Sa ki Labib i ansenny nou konsernan son Loter

1. Akoz ou rekonesan ki ou annan Labib?

NOU vreman rekonesan anver Zeova parski in donn nou Labib! Dan Labib, Zeova in donn nou bann konsey saz ki kapab ed nou konnen ki pour fer ler nou annan problenm. I osi donn nou en zoli lespwar pour lavenir. Me sa ki pli enportan, Zeova in servi Labib pour fer nou konn son bann diferan kalite. Ler nou medit lo son bann zoli kalite, sa i tous nou en kantite e i fer nou anvi vin son zanmi.​—Ps. 25:14.

2. Ki bann fason Zeova in kominik avek bann imen?

² Zeova i anvi ki dimoun i konn li. Dan lepase, i ti fer serten son bann serviter ganny bann rev ek vizyon e i ti anvoy son bann lanz pour anmenn son mesaz kot bann dimoun. (Nom. 12:6; Akt 10:3, 4) Nou pa ti pou kapab aprann konsernan sa bann rev, vizyon oubyen mesaz ki bann lanz ti anmennen si zot pa ti’n ganny ekrir. I pour sa rezon ki Zeova ti fer bann zonm “ekri dan en liv” sa ki i anvi nou konnen. (Zer. 30:2) Vi ki “semen sa vre Bondye i parfe,” nou kapab asire ki sa fason ki Zeova i servi pour kominik avek nou i bon e i pou ed nou.​—Ps. 18:30.

3. Ki mannyer Zeova in fer sir ki Labib i ankor egziste ozordi? (Izai 40:8)

³ Lir Izai 40:8. Pour plizyer milye lannen, bann zonm ek madanm fidel in ganny bann bon konsey sorti dan Parol Bondye. Ki mannyer sa in posib? Sa i en bon kestyon parski Labib ti ganny ekrir en kantite letan pase e o konmansman i ti ganny ekrir lo bann roulo ek lapo zannimo, ki avek letan in degrade. Sa bann dokiman nepli egziste ozordi. Me Zeova in fer sir ki dimoun in kopye son parol sakre. Menm si sa bann dimoun ki ti kopye Labib ti enparfe, zot ti fer byen atansyon ler zot ti pe kopye Labib. Par egzanp, en spesyalis Labib ti ekri sa konsernan Lekritir Ebre: “Nou asire ki i napa lezot liv ki’n ganny ekrir dan lepase ki’n ganny kopye dan en fason sitan egzakt parey Labib.” Alor menm si Labib ti ganny ekrir en kantite letan pase lo bann materyo ki degrade e bann dimoun ki ti kopye Labib ti enparfe, nou kapab asire ki sa mesaz ki nou lir dan Labib ozordi i bann panse Zeova ki Loter Labib.

4. Ki nou pou vwar dan sa lartik?

⁴ Zeova in donn nou “tou don ki bon e tou kado parfe.” (Zak 1:17) Labib i enn bann pli bon kado ki Zeova in donn nou. Ler en dimoun i donn nou en kado, i montre ki i konn nou e i konnen ki nou bezwen. Sa i osi leka avek Zeova. Ler nou egzamin sa kado ki Zeova in donn nou, nou aprann en kantite konsernan Zeova. Nou aprann ki Zeova i konn nou e i konn tre byen sa ki nou bezwen. Dan sa lartik, nou pou vwar ki Labib i dir konsernan trwa kalite ki Zeova i annan. Sa i son lasazes, son lazistis ek son lanmour. Premyerman, annou vwar ki mannyer Labib i montre ki Zeova i annan lasazes.

