Ezekyel

11 Lespri sen* ti lev mwan e anmenn mwan kot baro les lakaz Zeova, sa baro ki vir dan les. Mon ti vwar 25 zonm kot larantre sa baro e parmi zot i ti annan Zaazanya garson Azour ek Pelatya garson Benaya, bann prens sa pep. 2 Apre Bondye ti dir mwan: “Garson zonm, sa i sa bann zonm ki pe fer konplo pour fer move keksoz e pour donn move konsey dan* sa lavil. 3 Zot pe dir, ‘Pa la i letan pour konstri bann lakaz? Sa lavil* i en marmit* e nou, nou lavyann.’

4 “Alor profetiz kont zot. Garson zonm, profetize.”

5 Zeova ti donn mwan son lespri sen e i ti dir mwan: “Dir zot, ‘La sa ki Zeova i dir: “Pep Izrael, sa ki zot in dir i byen e mon konnen ki zot pe mazinen.* 6 Zot in touy en kantite dimoun dan sa lavil e zot in ranpli son bann semen avek bann dimoun mor.”’” 7 “Alor la sa ki Souvren Senyer Zeova i dir: “Sa bann lekor mor ki zot in fann partou dan sa lavil i sa lavyann e sa lavil i sa marmit. Me zot, zot pou ganny tire ladan.’”

8 “La sa ki Souvren Senyer Zeova i dir, ‘Zot per lepe me mon pou anmenn en lepe kont zot. 9 Mon pou tir zot dan sa lavil e livre zot dan lanmen bann etranze e mon pou ziz zot. 10 Zot pou ganny touye avek lepe. Mon pou ziz zot kot lafrontyer Izrael e zot pou bezwen konnen ki mwan, mon Zeova. 11 Sa lavil pa pou en marmit pour zot e zot pa pou lavyann ladan. Mon pou ziz zot kot lafrontyer Izrael 12 e zot pou bezwen konnen ki mwan, mon Zeova. Parski zot pa’n obei mon bann lareg ek mon bann lalwa, me zot in swiv bann lalwa sa bann nasyon otour zot.’”

13 Dek ki mon ti profetize, Pelatya garson Benaya ti mor. Mon ti tonm lafas anba e kriye byen for: “Ar wi Souvren Senyer Zeova! Eski ou pou detri larestan dimoun dan Izrael?”

14 Zeova ti koz avek mwan ankor enn fwa e i ti dir: 15 “Garson zonm, bann zabitan Zerizalenm in dir ou bann frer, sa bann ki annan drwa pour reaste e osi pep Izrael antye, ‘Reste lwen avek Zeova. Sa pei i pour nou. Nou’n ganny donnen sa pei konman en propriyete.’ 16 Alor ou devret dir, ‘La sa ki Souvren Senyer Zeova i dir: “Menm si mon’n anvoy zot byen lwen parmi bann nasyon e dispers zot dan bann pei, dan ankor en pti pe letan mon pou vin en landrwa sen pour zot dan sa bann pei kot zot in ale.”’

17 “Alor ou devret dir, ‘La sa ki Souvren Senyer Zeova i dir: “Mon pou osi tir zot parmi sa bann pep e rasanble zot dan sa bann pei kot zot in ganny disperse e mon pou donn zot pei Izrael. 18 Zot pou retourn dan sa pei e zot pou tir tou sa bann keksoz degoutan e aret fer bann keksoz degoutan. 19 Mon pou fer zot ini* avek kanmarad e mon pou donn zot mon lespri sen. Mon pou tir zot leker ki dir parey ros dan zot e met en leker ki mou* 20 pour ki zot kapab obei mon bann lareg ek mon bann lalwa. Alor zot pou vin mon pep e mon pou vin zot Bondye.”’

21 “‘La sa ki Souvren Senyer Zeova i dir, “Me bann ki determinen pour kontinyen fer sa bann keksoz degoutan, mon pou fer zot sibir konsekans sa ki zot in fer.”’”

22 Alor bann seriben ti lev zot lezel. Bann larou ti o bor zot e laglwar Bondye Izrael ti par lao zot. 23 Apre, laglwar Zeova ti monte sorti dan lavil e i ti aret anler lo sa montanny ki dan les lavil. 24 Apre, atraver en vizyon ki lespri sen Bondye ti donn mwan, lespri sen* ti lev mwan e anmenn mwan kot bann dimoun ki ti an egzil dan pei bann Kaldeen. Apre, sa vizyon ti fini lanmenm. 25 Alor mon ti konmans rakont sa bann dimoun ki ti an egzil tou sa bann keksoz ki Zeova ti’n montre mwan.