En vaz avek lasann en dimoun mor o bor portre sa dimoun

Ki Labib i dir konsernan bril lekor mor?

Sa ki Labib i dir

Labib pa donn okenn lenstriksyon konsernan bril lekor. I napa okenn lalwa ki koz lo bril lekor oubyen anter en dimoun.

Labib i koz lo serten serviter fidel Bondye ki ti anter zot bann defen. Par egzanp, Abraam ti fer sa ki neseser pour rod en landrwa pour anter son madanm, Sara.—Zenez 23:2-20; 49:29-32.

Labib i osi dir ki serten dimoun ki ti fidel avek Bondye ti bril lekor zot bann defen. Par egzanp, ler lerwa Izrael, Sail ek son trwa garson ti mor pandan lager, zot lekor ti reste dan teritwar zot lennmi e bann dimoun ti mank respe pour zot. Ler bann gerye Izraelit ki ti fidel ti tande ki ti pe arive, zot ti al sers lekor Sail ek son bann garson, bril zot e apre anter zot lezo. (1 Samyel 31:8-13) Labib i montre ki sa bann gerye ti’n fer en bon keksoz.—2 Samyel 2:4-6.

Serten fo krwayans konsernan bril lekor

Fo krwayans: I en mank respe pour bril lekor.

Laverite: Labib i dir ki ler en dimoun i mor, i revin lapousyer. Sa i en prosesis natirel kot lekor en dimoun mor i dekonpoze. (Zenez 3:19) Ler i ganny brile, lekor sa dimoun i vin lasann oubyen lapousyer pli vitman.

Fo krwayans: Dan letan Labib, zis bann dimoun ki ti napa laprouvasyon Bondye ki ti ganny brile apre ki zot ti’n mor.

Laverite: Lekor serten dimoun ki pa ti fidel avek Bondye ti ganny brile. Sa ti leka pour Akan ek son fanmir. (Zozye 7:25) Par kont, sa ti en leksepsyon, pa en lareg. (Deterononm 21:22, 23) Parey nou ti vwar pli boner, lekor serten dimoun ki ti fidel avek Bondye ti ganny brile. Sa ti arive avek garson Lerwa Sail, Zonatan.

Fo krwayans: Bondye pa kapab resisit en dimoun ki son lekor in ganny brile.

Laverite: Pour Bondye resisit en dimoun, i pa enportan si son lekor in ganny antere, brile, perdi lo lanmer oubyen si i’n ganny manze par bann zannimo. (Revelasyon 20:13) Bondye Tou Pwisan i kapab fasilman rekree en nouvo lekor pour en dimoun ki’n mor.—1 Korentyen 15:35, 38.

Bril lekor oubyen antere?

Ler ou pe deside ki pour fer avek lekor ou defen, pran an konsiderasyon sa bann pwen swivan.

Sa ki sa defen ti anvi. Labib i montre ki bann fanmir ti respekte lenstriksyon ki en dimoun ti donnen konsernan son lanterman.—Zenez 50:4, 5; Egzod 13:19.
Bann koutim lokal. Souvandfwa dimoun i pran konsiderasyon bann koutim lokal konsernan bann lanterman. (Zan 19:40) Par egzanp, dan letan Labib, normalman dimoun ti anter zot bann defen. (Zenez 49:31; 1 Samyel 28:3) Pareyman, ozordi en dimoun i kapab swazir pour swiv bann koutim lokal me i bezwen fer sir ki sa bann koutim pa kas okenn prensip Labib.
Lalwa sa pei. Labib i ankouraz nou pour obei lalwa gouvernman. (Romen 13:1) Dan serten pei, i annan lalwa konsernan ki pour fer avek lekor dimoun mor. Par egzanp, serten lotorite i met bann restriksyon konsernan kote pour met lasann bann dimoun mor.
Santiman lezot. Labib i ankouraz nou pour met lentere lezot avan sa ki pour nou. (Filipyen 2:4) Ler nou pe fer bann desizyon konsernan ki pour fer avek lekor en dimoun mor, demann nou lekor sa bann kestyon swivan: Ki mannyer bann manm fanmir i santi konsernan bril lekor oubyen anter sa dimoun ki’n mor? Ki mannyer dimoun dan kominote i santi konsernan bril lekor?