Zeremi

52 Zedekya ti annan 21 an ler i ti vin lerwa e i ti dirize pour 11 an ler i ti Zerizalenm. Son manman ti apel Amoutal fiy Zeremi ki sorti Libna. 2 I ti kontinyen fer sa ki mal dan lizye Zeova zis parey Zeoyakim ti’n fer. 3 Sa bann keksoz dan Zerizalenm ek Zida ti arive akoz Zeova ti ankoler avek zot e finalman i ti tir zot devan li. Apre, Zedekya ti rebel kont lerwa Babilonn. 4 Dan nevyenm lannen ki Zedekya ti lerwa, dan dizyenm mwan, dizyenm zour sa mwan, Neboukadnezar* lerwa Babilonn ek son larme antye ti vin atak Zerizalenm. Zot ti etabli zot kan e zot ti fer en miray toultour sa lavil. 5 Zot ti kontinyen anserkle sa lavil ziska dan onzyenm lannen ki Zedekya ti lerwa.

6 Dan katriyenm mwan, nevyenm zour sa mwan, lafanmin dan lavil ti sever e i ti napa manze pour bann dimoun dan pei. 7 Finalman, bann Kaldeen ti kas en bout miray lavil. Tou bann solda ti sove e sorti dan lavil aswar e zot ti pas par sa baro ant sa de miray o bor zarden lerwa, pandan ki bann Kaldeen ti pe anserkle lavil. Apre, zot ti kontinyen ale dan sa semen ki al ver Araba. 8 Me larme bann Kaldeen ti tay deryer lerwa e zot ti zwenn Zedekya dan dezer Zeriko.Tou son bann solda ti sove e kit li. 9 Zot ti tyonbo lerwa e anmenn li Ribla dan lavil Amat kot lerwa Babilonn. I ti kondann li. 10 Lerwa Babilonn ti touy bann garson Zedekya devan son lizye e i ti osi touy tou bann prens Zida laba Ribla. 11 Apre, lerwa Babilonn ti fer Zedekya vin aveg. I ti anmar li avek bann lasenn an kwiv, anmenn li Babilonn e kit li dan prizon ziska ler i ti mor.

12 Dan senkyenm mwan, dizyenm zour sa mwan, setadir dan diznevyenm lannen ki Lerwa Neboukadnezar* ti lerwa Babilonn, Nebouzaradann sef gard, ki ti en serviter lerwa Babilonn ti vin Zerizalenm. 13 I ti bril lakaz Zeova, lakaz* lerwa ek tou bann lakaz dan Zerizalenm. I ti osi bril tou bann gran lakaz. 14 Tou larme bann Kaldeen ki ti avek sef gard ti kas bann miray ki ti otour Zerizalenm.

15 Nebouzaradann sef gard ti pran serten bann dimoun pov ek larestan dimoun dan lavil e i ti anmenn zot an egzil. I ti osi pran bann dimoun ki ti’n al kot lerwa Babilonn e osi larestan bann artizan ki ti annan abilite. 16 Me Nebouzaradann sef gard ti kit en pe dimoun ki ti pli pov lanmenm dan pei e donn zot lord pour travay dan bann plantasyon rezen e dan lezot plantasyon.

17 Bann Kaldeen ti kas kas bann kolonn an kwiv kot lakaz Zeova, bann saret, sa basen an kwiv ki ti apel Lanmer ki ti dan lakaz Zeova e zot ti anmenn tou sa kwiv Babilonn. 18 Zot ti osi pran bann resipyan ki met lasann ladan, bann lapel, bann sizo,* bann bol, bann lakoup ek tou bann keksoz an kwiv ki ti ganny servi dan tanp. 19 Sef gard ti pran bann basen, bann resipyan ki met labrez ladan, bann bol, bann resipyan ki met lasann ladan, bann sandelye, bann lakoup ek bann bol ki ti’n ganny fer avek lor pir ek larzan.* 20 Zot pa ti kapab kalkil pwa sa kwiv ki Lerwa Salomon ti servi pour fer sa de kolonn, Lanmer, sa 12 toro an kwiv ki ti anba Lanmer ek bann saret pour lakaz Zeova.

21 Sak sa bann kolonn ti mezir 18 koude* oter e i ti groser 12 koude.* I ti lepeser kat ledwa* e i ti vid anndan. 22 Sa kornis* lo sak kolonn ti an kwiv. En kornis ti mezir senk koude oter. Bann pti lasenn ek bann grenad otour kornis ti an kwiv. Tou le de kolonn ek bann grenad ti parey kanmarad. 23 I ti annan 96 grenad lo bann kote. An tou, i ti annan 100 grenad otour bann pti lasenn.

24 Sef gard ti osi pran sef pret Seraya, Zefanya dezyenm pret ek sa trwa gardyen laport. 25 I ti osi pran en zofisye dan pale ki ti ansarz bann solda, set dimoun dan lavil ki ti pros avek lerwa e osi sekreter sef larme, sa dimoun ki ti responsab pour rod dimoun pour al dan larme e 60 zonm dan pei ki ti ankor dan lavil. 26 Nebouzaradann sef gard ti pran zot e anmenn zot Ribla kot lerwa Babilonn. 27 Lerwa Babilonn ti touy zot laba Ribla dan lavil Amat. Alor bann zabitan Zida ti kit zot pei e al an egzil.

28 Sa i lakantite dimoun ki Neboukadnezar* ti anmenn an egzil: dan setyenm lannen, i ti anmenn 3,023 Zwif.

29 Dan dizwityenm lannen ki Neboukadnezar* ti lerwa, i ti pran 832 dimoun Zerizalenm.

30 Dan venntrwazyenm lannen ki Neboukadnezar* ti lerwa, Nebouzaradann sef gard ti anmenn 745 Zwif an egzil.

An tou, i ti annan 4,600 dimoun ki ti ganny anmennen an egzil.

31 Apre, dan trannsetyenm lannen ki Zeoyakin lerwa Zida ti an egzil, dan douzyenm mwan, vennsenkyenm zour sa mwan, sa lannen ki Evil-Merodak ti vin lerwa Babilonn, Evil-Merodak ti tir* Zeoyakin lerwa Zida dan prizon. 32 I ti koz byen avek li e i ti onor li plis* ki tou lezot lerwa ki ti avek li Babilonn. 33 Alor Zeoyakin ti tir son lenz prizonnyen e i ti manz lo latab lerwa tou le zour pour larestan son lavi. 34 Tou le zour lerwa Babilonn ti fer li ganny son manze, pour larestan son lavi ziska ler i ti mor.