Izai
24 Gete! Zeova pe fer sa pei* vin vid e fer li ganny abandonnen.
I vir li latet anba e dispers son bann zabitan.
2 Menm keksoz pou ariv avek tou dimoun:
Bann dimoun e osi bann pret,
Bann serviter ek zot met,
Bann servant ek zot met,
Bann dimoun ki aste ek bann dimoun ki vann,
Bann dimoun ki demann prete ek bann dimoun ki prete,
Bann dimoun ki pret lezot dimoun larzan ek bann dimoun ki drwa larzan.
3 Sa pei pou vid net.
Zot pou pran tou son bann keksoz,
Parski Zeova ki’n dir sa.
4 Sa pei i dan dey.* I pe deperi.
Sa later pe sek. I pe vin en dezer.
Bann dimoun enportan dan sa pei pe perdi lafors.
5 Bann zabitan dan sa pei in sali sa pei,
Parski zot pa’n obei bann lalwa,
Zot in sanz lareg
6 Sa pei in ganny en malediksyon e sanmenm sa i pe ganny detrir
E son bann zabitan i koupab.
Sanmenm sa, bann zabitan dan sa pei in vin pli ptigin
E i reste zis en ptigin zonm.
7 Sa nouvo diven i dan dey,* sa pye rezen pe fletri
E tou bann dimoun ki ti zwaye pe plennyen.
8 I nepli annan tapaz bann tanbourin* ki ti fer dimoun kontan.
I nepli annan tapaz bann dimoun ki ti pe fete.
I nepli annan tapaz larp ki ti fer dimoun kontan.
9 Zot bwar diven me napa lanmizik
E bann dimoun ki pe bwar lalkol i ganny gou anmer.
10 Sa lavil ki’n ganny abandonnen in ganny kraze.
Tou lakaz i fermen pour ki personn pa kapab antre.
11 Zot kriye dan bann semen pour zot ganny diven.
I nepli annan lazwa.
I nepli annan lazwa dan sa pei.
12 Sa lavil in ganny detrir.
Baro in kase e i’n vin en ta debri.
13 Parski koumsanmenm i pou ete dan pei, parmi bann dimoun:
I pou parey ler en brans pye zoliv i ganny bate,
Parey ler bann dimoun i anmas sa ki’n reste deryer apre ki rekolt rezen in fini ganny fer.
14 Zot pou kriye,
Zot pou kriye dan lazwa.
Zot pou koz lo laglwar Zeova ler zot kot lanmer.*
15 I pour sa rezon ki zot pou glorifye Zeova dan rezyon lalimyer.*
Zot pou glorifye non Zeova Bondye Izrael, lo bann zil.
16 Nou tann bann dimoun ki pe sant bann sanson partou lo later ki pe dir:
“Laglwar* pour sa Enn ki drwat!”
Me mwan mon dir: “Mon fay, mon fay!
Maler pour mwan! Bann dimoun ki trai pe trai lezot dimoun.
Wi, zot pe kontinyen trai lezot dimoun.”
17 Bann zabitan sa pei, zot pou per, zot pou tonm dan bann trou e zot pou tonm dan bann latrap.
18 Nenport dimoun ki taye akoz zot per sa tapaz, pou tonm dan sa trou
E nenport dimoun ki sorti dan sa trou pou pri dan sa latrap.
Parski delo ki dan lesyel pou devide
E bann fondasyon sa pei pou tranble.
19 Sa pei in kas kase.
Sa pei in ganny sekwe.
Sa pei i tranble en kantite.
20 Sa pei i drive parey en zonm sou
E i balanse parey en payot dan divan.
Son fot i lour lo li,
I pou tonbe e i pa pou kapab lev ankor.
21 Sa zour, Zeova pou ziz sa larme ki anler dan lesyel
E i pou ziz bann lerwa ki lo later.
22 Zot pou ganny rasanble ansanm
Parey bann prizonnyen ki’n ganny rasanble dan en trou
E zot pou ganny fermen dan en kaso.
Apre en kantite zour, zot pou ganny zize.
23 Plennlin pou anbarase
E soley ki pe klere pou onte,
Parski Zeova Sef larme in vin Lerwa lo Montanny Siyon e dan Zerizalenm.
I’n ganny en kantite laglwar devan bann ansyen parmi son pep.*