BANN ZENN I DEMANDE
Ki mannyer mon kapab servi byen mon letan?
Akoz ou devret servi byen ou letan?
Letan i parey larzan. Si ou gaspiy li, ou pou napa ler ou pou byen bezwen li. De lot kote, si ou kalkil byen ou letan, ou pou annan letan de kote pour fer bann keksoz ki ou vreman kontan!
Prensip Labib: “Dezir sa enn ki pares pa zanmen abouti; me sa enn ki travay dir i realiz tou sa ki i anvi.”—Proverb 13:4.
A lafen dizour: Kan ou servi byen ou letan, ou pou ganny plis laliberte, pa mwens.
Aprann servi byen ou letan i en abilite ki pou enportan ler ou vin en adilt. I menm kapab fer en diferans ler ou konmans travay. Meton tanzantan ou ariv tar travay, eski ou anplwaye pou gard ou? Si sa biznes ti pour ou, eski ou ti pou gard en anplwayer ki toultan ariv an retar?
Prensip Labib: “Sa enn ki fidel dan sa ki mwen enportan pou osi fidel dan sa ki enportan.”—Lik 16:10.
A lafen dizour: Ou abilite pour servi byen ou letan pou fer lezot konnen ki kalite dimoun ou ete.
Me an realite, i pa fasil pour servi byen letan. Annou vwar serten lobstak.
Lobstak #1: Zanmi
“Si mon bann zanmi i demann mwan pour al marse avek zot, preski toultan mon ale menm si mon pa vreman annan letan. Mon mazinen, ‘Ler mon monte mon ava fer mon louvraz en pti moman.’ Me i pa toultan marse e parfwa mon ganny en bon pe problenm akoz sa.”—Cynthia.
Lobstak #2: Distraksyon
“Televizyon i parey en vacuum cleaner. I ris ou latansyon avek tou son bann progranm ek film e i pa fasil pour reziste.”—Ivy.
“Mon kapab pas plizyer erdtan lo mon tablet. Mon santi mwan koupab ler sa sel rezon ki mon aret servi li i ler batri in desarze.”—Marie.
Lobstak #3: Tandans pour anvoy pour pli tar
“Mon pa fer mon devwar lekol oubyen okenn keksoz deswit. Mon gaspiy mon letan dan bann keksoz bet ziska ki i’n ariv sa dernyen moman pour fini mon travay. I pa sa pli bon fason pour servi mon letan.”—Beth.
Ler ou servi byen ou letan, ou pou ganny plis laliberte, pa mwens.
Ki ou kapab fer?
Fer en lalis tou sa ki ou bezwen fer. Ekri par egzanp ou bann louvraz lakour ek devwar lekol. Ekri ki kantite letan ou bezwen normalman pour konplet sak sa bann keksoz dan en semenn.
Prensip Labib: “Verifye sa ki pli enportan.”—Filipyen 1:10.
Ekri bann aktivite ki ou ti a kontan fer dan ou letan lib. Sa i kapab enkli al lo rezo sosyal e get televizyon. Pour sa enn osi, ekri konbyen letan ki ou pase dan sak sa bann aktivite par semenn.
Prensip Labib: “Kontinyen viv dan en fason saz . . . , servi byen zot letan.”—Kolosyen 4:5.
Fer en plan. Get sa de lalis ankor enn fwa. Eski ou annan ase letan pour fer bann aktivite ki enportan? Eski ou bezwen pran en pe letan dan bann aktivite lwazir pour konplet sa ki pli enportan?
Sizesyon: Fer en lalis bann keksoz ki ou bezwen fer sak zour e met en tik o bor sak keksoz ler ou’n konplet zot.
Prensip Labib: “Plan sa enn ki aktif i fer li vin ris.”—Proverb 21:5.
Konplet sa ki ou konmanse. I vre, defwa ou pou bezwen refiz en aktivite avek ou bann zanmi pour ki ou kapab fer en keksoz ki pli enportan. Me avek letan, ou pou remarke ki ou annan plis letan e ou pou pli apresye sa bann moman.
Prensip Labib: “Travay dir, pa bezwen fer pares.”—Romen 12:11.
Rekonpans ou lekor, me pa avan ler. En fiy ki apel Tara i dir: “Defwa mon fer de keksoz lo mon lalis ‘keksoz pour fer’ apre mon dir, ‘Oke, mon kapab get televizyon pour 15 minit apre mon ava fini fer larestan.’ Me sa 15 minit i vin 30, 30 minit i vin 1 erdtan e san realize, mon’n gaspiy 2 erdtan zis devan televizyon.”
Ki solisyon? Konsider get televizyon konman en rekonpans apre ki ou’n konplet ou bann travay, pa konman en keksoz ki ou devret fer.
Prensip Labib: En “bon keksoz pour en [dimoun] fer, se . . . war rezilta son travay.”—Eklezyast 2:24.