Zeremi

27 Ler Zeoyakim garson Zosya ti’n fek vin lerwa Zida, Zeova ti koz avek Zeremi e i ti dir li: 2 “La sa ki Zeova in dir mwan, ‘Tres bann lakord e prepar bann bar dibwa* e met zot lo ou likou. 3 Apre fer sa bann mesaze ki’n vin Zerizalenm kot Zedekya lerwa Zida, anmenn sa bann lakord ek bar dibwa kot lerwa Edonm, lerwa Moab, lerwa bann Amonnit, lerwa Tir e kot lerwa Sidon. 4 Donn zot lord pour zot al dir zot bann met sa mesaz:

“‘“La sa ki Zeova Sef larme, Bondye Izrael, i dir. La sa ki zot devret dir zot bann met, 5 ‘Mwan ki’n fer later, bann imen ek bann zannimo ki lo later avek mon gran lafors ek mon gran pwisans* e mon’n donn zot avek sa ki mwan mon anvi.* 6 Aprezan mon’n donn tou sa bann pei avek mon serviter Neboukadnezar lerwa Babilonn. Mon’n menm donn li bann zannimo sovaz dan lakanpanny pour zot servi li. 7 Tou bann nasyon pou servi li, son garson ek son pti zanfan ziska ler i aret dirize konman lerwa e en kantite nasyon ek bann gran lerwa pou fer li vin zot lesklav.’

8 “‘“La sa ki Zeova i dir, ‘Si en nasyon oubyen en rwayonm pa oule servi Neboukadnezar lerwa Babilonn e si i pa oule met son likou anba zoug* lerwa Babilonn, mon pou pini sa nasyon avek lepe, lafanmin ek lepidemi* ziska ki Neboukadnezar i fini detri li konpletman.’

9 “‘“‘Alor pa bezwen ekout zot bann profet, bann dimoun ki predir lavenir, bann dimoun ki ganny bann rev, bann mazisyen ek bann sorsye, ki pe dir zot: “Zot pa pou servi lerwa Babilonn.” 10 Parski zot pe dir bann profesi ki pa vre pour fer zot ganny anmennen lwen avek zot pei e mon pou dispers zot e zot pou mor.

11 “‘“La sa ki Zeova i dir, ‘Me sa nasyon ki met son likou anba zoug lerwa Babilonn e servi li, mon pou les li reste* dan son pei pour li kiltiv later e pour reste dan son pei.’”’”

12 Mon ti osi dir Zedekya lerwa Zida, menm keksoz. Mon ti dir li: “Met zot likou anba zoug lerwa Babilonn e servi li ek son pep e zot pou kontinyen viv. 13 Akoz ou ek ou pep zot devret mor avek lepe, avek lafanmin e avek lepidemi, zis parey Zeova in dir pou arive avek sa nasyon ki pa pou servi lerwa Babilonn? 14 Pa bezwen ekout sa bann profet ki pe dir zot, ‘Zot pa pou servi lerwa Babilonn,’ parski zot pe dir bann profesi ki pa vre.

15 “La sa ki Zeova i dir, ‘Parski mon pa’n anvoy zot, me zot pe servi mon non pour dir bann profesi ki pa vre. Si zot ekout zot, mon pou dispers zot ek sa bann profet ki pe profetiz avek zot e zot pou mor.’”

16 Mon ti dir bann pret ek tou dimoun: “La sa ki Zeova i dir, ‘Pa bezwen ekout bann profet ki pe dir zot: “Gete! Tre byento, zot pou retourn avek bann keksoz ki ti dan lakaz Zeova ki zot ti anmenn Babilonn!” Parski zot pe dir bann profesi ki pa vre. 17 Pa bezwen ekout zot. Servi lerwa Babilonn e zot pou kontinyen viv. Akoz sa lavil i devret ganny detrir? 18 Me si zot vreman bann profet e si zot pe vreman dir sa ki Zeova in dir zot, silvouple les zot sipliy Zeova Sef larme pour ki larestan keksoz ki reste dan lakaz Zeova, dan lakaz* lerwa Zida e dan Zerizalenm pa ganny anmennen Babilonn.’

19 “Parski la sa ki Zeova Sef larme i dir konsernan bann kolonn, sa basen ki apel Lanmer,* bann saret ek larestan keksoz ki reste dan sa lavil, 20 ki Neboukadnezar lerwa Babilonn pa ti pran ler i ti fer Zekonya garson Zeoyakim, lerwa Zida, sorti Zerizalenm e anmenn li an egzil Babilonn, ansanm avek tou bann dimoun enportan dan Zida e dan Zerizalenm. 21 Wi, la sa ki Zeova Sef larme, Bondye Izrael, i dir konsernan bann keksoz ki reste dan lakaz Zeova, dan lakaz* lerwa Zida e dan Zerizalenm: 22 ‘“Zot pou ganny anmennen Babilonn e zot pou reste laba ziska zour ki mon ed zot.” La sa ki Zeova in dir. “Apre mon pou retourn avek zot e fer zot retourn dan sa landrwa.”’”