Maryaz ki onorab pour Zonm ek Bondye

“Ti annan en maryaz dan lavil Kana . . . Zezi osi avek son bann disip ti’n ganny envite sa maryaz.”—ZAN 2:1, 2.

1. Ki nou aprann lo Zezi zour maryaz dan lavil Kana?

ZEZI, son manman, ek serten son bann disip ti konn lazwa ki vin avek en maryaz onorab parmi pep Bondye. Kris ti menm fer en maryaz ankor pli remarkab ler i ti fer premye mirak ki Labib i mansyonnen laba, e sa ti anmenn plis lazwa sa zour. (Zan 2:1-11) Tre probab ou osi ou’n kontan pour asiste bann maryaz Kretyen kot sa koup i anvi servi Zeova ini ansanm dan lazwa. Oubyen petet ou osi ou ti a kontan annan sa kalite maryaz en zour oubyen pour ed enn ou zanmi prepar avek sikse son maryaz. Kwa ki kapab ede fer en maryaz reisi?

2. Ki nou aprann lo maryaz dan Labib?

² Bokou Kretyen in vwar ki konsey ki sorti dan Parol Bondye i ed en msye ek en madanm ki pe al marye en kantite. (2 Timote 3:16, 17) I vre ki Labib pa donn bokou detay lo konman pour organiz en maryaz Kretyen. I fer sans akoz bann koutim ek bann prosedir legal i diferan dapre landrwa ouswa lepok ki nou viv. Par egzanp, lepok bann Izraelit ti napa en seremoni maryaz formel. Zour maryaz, nouvo marye ti anmenn nouvel marye kot li oubyen kot son papa. (Zenez 24:67; Izai 61:10; Matye 1:24) Par sa aksyon piblik, sa de dimoun ti marye san okenn seremoni formel parey nou abitye fer ozordi.

3. Dan ki levennman Zezi ti kontribye?

³ Pour bann Izraelit zour ki sa msye ti pran sa madanm kot li, zot ti marye. Apre sa, i ti kapab annan en resepsyon parey Zan 2:1 i mansyonnen. Bokou Labib i tradwir sa verse an dizan: ‘Ti annan en maryaz dan lavil Kana.’ Me dan langaz orizinal, i plito dir ti annan en “festen [oubyen resepsyon] maryaz.”a (Matye 22:2-10; 25:10; Lik 14:8, NW) Sa resi dan Labib i fer kler ki Zezi ti prezan e ti kontribye pour ki sa resepsyon maryaz Zwif ti vin pli gou. Toudmenm, sa ki enportan se ki maryaz li menm sa lepok ti diferan avek sa ki nou abitye denozour.

4. Ki kalite maryaz serten Kretyen i swazir, e akoz?

⁴ Dan plizyer pei ozordi, bann Kretyen ki anvi marye i bezwen swiv serten prosedir legal avan maryaz li menm. Kan zot in fer tousala, zot kapab marye dan en fason legal. Sa i kapab en pti seremoni senp fer par en ziz, mer en lavil oubyen en minis Kretyen ki reprezant gouvernman sa pei. Serten i marye koumsa e souvan zot envit serten fanmiy oubyen bann zanmi Kretyen pour vin zot temwen ouswa zis pour prezan pour partaz lazwa sa levennman enportan. (Zeremi 33:11; Zan 3:29) Pareyman, serten Kretyen pa anvi fer en gran resepsyon maryaz ki pou demann bokou preparasyon ek larzan. Plito zot organiz en repa avek bann zanmi pros. Nenport pwennvi nou annan lo sa size, nou bezwen rekonnet ki i posib pour bann Kretyen matir annan bann pwennvi diferan.—Romen 14:3, 4.

5. Akoz bokou Kretyen i kontan pour annan en diskour maryaz, e sa diskour i koz lo kwa?

⁵ Laplipar koup Kretyen i swazir pour annan en diskour baze lo Labib zour zot maryaz.b Zot rekonnet ki se Zeova ki ti konmans sa laranzman pour de dimoun marye e se li menm ki fourni bann konsey saz dan son parol Labib pour reisi e ere dan lavi maryaz. (Zenez 2:22-24; Mark 10:6-9; Efezyen 5:22-33) Laplipar koup i kontan ki lezot, fanmiy oubyen zanmi, i la prezan pour sa levennman zwaye. Selman, konman nou devret vwar tou sa bann diferan prosedir legal ek koutim lokal? Sa lartik pou koz lo serten sitiasyon dan diferan rezyon. Serten sa bann koutim i kapab tre diferan avek sa ki ou konnen oubyen avek sa ki abitye ganny fer kot ou reste. Toudmenm, ou pou vwar serten prensip oubyen laspe ki enportan pour tou serviter Bondye.

