Zeremi
14 Zeova ti koz avek Zeremi konsernan lasesres e i ti dir:
2 Zida i dan dey e son bann baro in pouri.
Zot in tonm ater, zot in kase
E bann dimoun dan Zerizalenm pe kriye.
3 Bann met i anvoy zot bann serviter* pour al sers delo.
Zot al kot bann trou delo* e zot pa trouv delo.
Zot retournen avek zot bann resipyan vid.
Zot onte e dezapwente
E zot kouver zot latet.
4 Later in fann,
Parski napa lapli dan pei,
Bann fermye i dekouraze e zot kouver zot latet.
5 Menm en femel serf dan lakanpanny i abandonn son piti ki’n fek ne
Parski napa zerb.
6 Bann bourik maron i debout lo bann montanny.
Zot respir byen for parey bann sakal.*
Zot lizye i fatige akoz napa plant pour zot manze.
7 Menm si nou bann fot i montre ki nou koupab,
Azir akoz ou non, O Zeova.
Parski nou’n fer en kantite keksoz ki montre ki nou pa fidel avek ou
E nou’n fer pese kont ou.
8 Ou ki sa lespwar pour Izrael, sa Enn ki sov zot ler zot dan problenm,
Akoz ou parey en etranze dan sa pei,
Parey en dimoun ki pe vwayaze e ki reste pour zis en lannwit?
9 Akoz ou parey en zonm ki’n etonnen,
Parey en zonm for ki pa kapab sov personn?
Parski ou parmi nou, O Zeova,
E nou port ou non.
Pa bezwen abandonn nou.
10 La sa ki Zeova i dir konsernan sa pep: “Zot kontan marsaye e zot pa kapab arete. Zot pa fer plezir Zeova. Aprezan, i pou rapel bann fot ki zot in fer e i pou fer zot rann kont pour bann pese ki zot in fer.”
11 Apre Zeova ti dir mwan: “Pa bezwen priye pour demann mwan pour fer bann bon keksoz pour sa pep. 12 Ler zot zennen,* mon pa ekout zot bann lapriyer e mon pa pran plezir dan bann lofrann brile* ek lofrann lagrenn* ki zot ofer, parski mon pou touy zot avek lepe, avek lafanmin e avek lepidemi.”*
13 Alor mon ti dir: “Non, O Souvren Senyer Zeova! Bann profet pe dir zot, ‘Zot pa pou vwar lepe e i pou napa lafanmin, me mon pou fer zot ganny vre lape dan sa landrwa.’”
14 Apre Zeova ti dir mwan: “Bann profet pe servi mon non pour dir bann profesi ki pa vre. Mon pa’n anvoy zot, ni donn zot lord, ni koz avek zot. Zot pe profetiz konsernan bann vizyon ki pa vre, zot pe predir lavenir* e zot pe envant bann keksoz. 15 Alor la sa ki Zeova i dir konsernan sa bann profet ki pe servi mon non pour dir bann profesi, menm si mon pa’n anvoy zot e ki pe dir ki i pou napa lepe oubyen lafanmin dan sa pei: ‘Sa bann profet pou mor avek lepe e avek lafanmin. 16 Sa bann dimoun ki pe ekout bann profesi ki zot pe dir, pou mor avek lafanmin e avek lepe e zot pou ganny zete dan bann semen Zerizalenm. I pou napa personn pour anter zot, zot bann madanm, zot bann garson oubyen zot bann fiy, parski mon pou vid sa maler ki zot merite lo zot.’
17 “Ou devret dir zot sa,
‘Les larm koule dan mon lizye lizour ek aswar, pa les zot aret koule,
Parski fiy mon pep ki vyerz in konpletman ganny kraze e kas kase,
Son blesir i vreman grav.
18 Si mon al get dan lakanpanny,
Mon pou vwar bann dimoun ki’n ganny touye avek lepe!
Si mon antre dan lavil,
Mon pou vwar dimoun ki malad akoz lafanmin!
Parski bann profet ek bann pret in al partou dan en pei ki zot pa konnen.’”
19 Eski ou’n rezet Zida konpletman? Oubyen eski ou’n deteste Siyon?
Akoz ou’n tap nou pour ki i napa en gerizon pour nou?
Nou ti annan lespwar ki i ti pou annan lape, me napa nanryen ki bon ki ti arive,
Nou ti annan lespwar ki nou ti pou ganny geri, me i annan zis lafreyer!
20 O Zeova, nou rekonnet ki nou’n fer bann move keksoz
Ek fot ki nou bann zanset in fer,
Parski nou’n fer pese kont ou.
21 Pa bezwen rezet nou, akoz ou non.
Pa bezwen rezet ou tronn glorye.
Rapel e pa bezwen kas sa lalyans ki ou ti fer avek nou.
22 Eski sa bann zidol ki pa vo nanryen ki sa bann nasyon pe servi i kapab fer lapli tonbe?
Oubyen eski lesyel i kapab fer lapli tonbe li menm?
O Zeova nou Bondye, zis ou ki kapab fer sa.
Nou annan lespwar dan ou.
Parski zis ou ki’n fer tou sa bann keksoz.