LABIB I MONTRE KI ZEOVA I ANNAN LASAZES

5. Ki mannyer Labib i montre ki Zeova i annan lasazes?

⁵ Zeova i konnen ki nou bezwen son bann konsey saz. Sanmenm sa ki i’n donn nou Labib konman en kado ki ranpli avek son lasazes. Bann konsey ki dan Labib i kapab ed bann dimoun. Labib i sanz lavi. Ler Moiz ti ekri bann premye liv Labib i ti dir avek bann Izraelit, ki ti pep Bondye: “Sa parol i vreman enportan akoz zot lavi i depan lo la.” (Det. 32:47) Bann Izraelit ki ti obei Lekritir ti kapab annan en lavi ere. (Ps. 1:2, 3) Menm si Parol Bondye ti ganny ekrir en kantite letan pase, i ankor annan sa pouvwar pour sanz lavi dimoun. Par egzanp, lo jw.org dan sa seri “Labib i sanz lavi,” ou kapab trouv biografi plis ki 50 dimoun ozordi. Sa bann dimoun in fer bann gran sanzman e amelyor zot lavi parski zot in konmans obei bann konsey ki dan Labib.​—1 Tesa. 2:13.

6. Akoz nou kapab dir ki Labib i pa parey lezot liv?

⁶ I napa en lot liv ki parey Parol Bondye. Akoz sa? Parski Zeova ki Loter sa liv e Zeova i tou pwisan, i eternel e napa personn ki pli saz ki li. En kantite liv i kontinyen ganny lir menm apre ki son loter in mor me souvan bann konsey dan sa bann liv pa itil avek letan. De lot kote, bann prensip ki dan Labib i saz e i toultan itil. Sa bann prensip in ed dimoun tou dilon listwar. Anmezir ki nou lir Labib e medit lo sa ki nou aprann, Zeova i servi son lespri sen ki pwisan pour ed nou vwar ki mannyer nou kapab aplik bann konsey Labib. (Ps. 119:27; Mal. 3:16; Ebr. 4:12) Zeova i vreman anvi ed nou. Sa i devret fer nou anvi lir Labib regilyerman!

7. Ki mannyer Labib ti ed pep Bondye dan lepase pour reste ini?

⁷ En lot keksoz ki montre ki dan Labib i annan lasazes Bondye, i lefet ki Labib i ed pep Bondye pour reste ini. Ler bann Izraelit ti antre dan Later Promiz, zot ti etabli zot dan diferan landrwa. Serten ti vin peser, lezot ti sonny bef e lezot ankor ti kiltiv later. I ti kapab fasil pour bann Izraelit ki reste dan en landrwa pour aret mazin byennet bann Izraelit ki reste dan lezot parti sa pei. Me Zeova ti fer laranzman pour bann Izraelit zwenn ansanm dan diferan lokazyon pour ekout son Parol ganny lir e eksplike. (Det. 31:10-13; Nee. 8:2, 8, 18) Imazinen ki mannyer en Izraelit ti santi ler i ti ariv Zerizalenm e vwar plizyer milyon lezot serviter Zeova ki sorti dan diferan parti sa pei. Dan sa fason, Zeova ti ed son pep pour reste ini. Pli tar, kongregasyon Kretyen ti ganny formen. Dan sa bann kongregasyon, i ti annan bann zonm ek madanm ki ti koz diferan langaz. Serten parmi zot ti bann dimoun ordiner e lezot ti bann dimoun ki ti annan bann pozisyon enportan. Serten ti ris e lezot ti pov. Me vi ki zot tou zot ti kontan Lekritir, zot ti ador sa vre Bondye ansanm dan linite. Sel fason ki bann dimoun ti kapab konpran Parol Bondye, ti avek led lezot Kretyen e par zwenn ansanm avek zot.​—Akt 2:42; 8:30, 31.

8. Ki mannyer Labib i ed pep Zeova ozordi pour reste ini?

⁸ Nou Bondye ki saz i kontinyen servi Labib pour ansenny son pep e fer zot reste ini. Tou manze spirityel ki nou gannyen i baze lo Labib. Nou zwenn ansanm pandan bann renyon ek lasanble pour ekoute kot Labib pe ganny lir, eksplike e diskite. Alor, Labib i en zouti vreman enportan ki Zeova i servi pour ed son pep pour “ador li ansanm dan linite.”​—Zef. 3:9.