Maryaz onorab—Maryaz legal

6, 7. Akoz en maryaz legal i enportan pour nou, e konman nou demontre sa?

⁶ Menm si se Zeova ki’n konmans laranzman maryaz, bann gouvernman imen i annan drwa pour annan en serten kontrol lo sa ki bann ki anvi marye i fer. Sa i akseptab akoz Zezi ti dir: “Rann Sezar sa ki pour Sezar, e Bondye sa ki pour Bondye.” (Mark 12:17) Zapot Pol ti osi dir: “Tou dimoun i devre soumet li avek bann lotorite ki gouvernen, parski napa okenn lotorite amwen ki Bondye in etabli li, e bann lotorite ki egziste i ganny etabli par Bondye.”—Romen 13:1; Tit 3:1.

⁷ Sezar oubyen gouvernman i deside lekel ki kapab marye dan laplipar pei. Pour sa rezon si de Kretyen ki annan drwa marye dapre Labib i anvi marye, zot swiv egzakteman sa ki lalwa i dir. Dan serten landrwa, sa i vedir obtenir en sertifika maryaz, pas devan en zofisye gouvernman, oubyen anrezistre sa maryaz. Kan Sezar Ogis ti ordonn tou dimoun pour “anrezistre,” Mari ek Zozef ti obeir e al Betleenm pour “anrezistre” zot.—Lik 2:1-5.

8. Ki kantite serye maryaz i ete, e ki mannyer Temwen Zeova i montre sa?

⁸ Ler de Kretyen i marye dan en fason legal e akseptab, zot maryaz oubyen langazman i valid devan Bondye. Alors, Temwen Zeova pa fer plis ki en seremoni maryaz, zot pa refer zot bann ve maryaz par egzanp zour zot 25 oubyen 50 an maryaz. (Matye 5:37) (Serten legliz pa aksepte bann maryaz biro akoz zot dir sa maryaz pa valid si i pa’n ganny fer par en pret oubyen en paster ki deklar sa de dimoun msye ek madanm.) Dan plizyer pei, gouvernman i permet ki en minis Temwen Zeova i marye de dimoun. Si sa i posib, sa frer pou anvi marye sa de dimoun anmenmtan ki en diskour i ganny donnen kot Lasal Rwayonm. Lasal Rwayonm i landrwa kot nou ador Bondye e i en landrwa apropriye pour donn en diskour maryaz, en laranzman ki Zeova ti konmanse.

9. (a) Si maryaz i bezwen ganny fer devan lotorite sivil, ki en koup Kretyen i kapab fer? (b) Ki mannyer bann ansyen i kapab enplike dan preparasyon maryaz?

⁹ Dan lezot pei, lalwa i demande ki sa koup i marye dan en biro gouvernman, swa dan en biro dan sa lavil oubyen devan en zofisye gouvernman. Bann Kretyen i kontan pour fer sa prosedir legal epi pour annan en diskour kot Lasal Rwayonm menm zour oubyen son zour answit. (Zot pa pou anvi les pase plizyer zour ant seremoni legal ek diskour biblik akoz zot in fini marye devan Bondye e devan zonm, sa i enkli kongregasyon Kretyen.) Si en koup i anvi, apre sa seremoni legal, ganny en diskour dan en serten Lasal Rwayonm, zot bezwen demann permisyon davans avek bann ansyen ki servi lo Komite Servis Kongregasyon. Sa bann sirveyan pou fer sir ki sa nouvo koup i annan en bon repitasyon e ki diskour maryaz pa pou enterfer avek lezot renyon oubyen lezot progranm ki annan kot sa lasal. (1 Korentyen 14:33, 40) Zot pou osi tyeke okenn preparasyon ki sa koup i swete fer dan sa lasal e si i pou annan en lanons ki ganny fer avek kongregasyon.

10. Si i annan en seremoni sivil, ki sanzman i pou fer dan diskour maryaz?

¹⁰ Sa ansyen ki donn sa diskour maryaz pou fer son mye pour ki sa diskour i batir lezot spirityelman, i onorab e ganny donnen dan en fason amikal. Si sa koup in marye devan en zofisye gouvernman avan diskour, sa frer pou dir lodyans ki sa koup in marye dapre lalwa gouvernman. Si sa koup pa’n pronons bann ve maryaz dan seremoni sivil, zot pou kapab fer li pandan sa diskour.c Si sa seremoni devan en zofisye gouvernman ti enkli sa bann ve, me ki sa nouvo koup marye i anvi pronons bann ve devan Zeova ek kongregasyon, zot pou fer li dan en fason ki montre zot konsyan ki zot in deza ‘ini ansanm’ devan sa zofisye gouvernman. Olye dir ‘Mon pran ou . . .’ zot pou dir ‘Mon’n pran ou . . .’—Matye 19:6; 22:21.

