Liv Zob i kapab ed ou ler ou pe soufer

1-2. Ki serten rezon akoz i vo lapenn lir liv Zob?

ESKI ou’n lir liv Zob resaman? Menm si i’n ganny ekrir apepre 3,500 an pase, en kantite dimoun i konsider li konman enn bann liv ki’n pli byen ganny ekrir. Dimoun i felisit ekriven sa liv parski i’n servi bann zoli parol ki pwisan e ki fasil pour konpran. Moiz i sa zonm ki’n ekri sa liv me Zeova ki Loter.—2 Tim. 3:16.

² Liv Zob i en liv enportan dan Labib. Akoz? En rezon i akoz i koz lo sa keksoz enportan ki enteres bann lanz ek bann imen e sa i sanktifikasyon non Zeova. I osi ansenny nou konsernan bann zoli kalite ki Zeova i annan parey lanmour, lasazes, lazistis ek pwisans. Par egzanp, liv Zob i refer avek Zeova konman “Tou Pwisan” 31 fwa e sa i plis ki tou lezot liv ansanm. Liv Zob i donn larepons pour plizyer kestyon enportan enkli sa enn ki fatig en kantite dimoun e sa i: Akoz Bondye i permet soufrans?

3. Ki byenfe nou kapab gannyen ler nou etidye liv Zob?

³ Nou kapab konpar lir liv Zob avek ler nou mont en montanny. Ler ou anler lo en montanny, ou kapab vwar otour ou byen. Ler nou lir liv Zob, nou kapab vwar lafason ki Zeova i konsider soufrans. Annou vwar ki mannyer liv Zob i kapab ed nou ler nou soufer. Nou pou vwar ki mannyer zistwar Zob ti’n kapab ed bann Izraelit e ki mannyer i kapab ed nou ozordi. Nou pou osi vwar ki mannyer nou kapab servi sa liv pour ed lezot.

BONDYE TI LES ZOB SOUFER

4. Kwa ki ti fer Zob diferan avek bann Izraelit ki ti pe reste Lezip?

⁴ Pandan sa letan ki bann Izraelit ti pe soufer konman bann lesklav Lezip, i ti annan en zonm ki ti apel Zob ki ti reste dan pei Ouz. I kapab ki Ouz ti sitye les avek Later Promiz kekpar dan nor avek Arabi. Zob pa ti fer parey bann Izraelit ki ti’n konmans ador bann zidol Lezip. I ti fidel avek Zeova. (Zoz. 24:14; Ezek. 20:8) Zeova ti dir konsernan Zob: “Napa personn lo later ki parey li.”a (Zob 1:8) Zob ti vreman ris e i ti sa dimoun pli enportan parmi tou bann dimoun ki ti reste dan sa rezyon. (Zob 1:3) I bezwen ki Satan ti ankoler ler i ti vwar Zob, ki ti en zonm ki en kantite dimoun ti konnen e ki ti byen ganny respekte, pe servi Zeova fidelman.

5. Akoz Zeova ti les Zob soufer? (Zob 1:20-22; 2:9, 10)

⁵ Satan ti dir ki Zob ti pou aret servi Zeova si i ti soufer. (Zob 1:7-11; 2:2-5) Menm si Zeova ti kontan Zob en kantite, sa ki Satan ti’n dir ti lev bann kestyon enportan. Alor Zeova ti les Satan esey montre si sa ki i ti pe dir ti vre. (Zob 1:12-19; 2:6-8) Satan ti pran bann zannimo Zob, i ti touy son dis zanfan e i ti fer Zob ganny bann klou vreman fermal depi son latet ziska son lipye. Menm si Satan ti fer Zob soufer en kantite, Zob ti reste fidel. (Lir Zob 1:20-22; 2:9, 10.) Pli tar Zeova ti geri Zob, redonn li son larises, fer li reganny son bon repitasyon e i ti donn Zob ankor dis zanfan. Zeova ti fer mirak e fer Zob viv pour ankor 140 an. Sa ti fer ki Zob ti vwar son bann pti zanfan ek pti zanfan son bann pti zanfan. (Zob 42:10-13, 16) Ki bann serviter Bondye dan lepase ti’n kapab aprann avek sa resi e ki nou kapab aprann ozordi?

6. Ki byenfe bann Izraelit ti pou’n gannyen si zot ti konnen akoz Bondye i permet soufrans? (Vwar portre.)

⁶ Ki byenfe bann Izraelit ti’n kapab gannyen? Lavi bann Izraelit pa ti fasil ler zot ti pe reste Lezip. Par egzanp, ler Zozye ek Kaleb ti pe grandi Lezip, zot ti bann lesklav. Apre sa, menm si i pa ti zot lafot, zot ti reste dan dezer pour 40 an. Si bann Izraelit sa letan ti konn konsernan bann problenm ki Zob ti pas ladan e lafason ki Zeova ti rekonpans li, san dout sa ti ed zot ek zot bann desandans pour konpran lekel ki vreman responsab pour soufrans. Zot ti osi pli byen konpran akoz Bondye i permet soufrans e ki i kontan bann ki reste fidel avek li menm ler i difisil.