9. Ki kalite ki nou bezwen annan pour nou konpran sa ki Labib i dir? (Lik 10:21)

⁹ Annou vwar en lot keksoz ki montre ki Zeova i saz. I’n fer ekri diferan bout dan Labib dan en fason ki zis bann dimoun ki annan limilite ki pou konpran. (Lir Lik 10:21.) Dimoun partou dan lemonn i lir Labib. En spesyalis Labib i dir ki Labib “i ganny lir plis ki okenn lezot liv e dimoun i port plis latansyon ler zot lir Labib ki ler zot lir lezot liv.” Me zis bann dimoun ki annan limilite ki vreman konpran e aplik sa ki Labib i dir.​—2 Kor. 3:15, 16.

10. Ki en lot fason Labib i montre lasazes Zeova?

¹⁰ Dan Labib i annan en lot fason ki nou kapab aprann konsernan lasazes Zeova. Zeova i servi Labib pour ansenny son pep konman en group e osi pour ansenny e rekonfort sakenn parmi nou. Ler nou lir Parol Zeova, nou kapab vwar ki i enterese avek sakenn parmi nou. (Iza. 30:21) Ler ou fer fas avek en problenm, eski ou’n deza fer resers dan Labib e ou’n lir en verse Labib ki paret konmsi in ganny ekrir zis pour ou? Me kantmenm sa, Labib in ganny ekrir pour ki plizyer milyon dimoun i kapab konpran li. Ki mannyer i posib ki dan Labib i annan bann lenformasyon ki azour e ki egzakteman sa ki ou bezwen? Sa i posib parski Loter Labib i sa personnaz pli saz dan liniver.​—2 Tim. 3:16, 17.

LABIB I MONTRE KI BONDYE I ANNAN LAZISTIS

11. Ki mannyer Bondye ti montre ki i pa fer lapreferans ler Labib ti pe ganny ekrir?

¹¹ Lazistis i en lot kalite ki Zeova i annan. (Det. 32:4) En dimoun ki zis pa fer lapreferans e Zeova pa fer lapreferans. (Akt 10:34, 35; Rom. 2:11) Nou kapab vwar ki Zeova pa fer lapreferans parski Labib ti ganny ekrir dan bann langaz ki bokou dimoun ti koze sa letan. Laplipar parmi sa 39 premye liv dan Labib ti ganny ekrir dan langaz Ebre e sa ti fer li fasil pour pep Bondye ki ti pe viv sa letan konpran. Me dan premye syek laplipar dimoun ti koz langaz Grek, alor sa dernyen 27 liv Labib ti ganny ekrir dan sa langaz. Zeova pa ti fer son Parol ganny ekrir dan zis en langaz. Ozordi sa plis ki wit bilyon dimoun lo later i koz diferan langaz. Ki mannyer tou sa dimoun i kapab aprann konsernan Zeova?

12. Ki en fason ki Danyel 12:4 in ganny akonplir dan sa bann dernyen zour?

¹² Atraver profet Danyel, Zeova ti promet ki dan letan lafen, “sa vre konnesans” ki ganny trouve dan Labib ti pou “vin annabondans.” En kantite dimoun ti pou ganny sa vre konnesans. (Lir Danyel 12:4.) En fason ki sa vre konnesans in vin annabondans i atraver Labib ek bann piblikasyon baze lo Labib ki’n ganny tradwir, pibliye e distribye avek en kantite dimoun. Labib i sa liv ki’n pli ganny tradwir e distribye dan lemonn. Parfwa bann tradiksyon Labib ki ganny fer par bann biznes i vreman ser. Ziska aprezan, pep Zeova in tradwir Labib an antye ouswa an parti dan plis ki 240 langaz e nenport dimoun i kapab ganny en kopi pour nanryen. Sa i fer ki dimoun partou lo later pe aprann konsernan sa “bon nouvel Rwayonm” avan lafen i arive. (Mat. 24:14) Nou Bondye ki annan lazistis i anvi donn otan dimoun posib sa loportinite pour aprann konn li par lir son Parol. Sa i akoz i kontan nou en kantite.