11. Dan serten landrwa ki mannyer dimoun i marye e konman zot kapab fer sa diskour maryaz?

¹¹ Dan serten landrwa, lalwa pa ekspekte ki en koup i fer okenn seremoni maryaz, menm devan en zofisye gouvernman. Zot marye zour ki zot ranpli, sinyen e donn en form pour anrezistre zot maryaz avek en zofisye. Alors sa maryaz i anrezistre, sa koup in marye, dat zot maryaz i dat ki lo sa form. Parey i ti ganny dir pli boner, sa koup ki aprezan marye i kapab al kot Lasal Rwayonm deswit pour annan en diskour maryaz. Sa frer matir ki’n ganny swazir pour donn sa diskour pou dir tou dimoun prezan ki sa koup in marye akoz zot fek ranpli sa form. Zot pou pronons bann ve parey paragraf 10 ek sa not i eksplike. Bann ki prezan kot Lasal Rwayonm pou rezwir avek sa koup e osi benefisye avek bann konsey ki sorti dan Parol Bondye.—Kantik Salomon 3:11.

Maryaz sivil ek Maryaz Koutim

12. Kisisa en maryaz koutim, kwa ki bon fer apre sa?

¹² Dan serten pei, bann koup i marye dapre bann maryaz koutim oubyen tribi. Nou pa pe koz lo de dimoun ki pe menaz, ni osi lo serten maryaz (common-law) ki pa toutafe legal devan lalwa.d Nou pe koz lo en maryaz dapre koutim etabli par en serten tribi oubyen en pei. Sa i kapab enplik en donasyon ki bezwen ganny aksepte e konpletman peye, alor sa koup pou marye legalman e dapre Labib. Dan sa bann landrwa, gouvernman i vwar sa bann maryaz legal, valid e serye. Laplipar-di-tan i posib pour rikord oubyen anrezistre sa maryaz, e alor sa koup i kapab ganny en sertifika ofisyel. Sa i kapab vin en proteksyon pour sa koup, pour sa madanm si sa msye i mor, e oubyen pour bann fitir zanfan. Kongregasyon pou ankouraz zot pour anrezistre sa maryaz koutim osito posib. I enteresan ki dan Lalwa Moiz, i probab ki bann maryaz ek nesans ti ganny rikorde ofisyelman.—Matye 1:1-16.

13. Apre en maryaz koutim, ki mannyer diskour maryaz pou deroule?

¹³ Sa koup i ganny konsidere konman marye legalman zour ki zot fer sa seremoni. Parey nou ti dir pli boner sa koup Kretyen pou kapab annan en diskour avek bann ve maryaz kot Lasal Rwayonm. Si i leka, sa orater pou dir ki sa koup in fini marye dapre lalwa gouvernman. I pou annan zis en diskour. I annan zis en maryaz, setadir sa maryaz koutim oubyen dan tribi. Sa maryaz i legal e i annan en sel diskour baze lo Labib. Ler nou fer tou pour ki sa maryaz i ganny fer menm zour avek diskour maryaz oubyen preski osito, sa i ede pour ki sa maryaz Kretyen i onorab dan sa kominote.

14. Ki en Kretyen i kapab fer si tou le de maryaz sivil e maryaz koutim i posib?

¹⁴ Dan serten pei kot maryaz koutim i legal, i osi annan posibilite pour fer en maryaz sivil devan en zofisye gouvernman kot zot pou kapab pronons bann ve e sinyen pour anrezistre zot maryaz. Serten i prefer sa maryaz ki sa enn dapre koutim. Me i pa neseser pour fer tou le de, akoz tou le de i valid legalman. Sa ki’n ganny dir dan paragraf 9 ek 10 i osi aplikab dan sa ka. Sa ki enportan se ki sa koup i marye devan zonm e devan Bondye dan en fason onorab.—Lik 20:25; 1 Pyer 2:13, 14.

Kontinyen onor Maryaz

15, 16. Ki mannyer loner ek respe i esansyel dan maryaz?

¹⁵ Ler en problenm ti leve dan maryaz en lerwa Pers, Memoukann, premye konseye ti sizer en bon keksoz avek lerwa. I ti dir ki ‘tou bann madanm i devret onor zot mari.’ (Ester 1:20) Pour bann Kretyen marye, pa bezwen sa konsey i sorti kot en lerwa imen, akoz bann madanm Kretyen i anvi onor zot mari. Pareyman, bann mari Kretyen i ‘tret zot madanm avek respe’ e zot felisit zot. (Proverb 31:11, 30; 1 Pyer 3:7) Demontre sa respe oubyen loner pa konmans apre plizyer lannen maryaz, me plito okonmansman menm, zour maryaz.

