Vin pros avek kanmarad i bon pour nou!

1-2. Ki en keksoz ki enportan pour Zeova e ki i anvi nou fer?

ENN bann keksoz ki pli enportan pour Zeova i lafason ki nou tret lezot dimoun. Zezi ti ansennyen ki nou bezwen kontan nou prosen parey nou kontan nou prop lekor. (Mat. 22:37-39) Sa i osi vedir ki nou menm demontre labonte anver bann ki pa servi Zeova. Ler nou fer sa, nou swiv legzanp Zeova, sa Enn ki “fer soley tap lo bann bon dimoun e lo move dimoun e i fer lapli tonm lo bann ki fer sa ki byen e bann ki fer sa ki mal.”—Mat. 5:45.

² Menm si Zeova i kontan tou dimoun, i vreman kontan bann ki obeir li. (Zan 14:21) Zeova i anvi ki nou swiv son legzanp. I ankouraz nou pour ‘kontan nou bann frer ek ser en kantite’ e pour demontre “bokou tandres ek lafeksyon” anver zot. (1 Pyer 4:8; Rom. 12:10) Sa kalite lanmour ek lafeksyon ki Zeova i anvi nou demontre anver nou bann frer ek ser i parey sa santiman ki nou annan pour en manm fanmir ki nou kontan oubyen pour en zanmi ki nou pros avek.

3. Ki nou bezwen gard antet konsernan lanmour?

³ Lanmour i parey en fler. Zis parey nou bezwen pran swen avek en fler pour li pouse, nou bezwen kontinyen fer zefor pour devlop plis lanmour pour nou bann frer ek ser. Zapot Pol ti donn bann Kretyen sa konsey: “Kontinyen kontan kanmarad parey bann frer ek ser.” (Ebr. 13:1) Zeova i anvi ki nou kontinyen devlop plis lanmour pour lezot. Dan sa lartik, nou pou vwar akoz nou devret vin pli pros avek nou bann frer ek ser dan kongregasyon e ki mannyer nou kapab kontinyen fer sa.

AKOZ NOU DEVRET VIN PLI PROS AVEK NOU BANN FRER EK SER?

4. Dapre Psonm 133:1, ki mannyer nou kapab fer sir ki nou kontinyen apresye sa linite ki i annan ant nou bann frer ek ser? (Vwar portre.)

⁴ Lir Psonm 133:1. Nou dakor avek sa ki sa psalmis ti dir. Nou dakor ki ler nou zanmi avek bann dimoun ki kontan Zeova, sa i “bon” e “agreab.” Me zis parey en dimoun i kapab pa remark en gro pye dibwa ki i vwar toulezour, i kapab ki nou pa apresye labote sa linite ki i annan ant nou bann frer ek ser. Petet sa i akoz nou vwar nou bann frer ek ser souvan, petet menm plizyer fwa par semenn. Alor ki mannyer nou kapab fer sir ki nou kontinyen apresye nou bann frer ek ser? Nou pou kontan nou bann frer ek ser plis si nou pran letan pour reflesir lo ki kantite sakenn parmi zot i presye pour kongregasyon e pour nou.

5. Ki lefe sa lanmour ki nou annan pour kanmarad i kapab annan lo lezot?

⁵ Serten dimoun ki asiste renyon pour premye fwa i vreman enpresyonnen avek sa lanmour ki nou demontre anver kanmarad. Sa i kapab fer zot realize ki zot in trouv laverite. Zezi ti dir: “Par sa, tou dimoun pou konnen ki zot mon disip, si zot annan lanmour antre zot.” (Zan 13:35) Annou vwar leksperyans en madanm ki apel Chaithra. I ti pe etidye dan en liniversite e an menm tan etidye Labib avek Temwen Zeova. I ti aksepte lenvitasyon pour asiste en lasanble. Apre ki i ti’n asiste son premye zour sa lasanble, i ti dir sa ser ki i ti pe etidye Labib avek: “Mon paran pa’n zanmen may mwan. Me dan zot lasanble, mon’n ganny anmaye 52 fwa dan zis en zour. Mon ti santi ki Zeova ti pe servi son pep pour montre mwan ki i kontan mwan. Mon ti anvi form parti sa fanmir.” Chaithra ti kontinyen fer progre e an 2024, i ti batize. Ler bann nouvo i vwar bann bon keksoz ki nou fer enkli sa lanmour ki nou annan pour kanmarad, souvandfwa, sa i motiv zot pour servi Zeova.—Mat. 5:16.

6. Ki mannyer ler nou vin pli pros avek nou bann frer ek ser, sa i kapab protez nou?

⁶ Ler nou vin pli pros avek nou bann frer ek ser, sa i kapab protez nou. Pol ti dir bann Kretyen: “Kontinyen ankouraz kanmarad sak zour . . . pour ki personn parmi zot pa les son leker vin dir akoz pouvwar pese ki anbet dimoun.” (Ebr. 3:13) Si nou sitan dekouraze ki nou konmans vwar li difisil pour fer sa ki byen, Zeova i kapab ankouraz en frer oubyen en ser ki’n remarke, pour donn nou sa led ki nou bezwen. (Ps. 73:2, 17, 23) Byensir sa kalite led i bon pour nou.

