Eski larzan i rasin tou sort move keksoz?

Sa ki Labib i dir

Labib pa dir ki larzan i en move keksoz e i pa ni menm dir ki larzan i responsab pour tou keksoz mal ki arive. Sa lekspresyon “larzan i rasin tou sort move keksoz” i kapab konfiz serten dimoun akoz i pa konplet. Labib i plito dir ki “lanmour pour larzan i rasin tou sort move keksoz.”—1 Timote 6:10.

Ki Labib i dir konsernan larzan?

Labib i dir ki si nou byen servi larzan, i kapab itil e i menm kapab vin en “proteksyon.” (Eklezyast 7:12, NWT) An plis, Labib i an faver bann ki demontre zenerozite anver lezot. Sa i kapab enkli donn larzan en dimoun.—Proverb 11:25.

An menm tan, Labib i averti nou pour pa les larzan vin sa keksoz pli enportan dan nou lavi. Labib i dir: “Montre dan zot fason viv ki zot pa kontan larzan e kontant zot avek sa ki zot annan.” (Ebre 13:5) Sa ki nou aprann, i ki nou devret servi byen larzan e pa tay deryer larises. Plito nou bezwen aprann kontant nou avek sa ki nou vreman bezwen parey manze, lenz ek en landrwa reste.—1 Timote 6:8.

**Akoz Labib i averti nou konsernan lanmour pour larzan?**

Bann dimoun ki voras pa pou ganny lavi eternel. (Efezyen 5:5) En rezon i akoz vorasite i en form idolatri oubyen fo ladorasyon. (Kolosyen 3:5) En lot rezon i ler zot pe esey akonpli zot dezir, bann ki voras i souvan aret viv dapre bann bon prensip. Proverb 28:20 i dir: “Sa enn ki prese pour vin ris, pou ganny pini en zour.” Zot kapab menm ganny tante pour komet bann krim, parey blackmail dimoun, vole, fer frod, kidnap e menm touy dimoun.

Menm si lanmour pour larzan pa fer en dimoun annan en move kondwit, i kapab anmenn bann move konsekans. Labib i dir ki “sa bann ki determinen pour vin ris i tonm dan tantasyon ek pyez ensi ki bann dezir bet e danzere.”—1 Timote 6:9.

Ki byenfe nou kapab gannyen avek konsey Labib ki i donnen konsernan larzan?

Si nou pa les larzan fer nou fer bann keksoz ki Bondye pa kontan, nou pou annan respe pour nou lekor e osi nou pou ganny faver ek sipor Bondye. Bondye i promet bann ki senserman esey fer li plezir: “Mon pa pou zanmen kit ou e mon pa pou zanmen abandonn ou.” (Ebre 13:5, 6) I osi asir nou ki “sa enn ki fidel pour ganny bokou benediksyon.”—Proverb 28:20.

Bann verse Labib ki koz lo larzan

Eklezyast 7:12 (NWT): “Larzan i en proteksyon.”

Ki i vedir: Ler nou servi byen larzan, i kapab benefisye nou akoz i donn nou en serten degre sekirite.

Lik 12:15: “Menm ler en dimoun i annan en kantite keksoz, pa sa bann keksoz ki donn li lavi.”

Ki i vedir: Larzan i pa sa keksoz pli enportan dan lavi e i pa pou sov nou lavi.

1 Timote 6:10: “Lanmour pour larzan i rasin tou sort move keksoz e pour satisfer sa lanmour, serten in perdi zot lafwa e zot in sibir en kantite douler.”

Ki i vedir: Larzan li menm i pa move. Me bann dimoun ki kontan larzan e ki fer li vin sa keksoz pli enportan dan zot lavi, pou ganny bokou problenm parey fanmir kase ek move lasante akoz zot travay tro bokou pour ganny larzan.

Ebre 13:5: “Montre dan zot fason viv ki zot pa kontan larzan e kontant zot avek sa ki zot annan.”

Ki i vedir: Dan plas tay deryer larzan san reflesir lo konsekans, nou ganny ankouraze pour kontant nou avek sa ki nou annan.

Matye 19:24: “I pli fasil pour en samo pas dan trou en zegwir ki pour en zonm ris antre dan Rwayonm Bondye.”

Ki i vedir: Zezi ti’n fek envit en zonm ris pour swiv li. Sa zonm ti refize akoz i ti tro atase avek sa ki i ti posede. Alor Zezi ti pe donn en lavertisman. En dimoun ki met larises avan Bondye i kapab pa ganny lavi eternel.