Zeremi
12 O Zeova, ou drwat. Ler mon konplent avek ou
E ler mon koz avek ou lo bann keksoz ki annan pour fer avek lazistis, ou fer sa ki drwat.
Me akoz bann move dimoun i reisi dan sa ki zot fer?
Akoz bann dimoun ki tret napa traka?
2 Ou’n plant zot e zot rasin in pouse.
Zot in pouse e raport fri.
Zot toultan koz lo ou, me ou pa dan zot panse.*
3 O Zeova, ou konn mwan tre byen e ou vwar mwan.
Ou’n egzamin mon leker e ou’n vwar ki i ini avek ou.
Separ zot avek lezot parey bann mouton ki pe al ganny touye
E met zot apar pour sa zour ki zot pou ganny touye.
4 Ziska kan ki sa pei pou sek?
Ziska kan ki bann plant dan tou bann lakanpanny pou sek?
Vi ki bann dimoun ki reste dan sa pei pe fer bann move keksoz,
Bann zannimo sovaz ek bann zwazo in ganny touye.
Parski zot in dir: “I pa vwar sa ki pou arive avek nou.”
5 Si ou fatige ler ou pe tay ansanm avek bann dimoun ki apye,
Ki mannyer ou pou kapab fer paryaz taye avek bann seval?
Menm si ou santi ou konfidan dan sa pei ki anpe,
Ki ou pou fer ler ou dan bann gran brousay ki o bor Larivyer Zourden?
6 Parski menm ou bann frer, fanmir ou papa,
Zot in trai ou.
Zot in kriy avek ou.
Pa bezwen annan konfyans dan zot,
Menm si zot dir ou bann bon keksoz.
7 “Mon’n abandonn mon lakaz e mon’n kit mon leritaz.
Mon’n livre sa enn ki mon vreman kontan dan lanmen son bann lennmi.
8 Mon leritaz in vin parey en lyon dan lafore.
I’n kriy avek mwan.
Sanmenm sa mon ay li.
9 Mon leritaz i parey en zwazo* ki annan diferan kouler.*
Lezot zwazo* i antour li e atak li.
Vini, rasanble ansanm, zot tou bann zannimo sovaz dan lakanpanny,
Vin manze.
10 En kantite berze in detri mon plantasyon rezen.
Zot in pil pil lo mon bout later.
Zot in fer mon bon bout later vin en landrwa dezerte.
11 I’n vin en dezer.
I’n vin sek.*
I’n vin en landrwa dezerte devan mwan.
Sa pei antye in vin en landrwa dezerte,
Me personn pa pe fatig zot avek sa.
12 Sa bann dimoun ki detri in pas dan tou bann vye santye* dan dezer e zot in vini,
Parski lepe Zeova pe detri pei depi en bout ziska lot bout.
Personn* pa anpe.
13 Zot in senm dible, me zot in rekolte pye pikan.
Zot in fatig zot lekor pour nanryen.
Zot pou onte akoz zot bann prodwi
Parski Zeova i vreman ankoler.”
14 La sa ki Zeova i dir kont tou mon bann move vwazen ki pe tous sa leritaz ki mon ti donn mon pep Izrael: “Mon pe derasin zot dan zot pei e mon pou derasin pep Zida parmi zot. 15 Me apre ki mon’n derasin zot, mon pou pran pitye pour zot ankor e mon pou fer sakenn retourn dan son leritaz e dan son pei.”
16 “Si zot aprann fason fer mon pep e zot fer serman lo mon non e zot dir, ‘Mon fer serman devan Zeova sa Bondye vivan!’ zis parey zot ti montre mon pep pour fer serman lo non Baal, zot pou reste parmi mon pep. 17 Me si zot pa oule obei, mon pou derasin sa nasyon, mon pou derasin li e detri li.” La sa ki Zeova in dir.