7. Ki mannyer lanmour i relye avek linite? (Kolosyen 3:13, 14)

⁷ Nou form parti en group dimoun ki travay dir pour demontre lanmour anver kanmarad. Sa i fer ki nou ganny en kantite benediksyon. (1 Zan 4:11) Par egzanp, lanmour i motiv nou pour “kontinyen siport kanmarad” e sa i fer ki nou ini avek kanmarad. (Lir Kolosyen 3:13, 14; Efe. 4:2-6) Sa i fer ki ler nou vin renyon, i annan en zoli latmosfer ki napa parmi okenn lezot group lo later.

ONOR KANMARAD

8. Ki mannyer Zeova i ed nou pour reste ini avek nou bann frer ek ser?

⁸ Sa linite ki i annan parmi nou bann frer ek ser partou dan lemonn i posib akoz Zeova. (1 Kor. 12:25) Zeova i fer sa posib menm si nou enparfe. Labib i dir ki “Bondye in ansenny [nou] pour kontan kanmarad.” (1 Tesa. 4:9) Andotmo, Zeova i servi Labib pour dir nou egzakteman ki nou bezwen fer pour nou kapab vin pli pros avek kanmarad. Nou kapab les Bondye ansenny nou par etidye e aplik son bann lansennyman. (Ebr. 4:12; Zak 1:25) I sanmenm sa ki Temwen Zeova i fer bokou zefor pour fer.

9. Ki nou aprann dan Romen 12:9-13 konsernan onor lezot?

⁹ Ki mannyer Parol Bondye i ansenny nou pour vin pli pros avek nou bann frer ek ser? Annou vwar ki Pol ti dir konsernan sa dan Romen 12:9-13. (Lir.) Remarke ki i ti dir ki nou “devret touzour premye pour onor lezot.” Ki sa i vedir? Nou devret rod loportinite pour demontre “tandres ek lafeksyon” anver lezot dan diferan fason. Par egzanp, nou devret pardonn lezot, demontre lospitalite ek demontre zenerozite. (Efe. 4:32) Ou pa devret espere pour lezot vin pli pros avek ou. O kontrer, ou ki devret “premye” pour fer sa. I pour sa rezon ki Zezi ti dir: “I annan plis lazwa pour donnen ki pour resevwar.”—Akt 20:35.

10. Ler nou pe “onor lezot,” ki mannyer nou kapab montre ki nou pa pares? (Vwar portre.)

¹⁰ I enteresan pour note ki deswit apre ki Pol ti’n dir ki nou devret premye pour onor lezot, Pol ti ankouraz nou pour “travay dir [e] pa bezwen fer pares.” En dimoun ki travay dir i osi devoue. Ler i ganny en responsabilite, i pran sa responsabilite o serye e i desarz li byen. Proverb 3:27, 28 i ankouraz nou: “Pa refize fer sa ki byen pour dimoun ki bezwen led si ou kapab ed zot.” Alor ler nou vwar ki en dimoun i bezwen led, nou fer sa ki nou kapab pour ed li. Nou pa tarde pour fer sa oubyen krwar ki en lot dimoun pou ed li.—1 Zan 3:17, 18.

11. Kwa ki kapab ed nou pour vin pli pros avek kanmarad?

¹¹ En lot fason ki nou kapab onor lezot i par pardonn zot vitman ler zot ofans nou. Efezyen 4:26 i dir: “Pa reste ankoler ziska soley kouse.” Akoz? Verse 27 i dir ki si nou reste ankoler nou pou “les Dyab pran lavantaz” lo nou. Atraver son Parol, Zeova i dir nou plizyer fwa ki nou devret pardonn kanmarad. Kolosyen 3:13 i ankouraz nou pour “kontinyen . . . pardonn kanmarad volonterman.” Ler nou pardonn lezot, sa i enn bann pli bon fason ki nou kapab vin pli pros avek zot. Ler nou pardonnen, nou ede “gard sa linite ki [nou] annan gras a lespri sen” e “lape i ini [nou] tou ansanm.” (Efe. 4:3) I kler ki ler nou pardonn lezot, sa i fer ki i annan linite ek lape parmi pep Zeova.