LABIB I MONTRE KI BONDYE I KONTAN NOU

13. Akoz nou kapab dir ki Labib i montre ki Zeova i kontan nou? (Zan 21:25)

¹³ Labib i ed nou konpran ki lanmour i sa pli zoli kalite ki Zeova i annan. (1 Zan 4:8) Mazin lo sa ki Zeova in fer met dan Labib e lo sa ki i pa’n fer met dan Labib. I’n donn nou zis sa ki nou bezwen pour nou annan en bon lanmitye avek li, pour annan en lavi ere la konmela e pour ganny lavi eternel. Vi ki Zeova i kontan nou, i pa’n donn nou en ta lenformasyon an plis ki pa neseser pour nou kapab servi li.​—Lir Zan 21:25.

14. Ki en lot fason ki Labib i montre ki Zeova i kontan nou?

¹⁴ Zeova i osi montre ki i kontan nou par kominik avek nou dan en fason ki onor nou. Dan Labib, i pa donn nou en ta lareg pour li dir nou egzakteman ki nou kapab oubyen pa kapab fer dan tou laspe nou lavi. O kontrer i servi leksperyans lezot dimoun, bann profesi e bann konsey pratik pour ed nou fer bann bon desizyon. Dan sa bann fason, Parol Bondye i motiv nou pour kontan e obei Zeova avek tou nou leker.

15. (a) Ki mannyer Labib i montre ki Zeova i enterese avek nou? (b) Dan sa portre, ki personnaz dan Labib ki sa pti fiy, sa zenn frer ek sa ser aze pe medit lo la? (Zen. 39:1, 10-12; 2 Rwa. 5:1-3; Lik 2:25-38)

¹⁵ Labib i montre ki Zeova i vreman enterese avek nou. Ki mannyer sa? Dan Labib i annan bann resi kot bann dimoun ti eksprim zot santiman. Nou kapab konpran sa bann dimoun parski zot ti “annan bann santiman parey nou menm.” (Zak 5:17) Osi ler nou vwar lafason ki Zeova ti tret sa bann dimoun, nou kapab konpran pli byen ki “Zeova i annan en kantite konpasyon ek mizerikord.”​—Zak 5:11.

16. Ki nou aprann lo Zeova ler nou lir dan Labib konsernan bann dimoun ki ti fer fot? (Izai 55:7)

¹⁶ I annan en lot fason ki Labib i montre ki Zeova i kontan nou. Labib i asir nou ki Bondye pa pou abandonn nou ler nou fer fot. Menm si bann Izraelit ti fer pese kont Zeova plizyer fwa, Zeova ti pardonn zot ler zot ti repantir senserman. (Lir Izai 55:7.) Bann Kretyen dan premye syek osi ti konnen ki Zeova i kontan zot en kantite. Zeova ti enspir zapot Pol pour ankouraz son bann frer ek ser pour “pardonn e rekonfort” en zonm ki ti’n fer en pese grav me ki ti’n repantir. (2 Kor. 2:6, 7; 1 Kor. 5:1-5) I enteresan pour vwar ki Zeova pa ti rezet son bann serviter zis akoz zot ti fer bann fot. O kontrer avek lanmour, i ti ed zot, disiplin zot e envit zot pour revin son zanmi. Dan nou letan osi, Zeova i promet pour fer parey pour tou bann ki repantir.​—Zak 4:8-10.

APRESYE PAROL BONDYE KI EN “KADO PARFE”

17. Akoz Labib i en kado spesyal?

¹⁷ Zeova in donn nou en zoli kado. Akoz Parol Bondye i sitan spesyal? Nou’n aprann ki Labib i montre ki Bondye i annan lasazes, i annan lazistis e ki i kontan nou en kantite. Sa liv i montre ki Zeova i anvi nou konn li. I anvi ki nou vin son zanmi.

18. Ki mannyer nou kapab montre ki nou apresye Labib ki sa “kado parfe” ki Zeova in donn nou?

¹⁸ Nou pa zanmen anvi oubliye ki Parol Bondye i en “kado parfe.” (Zak 1:17) Annou kontinyen montre ki nou apresye sa kado. Nou kapab fer sa par lir e medit lo son Parol. Ler nou fer sa, nou kapab asire ki Loter Labib pou beni nou zefor e nou “pou kapab konn Bondye.”​—Prov. 2:5.