Ezekyel

6 Zeova ti koz avek mwan ankor enn fwa e i ti dir: 2 “Garson zonm, get bann montanny Izrael e profetiz kont zot. 3 Ou devret dir, ‘Zot bann montanny Izrael, ekout sa ki Souvren Senyer Zeova i dir zot: La sa ki Souvren Senyer Zeova i dir avek bann montanny, bann pti montanny, bann pti larivyer ek bann vale: “Mon pou anmenn en lepe kont zot e mon pou detri zot bann landrwa ladorasyon.* 4 Zot bann lotel pou ganny detrir, zot bann lotel lansan pou ganny kase e mon pou zet zot bann dimoun ki’n ganny touye, devan zot bann zidol degoutan.* 5 Mon pou zet lekor mor bann dimoun Izrael, devan zot bann zidol degoutan e mon pou zet zot lezo toultour zot bann lotel. 6 Partou kot zot reste, bann lavil pou ganny detrir e bann landrwa ladorasyon osi pou ganny detrir e zot pou reste koumsanmenm. Zot bann lotel pou ganny kraze, zot bann zidol degoutan pou ganny detrir e zot bann lotel lansan pou ganny kase e tou sa ki zot in fer pou disparet. 7 Tou dimoun ki’n ganny touye pou tonm lanmenm la devan zot e zot pou bezwen konnen ki mwan, mon Zeova.

8 “‘“Me mon pou kit en pe dimoun vivan, parski serten parmi zot pa pou ganny touye avek lepe parmi bann nasyon kot zot pou’n disperse partou dan bann pei. 9 Sa bann ki sirviv pou mazin mwan parmi bann nasyon ki’n pran zot konman prizonnyen. Zot pou konpran ki mon leker ti fermal akoz zot leker pa ti fidel,* zot ti vir zot ledo avek mwan e zot ti get bann zidol degoutan avek move dezir. Zot pou onte e degout tou sa bann move keksoz ek bann keksoz degoutan ki zot in fer. 10 Zot pou bezwen konnen ki mwan, mon Zeova e ki mon pa ti pe koz dan vid ler mon ti dir ki mon pou anmenn sa maler lo zot.”’

11 “La sa ki Souvren Senyer Zeova i dir: ‘Bat ou lanmen, pile e plennyen akoz tou sa bann move keksoz ek bann keksoz degoutan ki pep Izrael in fer, parski zot pou ganny touye avek lepe, avek lafanmin e avek lepidemi. 12 Sa enn ki lwen pou mor avek lepidemi, sa enn ki pros pou ganny touye avek lepe e sa bann ki sirviv tousala pou mor avek lafanmin. Mon pou tir tou mon lakoler lo zot. 13 Zot pou bezwen konnen ki mwan, mon Zeova ler zot pou vwar zot bann dimoun ki’n ganny touye, parmi zot bann zidol degoutan, toultour zot bann lotel, lo tou bann montanny, lo tou latet montanny, anba tou bann zoli pye dibwa e anba bann brans bann gro pye dibwa kot zot in ofer zot bann lofrann santi bon pour kalme tou zot bann zidol degoutan. 14 Mon pou lev mon lanmen kont zot e fer sa pei vin dezerte. Tou zot bann landrwa reste pou vin pli dezerte ki sa dezer ki o bor Dibla. Zot pou bezwen konnen ki mwan, mon Zeova.’”