Lanmour fidel Bondye i dire pour touzour

1-2. Ki problenm en kantite Kretyen i fer fas avek?

IMAZIN en bato lo lanmer pandan en gro tanpet. Sa bato pe monte desann dan gro laroul. Si en dimoun pa larg lank, sa bato pou al kot laroul i anmenn li. Sa lank pou fer sa bato stab e anpes li drive.

² Ler ou pas dan problenm, ou kapab santi parey sa bato. Dan en sans, ou bann lemosyon i kapab monte desann parey sa bato ki pe pas dan en gro tanpet. En zour ou kapab asire ki Zeova i kontan ou e ki i pe ed ou. Me son lannmen ou kapab annan dout konsernan si i vreman vwar sa ki ou pe pas ladan. (Ps. 10:1; 13:1) Petet en zanmi i dir ou bann parol ki ankouraz ou e pour en pe letan, ou santi ou pli byen. (Prov. 17:17; 25:11) Me apre, ou rekonmans annan dout. Ou menm kapab konmans mazinen ki Zeova in abandonn ou. Ki mannyer ou kapab vin parey sa bato ki’n larg son lank pandan en tanpet anmezir ou pe pas dan problenm? Andotmo, ki mannyer ou kapab asire e kontinyen asire ki Zeova i kontan ou e ki i pe ed ou?

3. Ki savedir “lanmour fidel” ki ganny mansyonnen dan Psonm 31:7 ek 136:1 e akoz nou kapab dir ki Zeova i sa pli gran legzanp lanmour fidel? (Vwar portre.)

³ En fason ki nou kapab reste stab ler nou pe pas dan problenm, i pour mazin lanmour fidel Zeova. (Lir Psonm 31:7; 136:1.) Sa term “lanmour fidel” i donn nide en lanmour profon ki dire, ki en dimoun i annan pour en lot. Zeova i sa pli gran legzanp lanmour fidel. Anfet Labib i dir ki Zeova i annan “en kantite lanmour fidel.” (Egz. 34:6, 7) Labib i osi dir konsernan Zeova: “Ou demontre en kantite lanmour fidel pour bann ki priy ou.” (Ps. 86:5) Reflesir lo sa ki sa bann verse pe esey dir: Zeova pa zanmen abandonn son bann serviter fidel. Ler ou gard antet ki Zeova i fidel, sa i kapab fer ou reste stab ler ou pas dan problenm.—Ps. 23:4.

VWAR LANMOUR ZEOVA KONMAN EN LANSENNYMAN DE BAZ

4. Donn legzanp bann lansennyman de baz e eksplike akoz nou vreman krwar ladan.

⁴ En lot fason ki ou kapab reste stab ler ou pe pas dan problenm, i pour vwar lanmour Zeova konman en lansennyman de baz. Kwa ki vin dan ou lespri ler ou tann sa lekspresyon “lansennyman de baz”? Petet ou mazin bann laverite ki ou’n aprann dan Parol Bondye. Par egzanp, ou ti aprann ki Bondye i apel Zeova, ki Zezi i sel Garson Bondye, ki bann mor pa konn nanryen e ki dan lavenir later pou vin en paradi kot bann imen pou viv pour touzour. (Ps. 83:18; Ekle. 9:5; Zan 3:16; Rev. 21:3, 4) Apre ki ou ti’n aksepte sa bann lansennyman, i pa ti fasil pour personn fer ou aret krwar ladan. Akoz? Parski ou ti realize ki sa bann lansennyman i baze lo bann levidans. Aprezan, annou vwar ki mannyer ler nou vwar lanmour Zeova konman en lansennyman de baz, sa i kapab ed nou pour aret krwar ki Zeova pa remark oubyen pa enterese avek sa ki nou pe pas ladan.

5. Ki mannyer en dimoun i rezet bann fo lansennyman? Eksplike.

⁵ Ler ou ti fek etidye Labib, kwa ki ti ed ou pour rezet bann fo lansennyman? I tre probab ki ou ti konpar sa ki ou larelizyon ti’n ansenny ou avek sa ki Labib i ansennyen e sa ti ed ou. Annou vwar en legzanp. Meton ou ti krwar ki Zezi i Bondye Tou Pwisan. Anmezir ki ou ti etidye Labib, ou ti demann ou lekor: ‘Eski sa lansennyman i vre?’ Apre ki ou ti’n egzamin bann levidans ki i annan dan Labib, ou ti vwar ki larepons i non. Apre ou ti nepli krwar dan sa fo lansennyman me dan laverite ki dan Labib, setadir ki Zezi i “premye ne tou kreasyon” e ki i “sa sel Garson Bondye.” (Kol. 1:15; Zan 3:18) Byensir, bann fo lansennyman i kapab “byen anrasinen” e difisil pour detrir. (2 Kor. 10:4, 5) Me enn fwa ki ou ti’n fer sa, ou pa ti rekonmans krwar dan sa bann fo lansennyman.—Fili. 3:13.

