou.

17. Akoz nou lespwar i fer nou ere?

¹⁷ Dan sa let ki zapot Pol ti anvoy pour bann Romen, i ti ankouraz zot pour “rezoui akoz zot lespwar.” (Rom. 12:12) Pol ti rezoui parski i ti asire ki si i ti reste fidel, i ti pou viv pour touzour dan lesyel. Nou osi nou kapab rezoui dan nou lespwar parski nou asire ki Zeova pou akonpli son bann promes. Parey sa psalmis ti dir: “Ere sa enn . . . ki son lespwar i dan Zeova son Bondye, . . . sa Enn ki touzour reste fidel.”​—Ps. 146:5, 6.