7-8. Ki mannyer liv Zob i kapab ed bann parmi nou ki pe soufer? Donn en legzanp.

⁷ Ki byenfe nou kapab gannyen? Malerezman, en kantite dimoun ozordi nepli krwar dan Bondye parski zot pa kapab konpran akoz bann move keksoz i arive avek bann bon dimoun. Annou vwar legzanp Hazelb ki reste Rwannda. Ler i ti ankor zenn, i ti krwar dan Bondye me apre keksoz ti sanze. Son paran ti divorse e sa ti fer ki i ti grandi avek en boper ki pa ti tret byen. Ler i ti adolesan, i ti ganny vyole. Hazel ti al kot son legliz pour ganny rekonfor me i pa ti gannyen. Pli tar, Hazel ti ekri en let pour Bondye e dan sa let i ti dir: “Bondye, mon’n priy ou, mon’n esey fer sa ki byen me ou’n repey mwan avek sa ki mal. Aprezan mon pe kit ou e mon pe plàn fer sa ki fer mwan kontan.” Nou leker i fermal pour bann dimoun parey Hazel ki’n ganny dir bann mansonz konsernan Bondye e ki aprezan zot krwar ki Bondye ki responsab pour zot soufrans.

⁸ Par kont, nou ozordi nou’n aprann avek sa resi dan liv Zob ki pa Bondye ki fer nou soufer me Satan ki responsab. Nou’n osi aprann ki nou pa devret krwar ki ler en dimoun i soufer, i pe rekolte sa ki i’n senmen. Labib i dir ki “letan ek levennman ki dimoun pa pe ekspekte” i kapab ariv avek nenport ki, nenport ler. (Ekle. 9:11; Zob 4:1, 8) Nou’n osi aprann ki si nou reste fidel avek Zeova menm ler nou pas dan problenm, nou donn Zeova loportinite pour montre ki Satan i en manter e sa i ede pour defann Son repitasyon. (Zob 2:3; Prov. 27:11) Nou rekonesan ki nou’n aprann sa bann keksoz parski sa in ed nou pour konn laverite konsernan akoz nou ek bann dimoun ki nou kontan i soufer. Pli tar, Hazel ti etidye Labib avek Temwen Zeova e i ti konpran ki pa Bondye ki ti’n fer li soufer. I dir: “Mon ti priy Bondye ankor e mon ti devid mon leker avek li. Mon ti dir Zeova ki ler mon ti dir li ki mon pe kit li, mon pa ti vreman anvi fer sa. Apre tou, mon pa ti vreman konn li. Me aprezan, mon konpran ki Zeova i kontan mwan e mon ere.” Nou vreman rekonesan pour konnen akoz Bondye i permet soufrans. Aprezan, annou vwar ki mannyer sa resi konsernan Zob i kapab ed nou ler nou pe pas dan problenm.

KI MANNYER SA RESI KONSERNAN ZOB I KAPAB ED NOU POUR ANDIRE?

9. Ki Zob ti fer ler i ti pe soufer? (Zak 5:11)

⁹ Imazin Zob pe asize li tousel dan lasann. Lo li i annan en kantite boubou e i’n kourbe akoz i dan douler. I’n meg, son lapo in nwanr akoz sa maladi e i ti pe deplise. Zob i fatige e i napa lafors pour fer nanryen apard grat son lekor avek bann bout resipyan e konplent konsernan son soufrans. Me Zob pa pe zis sirviv, i pe andire. (Lir Zak 5:11.) Kwa ki ti ed Zob pour andire?

10. Ki kalite lanmitye Zob ti annan avek Zeova? Eksplike.

¹⁰ Zob ti dir Zeova egzakteman ki mannyer i ti pe santi. (Zob 10:1, 2; 16:20) Par egzanp, dan sapit 3 dan liv Zob, nou vwar ki Zob ti konplent konsernan bann problenm ki i ti’n pas ladan ki i ti krwar ki Zeova ki responsab. Apre sa, Zob ti fer plizyer deba avek son trwa zanmi kot i ti kontinyen ensiste ki i’n reste fidel e souvan son bann larepons ti ganny adrese avek Zeova. Sa ki Zob ti dir i montre ki pour en serten letan, i ti krwar ki i pli drwat ki Bondye. (Zob 10:1-3; 32:1, 2; 35:1, 2) Me i ti admet ki parfwa i ti “koze san reflesir” parski i ti pe esey montre ki i’n reste fidel avek Bondye. (Zob 6:3, 26) Dan sapit 31, nou lir ki Zob ti dir ki i anvi ki Bondye i dir ki i inosan. (Zob 31:35) Byensir, i ti mal pour Zob anvi ki Bondye i reponn li direkteman konsernan akoz i pe soufer.

