Psonm
Lapriyer en dimoun ki pe devid son leker avek Zeova ler i pe soufer e i dan dezespwar.*
102 O Zeova, ekout mon lapriyer,
Ekoute ler mon demann ou led.
2 Pa kasyet ou figir avek mwan ler mon dan problenm.
Ouver ou zorey e ekout* mwan,
Pa tarde pour reponn mon lapriyer.
3 Parski mon lavi pe disparet parey lafimen
E mon lezo in brile konmsi dan en dife.
4 Mon leker i parey zerb ki’n fletri e sek dan soley,
Parski mon oubliye manze.
5 Mon telman pe plennyen
Ki mon’n vin zis lapo ek lezo.
8 Tou dilon lazournen mon bann lennmi i ensilte mwan.
Bann ki monk mwan* i servi mon non konman en malediksyon.
9 Mon manz lasann konmsi dipen
E mon larm i melanze avek sa ki mon bwar,
10 Akoz ou lakoler ek mekontantman.
Parski ou ti pran mwan e deswit apre ou ti rezet mwan.
11 Mon lavi i parey en lonbraz ki pe disparet
E mon pe sek parey zerb.
13 Vreman ou pou azir e pran pitye pour Siyon,
Parski i’n ariv ler pour ou demontre konpasyon.
Sa letan fikse in arive.
14 Parski ou bann serviter i kontan son bann ros
E zot menm kontan son lapousyer.
15 Bann nasyon pou annan en gran respe pour non Zeova
E tou lerwa lo later pou annan en gran respe pour ou laglwar.
16 Parski Zeova pou rekonstri Siyon.
I pou aparet avek laglwar.
17 I pou ekout lapriyer bann pov,
I pa pou rezet zot lapriyer.
18 Sa in ganny ekrir pour sa zenerasyon ki pe vini,
Pour ki en pep ki pa ankor vin an egzistans* i loue Ya.
19 Parski depi dan son landrwa sen, Zeova i get anba
E depi dan lesyel i get later,
20 Pour ekout en prizonnyen ki pe plennyen
E pour delivre bann ki’n ganny kondannen amor,
21 Pour ki non Zeova i ganny anonse Siyon
E i ganny loue Zerizalenm,
22 Ler bann pep ek rwayonm
I rasanble ansanm pour ador Zeova.
23 I’n pran mon lafors avan ler
E i’n akoursi mon lavi.
24 Mon ti dir: “O mon Bondye,
Pa fer mwan mor avan ki mon vin vye,
Ou ki’n la pour touzour.
25 Depi byen lontan ou’n fer bann fondasyon later
E ou’n fer lesyel avek ou lanmen.
26 Later ek lesyel pou disparet, me ou ou pou reste.
Parey en lenz zot pou ize,
Parey en lenz ou pou ranplas zot e zot pou disparet.
27 Me ou ou pa pou sanze e ou lavi pa pou zanmen fini.
28 Bann zanfan ou bann serviter pou reste an sekirite
E zot desandans pou toultan reste devan ou.