6. Akoz ou kapab asire ki “lanmour fidel [Zeova] i dire pour touzour”?

⁶ Ou kapab fer en keksoz en pe parey konsernan sa ki Labib i dir lo lanmour Zeova. Ler ou pe fer fas avek en problenm, si ou konmans annan dout konsernan si Zeova i kontan ou, demann ou lekor: ‘Eski mon pe byen rezonnen?’ Gete si sa ki ou pe mazinen konsernan lanmour Zeova, i parey avek sa ki ganny dir dan Psonm 136:1, ki verse tenm pour sa lartik. Akoz Zeova i dir ki son lanmour i “fidel”? Akoz Psonm 136 i dir ki “son lanmour fidel i dire pour touzour” 26 fwa? Parey nou’n vwar, sa lanmour fidel ki Zeova i annan pour son pep i en lansennyman de baz ki dan Labib e i parey lezot lansennyman de baz ki ou’n aksepte. Sa nide ki Zeova i krwar ki ou napa valer oubyen ki i pa kontan ou, pa vre. Rezet sa mansonz zis parey ou ti pou rezet okenn lezot fo lansennyman.

7. Ki serten verse ki asir nou ki Zeova i kontan nou?

⁷ Dan Labib i annan en kantite levidans ki asir nou ki Zeova i kontan nou. Par egzanp, Zezi ti dir son bann disip: “Zot annan bokou plis valer ki en kantite sren.” (Mat. 10:31) Zeova li menm ti dir avek son pep: “Mon pou fer ou for, wi, mon pou ed ou. Mon pou vreman tyonbo ou avek mon lanmen drwat, mon lanmen ladrwatir.” (Iza. 41:10) Remarke ki sa bann parol i vreman ferm e kler. Zezi pa ti dir ‘Petet ou annan plis valer’ e Zeova pa ti dir ‘Petet mon ava ed ou.’ O kontrer zot dir: “Zot annan bokou plis valer” e “Mon pou ed ou.” Ler ou pe pas dan problenm, si ou annan dout konsernan si Zeova i kontan ou, bann verse koumsa i kapab ed ou pour pa zis santi ki Zeova i kontan ou me i kapab ed ou konnen e asire ki i kontan ou. Sa bann verse i baze lo levidans. Ler ou priye e ou medit lo sa bann verse, sa pou motiv ou pour dir sa bann parol ki dan 1 Zan 4:16: “Nou konnen e nou krwar ki Bondye i kontan nou.”a

8. Ki ou kapab fer si parfwa ou annan dout konsernan si Zeova i kontan ou?

⁸ Ki ou kapab fer si parfwa ou rekonmans annan dout konsernan si Zeova i kontan ou? Konpar sa ki ou pe santi avek sa ki ou konnen. Nou santiman i kapab sanze. Alor nou pa kapab depan lo la. Me bann levidans pa sanze e Labib i donn levidans ki Zeova i kontan nou. Si nou pa krwar ki Zeova i kontan nou, nou pe inyor sa kalite pli enportan ki i annan e sa i lanmour.—1 Zan 4:8.

MEDIT LO SA LAFEKSYON KI ZEOVA I ANNAN POUR OU

9-10. Ki Zezi ti pe esey dir ler i ti dir “Mon Papa li menm i annan lafeksyon pour zot” ki’n ganny rikorde dan Zan 16:26, 27? (Vwar portre.)

⁹ Nou kapab aprann plis konsernan sa lanmour ki Zeova i annan pour nou par medit lo sa ki Zezi ti dir son bann disip: “Mon Papa li menm i annan lafeksyon pour zot.” (Lir Zan 16:26, 27, not.) Zezi pa ti dir sa bann parol zis pour fer son bann disip kontan. Anfet, konteks sa verse i montre ki dan sa moman, Zezi pa ti pe koz konsernan santiman son bann disip. O kontrer i ti pe koz lo en lot keksoz e sa i lapriyer.

¹⁰ Zezi ti’n fek dir son bann disip ki zot pa ti devret priy li me priy an son non. (Zan 16:23, 24) I ti enportan pour zot konn sa. Apre ki Zezi ti’n resisite, bann disip ti’n kapab anvi priy Zezi. Apre tou, zot ti’n aprann konn Zezi e i ti zot zanmi. Zot ti’n kapab krwar ki sa lafeksyon ki Zezi ti annan pour zot, ti pou motiv li pour ekout zot lapriyer e demann son Papa pour ed zot. Me Zezi ti dir ki zot pa devret mazin koumsa. Akoz? Parski i ti dir zot: “Mon Papa li menm i annan lafeksyon pour zot.” Sa laverite i form parti sa lansennyman de baz konsernan lapriyer. Reflesir lo ki sa i vedir pour ou: Atraver ou letid Labib, ou’n aprann konn e kontan Zezi. (Zan 14:21) Me parey bann disip dan premye syek, ou kapab annan konfyans e priy Bondye parski ou konnen ki ‘li menm i annan lafeksyon pour ou.’ Ou montre ki ou krwar sa bann parol sak fwa ki ou koz avek Zeova dan lapriyer.—1 Zan 5:14.