11. Ki mannyer Zeova ti reazir konsernan sa ki Zob ti dir ler i ti pe defann son lekor?

¹¹ Ozordi nou kapab konpran ki lafason ki Zob ti koz avek Zeova i montre ki i ti annan en bon lanmitye avek Zeova e ki i ti annan konfyans ki Zeova ti pou vwar ki i ti’n reste fidel. Ler Zeova ti finalman reponn Zob dan en tanpet divan, i pa ti donn bann detay konsernan bann rezon akoz Zob ti’n soufer. Menm si Zob ti’n konplent, Zeova pa ti kondann li oubyen menm koz lo lefet ki Zob ti’n dir ki i inosan. Me Zeova ti ansenny Zob parey en papa i ansenny son garson e sa ti en bon fason fer. Sa ti fer ki Zob ti demontre limilite e rekonnet ki i pa ti konn bokou keksoz e i ti repantir pour bann keksoz ki i ti’n dir san reflesir. (Zob 31:6; 40:4, 5; 42:1-6) Ki bann dimoun dan lepase ti’n kapab aprann avek sa resi e ki nou kapab aprann ozordi?

12. Ki mannyer sa resi konsernan Zob ti’n kapab ed bann Izraelit?

¹² Ki byenfe bann Izraelit ti’n kapab gannyen? Bann Izraelit ti’n kapab aprann avek sa ki ti’n arive avek Zob. Annou vwar legzanp Moiz. I ti fer fas avek en kantite difikilte, dezapwentman ek dekourazman pandan ki i ti pe diriz nasyon Izrael. Moiz pa ti parey bann Izraelit ki ti rebel. I ti koz avek Zeova lo son bann problenm, tandis ki bann Izraelit ti souvan konplent lo Zeova. (Egz. 16:6-8; Nom. 11:10-14; 14:1-4, 11; 16:41, 49; 17:5) Moiz ti osi bezwen andire ler Zeova ti disiplin li. Par egzanp, pandan ki bann Izraelit ti pe kanpe Kades, Moiz ti “koz san reflesir” e i pa ti glorifye non Zeova. I kapab ki sa ti ariv dan sa karantyenm lannen ki zot ti pe marse dan dezer, zis avan zot antre dan Later Promiz. (Ps. 106:32, 33) Sa ti fer ki Zeova pa ti permet Moiz pour antre dan Later Promiz. (Det. 32:50-52) I bezwen ki sa ti fermal pour Moiz me i ti demontre limilite e aksepte sa disiplin ki Zeova ti’n donn li. Sa resi konsernan Zob ti’n kapab ed desandans bann Izraelit pour andire ler zot pas dan problenm. Bann ki fidel ti pou’n kapab medit lo sa resi e aprann ki mannyer pour eksprim zot santiman avek Zeova e pa rod leskiz pour zot aksyon. Zot ti pou’n osi aprann ki mannyer pour demontre limilite e aksepte disiplin Zeova.

13. Ki mannyer sa resi konsernan Zob i ed nou pour andire? (Ebre 10:36)

¹³ Ki byenfe nou kapab gannyen? Konman bann Kretyen, nou osi nou bezwen landirans. (Lir Ebre 10:36.) Par egzanp, serten parmi nou i vreman malad oubyen pe soufer akoz nou ganny depresyon ouswa nou annan en problenm dan fanmir, en dimoun ki nou kontan in mor oubyen nou annan en lot problenm grav. Parfwa bann komanter oubyen aksyon lezot i kapab fer li pli difisil pour andire. (Prov. 12:18) Me liv Zob i ansenny nou ki nou kapab eksprim nou santiman pli profon avek Zeova e annan konfyans ki i pou ekout nou. (1 Zan 5:14) I pa pou kondann nou si parfwa nou “koze san reflesir,” parey Zob ti fer. O kontrer Bondye pou donn nou sa lafors ek lasazes ki nou bezwen pour andire. (2 Kron. 16:9; Zak 1:5) I osi kapab disiplin nou dan sa fason apropriye parey i ti fer avek Zob. Liv Zob i osi ansenny nou ki mannyer pour andire si nou ganny disiplinen oubyen ganny konsey sorti dan Parol Zeova, kot Son lorganizasyon oubyen avek bann zanmi ki matir. (Ebr. 12:5-7) Zis parey Zob ti ganny bann byenfe ler i ti demontre limilite e aksepte disiplin, nou osi nou kapab ganny bann byenfe ler nou les nou ganny disiplinen. (2 Kor. 13:11) Sa i bann leson enportan ki nou kapab aprann dan liv Zob. Aprezan annou vwar ki mannyer nou kapab servi liv Zob pour ed lezot.

