Psonm
En sanson ek lanmizik pour zour Saba.
92 I bon pour remersye Zeova
E pour sant bann kantik* pour loue son non, O Bondye Tre O.
2 I bon pour koz lo ou lanmour fidel dan bomaten
E lo ou fidelite pandan lannwit.
3 Zwe lenstriman dis lakord, lenstriman trwa lakord*
Ek larp pour loue li.*
4 O Zeova, ou’n fer mwan zwaye akoz ou bann aksyon
E mon kriy avek lazwa akoz bann keksoz ki ou’n fer.
5 O Zeova, sa ki ou’n fer i vreman ekstraordiner!
Ou bann panse i vreman profon!
6 Dimoun bet pa kapab konn zot
E en lenbesil pa kapab konpran sa:
7 Ler bann move dimoun i pouse parey move zerb*
E tou bann ki fer sa ki mal i fleri,
I akoz zot pe al ganny detrir pour touzour.
8 Me ou O Zeova, ou ganny glorifye pour touzour.
9 O Zeova, gete ler ou bann lennmi i ganny defet
E get ki mannyer ou bann lennmi pou ganny detrir.
Tou bann ki fer sa ki mal pou ganny disperse.
10 Me ou pou donn mwan lafors* parey pour en toro maron,
Mon pou pas en bon delwil lo mon lapo.
11 Mon pou vwar ler mon bann lennmi i ganny defet.
Mon pou tande ler bann move dimoun ki atak mwan i ganny touye.
12 Me bann ki fer sa ki byen pou fleri parey en pye dat
E zot pou vin gran parey en pye sed Liban.
13 Zot parey bann pye dibwa ki’n ganny plante dan lakaz Zeova.
Zot fleri dan bann lakour lakaz nou Bondye.
14 Menm dan zot vye zour* zot pou kontinyen prospere.
Zot pou kontinyen annan lafors* e an bonn sante.
I mon Ros e napa nanryen mal dan li.