KONPRAN KWA KI FER OU ANNAN DOUT

11. Akoz Satan ti pou kontan si nou annan dout konsernan lanmour Zeova?

¹¹ Kwa ki fer nou annan dout konsernan si Zeova i kontan nou? Petet ou pou dir ki Satan ki fer nou annan dout e dan en sans, sa i vre. Dyab “pe esey devor” nou e i ti pou kontan si nou annan dout konsernan si Zeova i kontan nou. (1 Pyer 5:8, not.) Apre tou, sa lanmour ki Zeova i annan pour nou ti motiv li pour donn sa ranson, en keksoz ki Satan i anvi ki nou santi ki nou pa merite gannyen. (Ebr. 2:9) Lekel ki kontan si nou annan dout konsernan lanmour Zeova? Satan ki pou kontan. Lekel ki pou kontan si nou aret servi Zeova ler nou pas dan problenm? Satan ki ti pou kontan. Satan i anvi ki nou krwar ki Zeova pa kontan nou. An realite, Satan i sa enn ki Zeova pa kontan. Kantmenm sa, enn son bann “taktik” pli rize i pour fer nou santi ki nou ki sa bann ki Zeova pa kontan e ki I’n rezete. (Efe. 6:11, not.) Ler nou realize ki nou lennmi i anvi fer, sa i kapab ed nou pour pli determinen pour “opoz Dyab.”—Zak 4:7.

12-13. Ki mannyer nou lenperfeksyon i kapab fer nou annan dout konsernan si Zeova i kontan nou?

¹² I annan en lot keksoz ki kapab fer nou annan dout konsernan si Zeova i kontan nou. Ki sa lot keksoz? Sa i sa lenperfeksyon ki nou’n erite. (Ps. 51:5; Rom. 5:12) Pese in elwanny bann imen avek zot Kreater. I’n osi andomaz zot lespri, leker ek lekor.

¹³ Pese i annan en move lefe lo nou lemosyon. I fer nou santi nou koupab, enkyet, per e onte. Petet nou santi koumsa ler nou fer en pese. Me nou osi kapab santi koumsa parski nou konsyan nou enparfe e sa i pa lafason ki Bondye ti kree bann imen o konmansman. (Rom. 8:20, 21) Zis parey en transpor ki son larou in flak pa kapab fonksyonn byen, konman bann imen enparfe, nou pa kapab fonksyonn parey nou’n ganny kree pour fonksyonnen. Alor nou pa sirprann ki parfwa nou annan dout konsernan si Zeova i kontan nou. Si sa i arive, nou devret gard antet ki Zeova i “sa Bondye ki gran e enpresyonan, . . . [ki] demontre lanmour fidel anver bann ki kontan [li] e ki obeir [son] bann komannman.”—Nee. 1:5.

14. Ki mannyer ler nou medit lo sa ranson, sa i ed nou pour rezet sa nide ki Zeova pa pou zanmen kontan nou? (Romen 5:8) (Vwar bwat “Vey byen ‘pouvwar pese ki anbet dimoun.’”)

¹⁴ Parfwa nou kapab santi ki nou pa merit lanmour Zeova. An realite nou pa merite me sanmenm sa ki fer son lanmour pli spesyal. I napa nanryen ki nou kapab fer pour nou merit lanmour Zeova. Kantmenm sa, sa ranson i kouver nou pese e Zeova in fer sa provizyon parski i kontan nou. (1 Zan 4:10) Rapel ki Zezi in vini pour sov bann dimoun ki fer pese e pa pour bann dimoun parfe. (Lir Romen 5:8.) I napa personn ki kapab fer keksoz dan en fason parfe e Zeova pa ekspekte sa. Ler nou konpran ki nou lenperfeksyon i kapab fer nou annan dout konsernan si Zeova i kontan nou, sa i kapab fer nou pli determinen pour lager avek sa bann dout.—Rom. 7:24, 25.

SWAZIR POUR RESTE FIDEL

15-16. Si nou anvi reste fidel avek Zeova, ki nou kapab asire e akoz? (2 Samyel 22:26)

¹⁵ Zeova i anvi ki nou fer sa bon desizyon pour “reste atase avek li.” (Det. 30:19, 20) Si nou fer sa, nou kapab asire ki i pou reste fidel avek nou. (Lir 2 Samyel 22:26.) Tan ki nou reste fidel avek Zeova, nou kapab asire ki i pou ed nou dan nenport sityasyon ki nou pas ladan.

¹⁶ Parey nou’n vwar, nou annan en kantite rezon pour nou reste stab ler nou pas dan problenm. Nou konnen ki Zeova i kontan nou e i pou ed nou. Sanmenm sa ki Labib i ansennyen. Si nou annan dout konsernan si i kontan nou, nou kapab medit lo sa ki nou konnen olye konsantre lo sa ki nou santi. Nou anvi kontinyen asire ki lanmour fidel Zeova i dire pour touzour zis parey Labib i dir.