SERVI LIV ZOB POUR ED LEZOT

14. Ki en fason ki nou kapab eksplik dimoun dan predikasyon konsernan akoz nou soufer?

¹⁴ Eski ou’n deza zwenn en dimoun dan predikasyon ki’n demann ou akoz dimoun i soufer? Ki mannyer ou ti reponn? I kapab ki ou ti eksplik li sa ki Labib i dir ti arive dan zarden Edenn. Ou ti konmans par koz lo Satan, en move lanz ki ti dir sa premye koup imen en mansonz e sa ti fer zot rebel kont Bondye. (Zen. 3:1-6) Petet apre ou ti eksplik li ki dimoun i soufer e mor akoz Adan ek Ev ti dezobei Bondye. (Rom. 5:12) Apre, ou ti eksplik li ki Bondye pe les ase letan pase pour montre ki sa ki Satan in dir pa vre e pour ki dimoun i tann sa bon nouvel konsernan lefet ki dan lavenir, bann imen pou vin parfe. (Rev. 21:3, 4) Sa i en bon fason pour reponn sa kestyon e i kapab ki ou ganny bann bon rezilta.

15. Ki mannyer nou kapab servi liv Zob pour ed en dimoun ki demande akoz dimoun i soufer? (Vwar portre.)

¹⁵ En lot fason ki nou kapab eksplik dimoun konsernan akoz nou soufer, i par servi liv Zob. Ou kapab konmans par felisit sa dimoun parski i’n demann en bon kestyon. Apre ou kapab koz konsernan Zob, en zonm fidel ki ti soufer en kantite e ki ti demann en kestyon en pe parey. Zob ti menm krwar ki dan en serten fason, Bondye ki ti pe fer li soufer. (Zob 7:17-21) Sa dimoun i kapab enpresyonnen pour aprann ki depi byen lontan, dimoun i anvi konnen akoz nou soufer. Apre, ou kapab eksplike ki pa Bondye ki ti pe fer Zob soufer me Dyab ki ti responsab. Dyab ti fer sa pour montre ki bann imen i servi Bondye zis pour bann rezon egois. Ou kapab osi dir ki menm si Bondye pa ti fer Zob soufer, i ti les Zob soufer e sa i montre ki Bondye i annan konfyans ki bann imen fidel ti pou montre ki Satan i en manter. Apre ou kapab eksplike ki pli tar, Bondye ti beni Zob akoz i ti reste fidel. Alor, nou kapab rekonfort lezot par asir zot ki i pa Zeova ki fer imen soufer.

16. Donn en leksperyans ki montre ki mannyer liv Zob i kapab ed en dimoun ki pe soufer.

¹⁶ Annou vwar ki mannyer liv Zob ti ed Mario. En zour an 2021, en ser ti pe fer predikasyon par telefonn. Sa premye fwa ki sa ser ti koz avek Mario, i ti lir en verse e i ti eksplike ki Bondye pa zis ekout nou lapriyer me i osi ofer nou en bon lavenir ek en lespwar. Ler sa ser ti demann Mario ki i panse lo sa verse, Mario ti dir li ki ler i ti call, i ti pe ekri en let pour son fanmir parski i ti pe al swiside. I ti dir: “Mon krwar dan Bondye me bomaten mon ti pe mazinen si Bondye pa’n abandonn mwan.” Sa dezyenm fwa ki sa ser ti call, zot ti koz lo Zob e lafason ki i ti soufer. Mario ti deside ki i bezwen lir liv Zob antye. Alor, sa ser ti anvoy li en link pour li lir Labib–Tradiksyon nouvo lemonn. Ki ti arive apre? Mario ti aksepte en letid Labib e i ti eksite pour aprann konsernan sa Bondye ki kontan li e ki’n demontre lentere dan li.

17. Akoz ou rekonesan ki Zeova in enkli liv Zob dan Son Parol? (Zob 34:12)

¹⁷ I kler ki Parol Bondye i annan sa pouvwar pour ed dimoun enkli bann ki pe soufer. (Ebr. 4:12) Nou vreman rekonesan ki Zeova in enkli sa resi konsernan Zob dan Son Parol. (Zob 19:23, 24) Liv Zob i montre nou ki “sirman, Bondye pa fer sa ki mal.” (Lir Zob 34:12.) I osi ansenny nou akoz Bondye i permet soufrans e ki mannyer nou kapab andire ler nou soufer. Sa liv i osi ed nou pour konsol bann ki pe soufer. Dan sa lartik ki swiv, nou pou vwar ki mannyer liv Zob i kapab ed nou ler nou pe donn konsey.