Izai
62 Mon pa pou reste trankil akoz Siyon
E mon pa pou reste trankil akoz Zerizalenm
Ziska son ladrwatir i klere parey en lalimyer ki kler byen
E ziska son delivrans i alimen parey en flanbo.
2 “Sa madanm, bann nasyon pou vwar ou ladrwatir
E tou bann lerwa pou vwar ou laglwar.
Ou pou ganny en nouvo non
Ki Zeova li menm pou swazir.
4 Ou pou nepli ganny apele en madanm ki’n ganny abandonnen
E ou pei pou nepli ganny apele en pei ki’n ganny abandonnen.
Me ou pou ganny apele sa Enn ki fer mwan kontan
E ou pei pou ganny apele sa enn ki’n marye.
Parski Zeova pou kontan ou
E ou pei pou parey en madanm ki’n marye.
5 Parski zis parey en garson i marye avek en vyerz,
Ou bann zabitan pou marye avek ou.
Parey en nouvo marye i kontan akoz en nouvel marye,
Ou Bondye pou kontan akoz ou.
6 Zerizalenm, mon’n met bann gardyen lo ou bann miray.
Zot pa devret reste trankil lazournen antye e lannwit antye.
Zot ki koz lo Zeova,
Pa bezwen repoze,
7 Pa bezwen les li repoze ziska ki i byen etabli Zerizalenm,
Wi, ziska ki i fer bann dimoun loue li partou lo later.”
8 Zeova in lev son lanmen drwat ki for e i’n fer en serman. I’n dir:
“Mon pou nepli donn ou bann lennmi ou bann lagrenn pour zot manze
E bann etranze osi pa pou bwar ou nouvo diven, ki ou’n travay dir pour fer.
9 Me bann dimoun ki pe anmas lagrenn pou manz sa lagrenn e zot pou loue Zeova.
Bann dimoun ki pe anmas diven pou bwar sa diven dan mon bann lakour sen.”
10 Pase, pas dan bann baro.
Fer en semen pour bann dimoun.
Konstri, konstri en gran semen.
Tir bann ros dan semen.
Met en lansenny* pour bann dimoun.
11 Gete! Zeova in dir sa partou lo later:
“Dir fiy Siyon,
‘Gete! Ou pros pour ganny sove.
Gete! Rekonpans ki i donnen i avek li
E sa saler ki i peye i devan li.’”
12 Zot pou ganny apele en pep ki sen, bann dimoun ki Zeova in sove*
E ou pou ganny apele “sa lavil ki Bondye pe rode,” “en lavil ki pa’n ganny abandonnen.”