Sa ki byen ek sa ki mal: En swa ki ou devret fer
Bann standar moral ki nou swazir pou determinen si nou pou ere oubyen non. Zeova Bondye i konn sa. Sa i rezon akoz i anvi ki nou viv dapre son bann standar.
Zeova i anvi ki nou viv anpe e ere.
“Mwan, Zeova, mon ou Bondye, sa Enn ki pe ansenny ou pour ou prop byenfe, sa Enn ki pe gid ou lo sa semen ki ou devret marse. Si zis ou ti ekout byen mon bann komannman! Ou lape ti pou vin parey en larivyer e ou ladrwatir ti pou vin parey laroul dan lanmer.”—Izai 48:17, 18.
Konman nou Kreater, Zeova i konn sa pli bon fason ki nou devret viv. I anvi ki nou swiv son konsey akoz i pour nou prop dibyen. Ler nou swiv bann komannman Bondye, nou pa pou bezwen mazinen si nou bann swa pou anmenn bon rezilta. Nou pou toultan pe fer sa bon swa, enn ki pou fer nou ere e anpe.
Zeova pa demann nou pour fer okenn keksoz ki nou pa kapab fer.
“Sa komannman ki mon pe donn ou ozordi i pa tro difisil pour ou e i pa tro difisil pour ou arive obei li.”—Deterononm 30:11.
Ler nou viv dapre bann standar moral Bondye, petet nou bezwen sanz fason ki nou panse e azir. Par kont, Zeova pa demann nou pour fer tro bokou. Apre tou, konman nou Kreater, i konnen kwa ki nou kapab fer. Anmezir ki nou aprann konn Zeova, nou pou vwar ki “son bann komannman pa en fardo.”—1 Zan 5:3.
Zeova i promet pour ed bann ki swazir pour viv dapre son bann standar.
“Mwan, Zeova ou Bondye, mon pe tyonbo ou lanmen drwat, sa Enn ki pe dir ou, ‘Pa bezwen per, mon pou ed ou.’”—Izai 41:13.
Nou kapab viv nou lavi dan sa fason ki Bondye i anvi nou viv akoz i pou ed nou. I kapab ed nou atraver son Parol Labib ki donn nou lankourazman ek lespwar.
Plizyer milyon dimoun partou dan lemonn in vwar ki ler zot viv zot lavi dapre bann standar ki dan Labib, sa in amelyor zot lavi. Akoz ou pa aprann plis lo bann bon konsey ki dan Labib? Ou kapab konmans avek sa brosir ki baze lo Labib Viv ere pour touzour! ki disponib pour nanryen lo jw.org. Dan sa brosir i annan sa bann leson:
Ki mannyer Labib i kapab ed ou?
Labib i donn lespwar
Eski ou kapab krwar sa ki Labib i dir?
Anmezir ki ou etidye Parol Bondye, Labib, ou pou dekouver ki i pa en vye liv e ki “ou toultan kapab depan lo son bann lord, la konmela e pour touzour.” (Psonm 111:8) Sa pli bon fason ki nou kapab viv nou lavi i ler nou swiv bann standar moral ki dan Labib. Par kont, Bondye pa pou fors nou pour fer li. (Deterononm 30:19, 20; Zozye 24:15) I en swa ki sakenn ant nou i devret fer.