Ki mannyer paran i kapab donn gidans zot zanfan?

• Sa ki ou devret konnen

• Sa ki ou kapab fer

• Sa ki bann paran i dir

Sa ki ou devret konnen

Dan serten kiltir ozordi, zanfan i pros avek zot paran e zot al kot zot paran pour rod gidans. Me dan lezot kiltir zanfan i souvan rod gidans avek zot zanmi.

Dan sa dezyenm ka, sa i afekte lotorite bann paran. Anfet, dek ki zanfan i vin adolesan, paran i kapab santi ki zot in perdi kontrol lo zot. Osi, ler zanfan i pas bokou letan avek lezot zenn, i konmsi zot pe elve kanmarad dan plas ganny elve par zot paran.

Akoz i pli fasil pour bann zenn vin pli pros avek zot zanmi ki avek zot paran. Annou reflesir lo sa bann fakter swivan.

• Lekol. Ler bann zanfan i pas plis letan avek kanmarad, zot vin pli pros antre zot e zot kapab konmans vwar lopinyon zot zanmi pli enportan ki lopinyon zot paran. Bann zanfan i santi koumsa plis ankor ler zot vin adolesan.

  

• En ptigin letan ansanm. Dan bokou fanmir, ler zanfan i sorti lekol, napa personn kot lakour. Petet en paran oubyen tou le de i travay.

• Dan zot prop lemonn. Ler zot ariv dan laz adolesan, bann zenn i antre dan zot prop lemonn kot i annan zot prop lareg, sa i enkli ki mannyer pour abiye, sanze e konport zot. Sa ki zot kanmarad i mazinen lo zot i souvan pli enportan ki sa ki zot paran i mazin lo zot.

• Biznes. Bokou biznes i kree bann prodwi oubyen detant zis pour bann zenn e sa i ede pour fer zanfan pli dekoste ankor avek zot paran. En dokter ki apel Robert Epstein i dir: “Si lemonn bann zenn i disparet sa kantite biznes ki pe fer plizyer bilyon dolar pou disparet osi.”a

Sa ki ou kapab fer

• Gard en bon relasyon avek ou zanfan.

  Labib i dir: “Sa bann parol ki mon pe dir ou ozordi i bezwen dan ou leker, ou bezwen fer zot antre dan ou bann garson e koz lo la ler ou pe asize dan ou lakaz, ler ou pe marse lo semen ler ou pe alonze e ler ou leve.”​—Deterononm 6:6, 7.

  Bann zenn i kapab fer zanmi antre zot me sa pa devret zanmen ranplas ou rol konman paran. La en nide enteresan: Bann eksper i dir ki lamazorite zanfan ek adolesan i respekte zot paran e anvi fer zot plezir. Si ou gard en bon relasyon avek ou zanfan, ou pou annan plis lenfliyans lo zot ki zot zanmi.

  

  “Ou bezwen pas letan avek ou zanfan, fer bann keksoz dan lavi toulezour ansanm, parey netwaye, kwi manze e menm devwar lakour. Fer bann keksoz ki gou ansanm parey, bann zwe, get en film oubyen televizyon. Pa krwar i pli enportan zis pas en ‘bon moman’ ansanm zis detrwa erdtan detanzantan. Bann bon moman pa pou zanmen ranplas pas en bon pe letan ansanm!”​—Lorraine.

• Pa ankouraz ou zanfan pour fer zanmi zis avek bann dimoun son laz.

  Labib i dir: “Enbesilite i dan leker en zanfan.”​—Proverb 22:15, NWT.

  Serten paran i kontan ler zot vwar ki zot zanfan i annan bokou zanmi. Toudmenm, fer atansyon menm si i bon pour zanfan annan zanmi zot laz akoz sa i ede pour zot adapte avek lezot, me sa pa ede pour annan diferan kalite zanmi. Sa bann zanmi pa pou kapab donn zot sa gidans ki zot bezwen, zis zot paran ki kontan zot ki kapab fer sa pli byen.

  “Bann zanmi en zanfan i kapab annan serten konnesans me zot napa bann skil, leksperyans ek lasazes ki kapab ed lezot zenn pour fer bann pli bon desizyon. Ler bann zenn i rod gidans avek zot paran zot grandi e devlop dapre zot laz.”​—Nadia.

• Donn bon gidans.

  Labib i dir: “Sa ki mars avek dimoun saz pour vin saz.”​—Proverb 13:20, NWT.

  Menm ler zot vin pli gran, ou zanfan pou benefisye en kantite si zot in pas letan avek ou. Vin en bon legzanp pour zot.

  “Sa pli bon legzanp pour bann zanfan i zot paran. Ler bann zanfan i aprann pour kontan e respekte zot paran, zot pou anvi swiv zot legzanp ler zot gran.”​—Katherine.