12. Ki mannyer Zeova i ed nou pour pardonn kanmarad?

¹² Parfwa i kapab difisil pour pardonn bann ki’n ofans nou oubyen ki’n bles nou santiman. Me avek led lespri sen Bondye, nou kapab pardonn zot. Parey nou’n vwar, Labib i ankouraz nou pour “annan bokou tandres ek lafeksyon” pour kanmarad e pour “travay dir.” Me zis apre sa, i dir: “Gras a lespri sen, annan bokou devouman.” Sa i vedir ki lespri sen Bondye i kapab fer nou devoue e osi annan lantouzyazm pour fer tou sa ki Bondye i anvi nou fer e sa i enkli annan lafeksyon ek tandres pour kanmarad e pardonn kanmarad volonterman. (Vwar not letid dan Romen 12:11.) I pour sa rezon ki nou sipliy Zeova pour ed nou.—Lik 11:13.

I PA DEVRET ANNAN “OKENN DIVIZYON PARMI ZOT”

13. Kwa ki kapab kree divizyon parmi nou?

¹³ Dan kongregasyon, i annan tou sort kalite dimoun ki’n grandi dan diferan fason. (1 Tim. 2:3, 4) Si nou pa fer atansyon, sa bann diferans i kapab kree divizyon ler i annan pour fer avek nou bann swa personnel, par egzanp, konsernan nou laparans ek fason sanze, swen medikal ki nou pou aksepte oubyen divertisman ki nou swazir. (Rom. 14:4; 1 Kor. 1:10) Me vi ki Bondye in ansenny nou pour kontan kanmarad, nou bezwen fer atansyon pour pa promot nou swa personnel konman sa enn ki pli meyer ki pour lezot.—Fili. 2:3.

14. Ki nou devret toultan fer zefor pour fer e akoz?

¹⁴ Nou kapab osi anpese ki i annan divizyon dan kongregasyon par fer zefor pour toultan ankouraz lezot. (1 Tesa. 5:11) Tou resaman, en kantite dimoun ki ti inaktif oubyen ki ti’n ganny tire dan kongregasyon in retournen. Nou byen akeyir zot! (2 Kor. 2:8) Remark sa ki ti arive avek en ser ki ti vin kot Lasal Rwayonm apre ki i ti’n inaktif pour di-z-an. I dir: “Tou dimoun ti sourir avek mwan e donn mwan ponnyendmen.” (Akt 3:19) Ki lefe sa ti annan lo li? I dir: Tousala ti fer mwan santi ki Zeova ti pe ed mwan pour revin zwaye ankor.” Si nou fer zefor pour ankouraz lezot, Kris i kapab servi nou pour ed bann ki “pe rente e fatige” pour reganny lafors.—Mat. 11:28, 29.

15. Ki en lot fason nou kapab ede pour ki i annan linite dan kongregasyon? (Vwar portre.)

¹⁵ En lot fason ki nou kapab ede pour ki i annan linite dan kongregasyon i par sa ki nou dir. Zob 12:11 i dir: “Pa zorey i kapab teste bann parol parey lalang i gout manze?” Zis parey en bon kwizinyen pou toultan gout son manze pour fer sir ki son manze i bon avan ler i donn lezot, nou devret fer sir ki nou reflesir byen lo sa ki nou dir avan ki nou dir li. (Ps. 141:3) Nou anvi toultan fer sir ki sa ki nou pe al dir i ankourazan, i ed lezot pour reganny lafors e i “benefisye sa ki ekoute.”—Efe. 4:29.

16. Lekel ki devret sirtou fer sir ki sa ki zot dir i ankourazan?

¹⁶ Bann msye marye ek bann paran i devret sirtou fer atansyon ki sa ki zot dir e lafason ki zot koze, i ankourazan. (Kol. 3:19, 21; Tit 2:4) Bann ansyen osi i devret fer sir ki konman bann berze, zot rekonfort troupo Zeova e ed troupo Zeova pour reganny lafors. (Iza. 32:1, 2; Gal. 6:1) I annan en proverb dan Labib ki dir: “Pa i bon ler en dimoun i dir en keksoz dan sa bon letan!”—Prov. 15:23.

“MONTRE KI NOU LANMOUR I SENSER PAR NOU AKSYON”

17. Ki mannyer nou kapab fer sir ki sa lanmour ki nou annan pour nou bann frer ek ser i senser?

¹⁷ Zapot Zan ti ankouraz nou pour “kontan lezot pa zis an parol ouswa avek labous, me montre ki nou lanmour i senser par nou aksyon.” (1 Zan 3:18) Nou anvi ki nou lanmour pour nou bann frer ek ser i senser. Ki mannyer nou kapab fer sa? Pli nou pas letan avek nou bann frer ek ser, pli nou pou vin pli pros e sa lanmour ki nou annan pour kanmarad pour vin pli for. Alor kree loportinite pour pas letan avek lezot ki swa kot Lasal Rwayonm oubyen dan predikasyon. Pran letan pour vizit lezot. Ler nou fer sa bann keksoz, nou montre ki Bondye in “ansenny [nou] pour kontan kanmarad.” (1 Tesa. 4:9). Osi nou pou kontinyen eksperyans pour nou menm ki i “bon e agreab pour bann frer reste ansanm dan linite!”—Ps. 133:1.