Psonm
En sanson Asaf.
50 Zeova, Bondye bann bondye in koze.
I kriy tou bann zabitan later,
Depi soley leve ziska soley kouse.*
2 Bondye i anvoy son lalimyer sorti Siyon, en lavil avek en labote parfe.
3 Nou Bondye pou vini e i pa pou reste trankil.
Devan li i annan en gro dife ki pe brile
E otour li, i annan en gro tanpet.
4 I kriy lesyel ek later,
Pour li ziz son pep:
5 “Rasanble devan mwan, mon bann serviter fidel,
Bann ki pe fer en lalyans avek mwan par ofer en sakrifis.”
6 Lesyel i anons son ladrwatir,
Parski Bondye li menm i Ziz. (Sela)
7 “Mon pep, ekoute e mon pou koze,
Izrael, mon pou temwanny kont ou.
Mwan mon Bondye, ou Bondye.
8 Mon pa koriz ou akoz ou bann sakrifis,
Ni akoz ou bann lofrann brile ki ou toultan ofer mwan.
9 Mon pa bezwen pran en toro kot ou lakaz,
Ni bann kabri* dan ou berkay.
10 Parski tou bann zannimo sovaz dan lafore i pour mwan
E menm bann bebet ki lo mil montanny.
11 Mon konn tou zwazo ki reste dan bann montanny
E tou bann zannimo ki dan lakanpanny i pour mwan.
12 Si mon ti lafen, mon pa ti pou dir ou,
Parski later e tou sa ki lo la i pour mwan.
13 Eski mon pou manz lavyann toro
E bwar disan kabri?
14 Ofer Bondye ou rekonesans konman ou sakrifis.
Akonpli bann ve ki ou’n fer avek sa Enn Tre O.
15 Demann mwan led ler ou dan problenm.
Mon pou sov ou e ou pou glorifye mwan.”
16 Me Bondye pou dir en move dimoun:
“Ki drwa ou annan pour koz lo mon bann lalwa
Oubyen mon lalyans?
18 Ler ou vwar en voler, ou dakor avek sa ki i pe fer*
E ou frekant bann ki komet adilter.
19 Ou servi ou labous pour kontinyen dir sa ki mal
E ou lalang pour koz manti.
21 Ler ou ti fer sa bann keksoz, mon ti reste trankil,
Alor ou ti panse ki mon pou vin parey ou.
Me la mon pou koriz ou
E dir ou sa ki mon annan kont ou.
22 Silvouple, ou ki oubliy Bondye, reflesi lo sa
Pour ki mon pa desir ou an morso e ki personn pa pou sov ou.
23 Sa enn ki ofer mwan rekonesans konman son sakrifis i glorifye mwan
E sa enn ki kontinyen mars lo sa bon semen
Pou vwar ler Bondye pou sov li.”