Proverb
26 Parey lanez dan sezon lete ek lapli dan sezon rekolt,
I pa byen pour onor en dimoun bet.
2 Zis parey i annan rezon pour zwazo sove e zirondel anvole,
En dimoun pa ganny modi san okenn bon rezon.*
3 Fwet i pour seval, labrid* i pour bourik
E baton i pour ledo bann dimoun bet.
5 Reponn en dimoun bet dapre son betiz,
Pour li pa krwar ki i saz.
6 Sa enn ki fer konfyans en dimoun bet
I parey dimoun ki bles son prop lipye e fer ditor son lekor.*
7 Ler en dimoun bet i dir en proverb,
Sa i parey lipye en dimoun ki bwete.*
8 Ler en dimoun bet i ganny glorifye,
Sa i parey ler ou anmar ros dan fles.
9 Ler en dimoun bet i dir en proverb,
Sa i parey en pye pikan dan lanmen en soular.
10 Sa enn ki anploy en dimoun bet oubyen en dimoun ki pe zis pase,
I parey en dimoun ki tir fles e bles nenport dimoun.*
11 Zis parey en lisyen i manz son vomi,
En dimoun bet i refer menm keksoz bet.
12 Eski ou’n deza vwar en dimoun ki krwar i saz?
I annan plis lespwar pour en dimoun bet ki pour sa dimoun.
13 En dimoun pares i dir: “I annan en lyon* dan semen,
I annan en lyon dan landrwa piblik!”
14 En laport i zis ouver fermen*
E en dimoun pares i vir vire lo son lili.
15 En dimoun ki pares i met son lanmen dan bol manze,*
Me i tro fatige pour met manze dan son labous.
16 En dimoun ki pares i krwar i pli saz
Ki set dimoun ki donn en larepons ki fer sans.
17 Sa enn ki pase e ki ankoler akoz* en kankan ki pa konsern li,
I parey en dimoun ki pe tyonbo zorey en lisyen.
18 En dimoun fou ki tir bann misil alimen, bann fles ek lanmor,*
19 I parey en dimoun ki trik son prosen e dir, “Mon ti pe zwe!”
20 Kot napa dibwa, dife i tennyen
E kot napa dimoun ki fann rimer,* napa dispit.
21 Dimoun kankan ki kontan dispit
I parey sarbon dan labrez ek dibwa dan dife.
22 Parol sa enn ki fann rimer i parey en bon manze.*
I desann byen dan vant.
23 Ler en move dimoun i dir bann parol zantiy*
Sa i parey en resipyan anter ki’n ganny penn avek larzan.*
24 Sa enn ki ay lezot i kasyet son laenn ler i koze,
Me anndan i gard son move lentansyon.
25 Menm si i koz dan en fason dous, pa bezwen annan konfyans dan li,
Parski i annan set keksoz degoutan dan son leker.*
26 Menm si i kasyet ki i ay lezot,
Tou dimoun pou konnen ki i en move dimoun.
27 Sa enn ki fouy en trou pou tonm ladan
E dimoun ki roul en ros, sa ros pou roul lo li.
28 Sa enn ki koz manti i ay dimoun ki ganny blese par son parol
E dimoun ki flat lezot i anmenn problenm.