¹⁶ Pa zis sa msye ek sa madanm ki devret demontre respe zour zot maryaz. Si en ansyen i donn en diskour maryaz, sa diskour osi i devret demontre sa respe. Diskour maryaz i devret ganny adrese avek sa koup. Pour demontre sa respe, sa frer pa pou servi en kantite fars oubyen dikton. I pli bon osi si i pa koz lo bann keksoz ki tro personnel ki kapab anbaras sa koup ouswa bann dan lodyans. Plito i pou sey koz avek santiman e i pou batir son lodyans par met an valer sa Enn ki’n konmans maryaz ek Son bann konsey. Dan sa fason, en tel diskour donnen avek respe pou ede pour ki sa maryaz i onor Zeova.

17. Akoz maryaz i annan en laspe legal?

¹⁷ Probableman ou’n remarke ki i annan en bon pe detay legal lo maryaz dan sa lartik. Serten laspe i kapab pa aplik dan ou pei. Selman nou tou nou devret realize ki kantite enportan i ete pour bann Temwen Zeova ki bann laranzman maryaz i ganny fer an armoni avek bann lalwa lokal, avek sa ki gouvernman i ekspekte kot nou reste. (Lik 20:25) Pol ti ensiste: “Rann sakenn sa ki zot devre: ki swa taks, . . . ki swa respe, ki swa loner, pey tou selon zot merit.” (Romen 13:7) I toutafe normal ki bann Kretyen depi zour maryaz i demontre respe pour laranzman ki Bondye in met an plas pour lemoman.

18. Ki sa lot laspe ki pa obligatwar dan maryaz ki nou bezwen byen veye, e kote nou kapab trouv sa lenformasyon?

¹⁸ Bokou maryaz Kretyen i swiv avek en rankont, swa en repa oubyen en resepsyon. Ou rapel ki Zezi ti kontan pour la zour en resepsyon maryaz. Si i annan en tel fonksyon, ki mannyer konsey Labib i kapab ed nou fer sir ki sa rankont osi pou demontre respe pour Bondye e byen reprezant sa nouvo koup ek kongregasyon Kretyen? Lot lartik pou egzamin sa size.e

Demontre ou Lafwa par Lafason ki ou viv

“Lafwa . . . si i pa akonpannyen par laksyon, i mor.”—ZAK 2:17.

1. Akoz bann premye Kretyen ti vey lo zot lafwa e osi zot aksyon?

AN ZENERAL bann premye Kretyen ti demontre zot lafwa par lafason ki zot ti viv. Disip Zak ti konsey tou Kretyen: “Pa zis ekout laparol me osi met li an pratik.” Epi i ti dir: “Parey, lekor san lespri i mor, demenm, lafwa san bann laksyon i mor.” (Zak 1:22; 2:26) Apepre 35 an apre sa, bokou Kretyen ti ankor pe demontre zot lafwa par bann bon aksyon. Selman i regretab ki i pa ti leka avek zot tou. Zezi ti felisit kongregasyon Smirn. Parkont, avek en bon pe dan kongregasyon Sard, i ti dir: “Mon konn tou ou bann aktivite, mon konnen ki ou annan repitasyon ki ou vivan, me ou’n mor.”—Revelasyon 2:8-11; 3:1.

2. Ki kestyon bann Kretyen i devret demann zot lekor konsernan zot lafwa?

² Pour sa rezon, Zezi ti ankouraz sa bann dan kongregasyon Sard, ensi ki tou bann ki ti pou lir sa bann parol plitar, pour prouve ki zot pa’n perdi zot premye lanmour pour laverite e ki zot eveye spirityelman. (Revelasyon 3:2, 3) Nou tou nou kapab demann nou lekor: ‘Be mwan, ki mon aksyon i prouve? Eski mon aksyon i montre ki mon donn mon meyer dan tou sa ki mon fer pour demontre mon lafwa, menm dan serten laspe mon lavi ki pa direkteman relye avek predikasyon ek bann renyon kongregasyon?’ (Lik 16:10) Nou ti kapab koz lo bokou laspe, me annou egzamin zis en sel topik: bann rankont e spesyalman bann resepsyon maryaz.

Bann pti Rankont

3. Ki Labib i dir lo bann rankont?

³ Laplipar nou, nou kontan pour ganny envite bann rankont avek bann Kretyen zwaye. Zeova i en Bondye ere ki kontan ki son bann serviter i dan lazwa. (1 Timote 1:11) Salomon ti ganny enspire par Bondye pour ekrir: “Mwan osi, mon’n kontan rezwir, akoz napa nanryen pli byen pour bann imen partou lo later ki manze e bwar e rezwir, e ki sa i al avek zot dir travay diran toulezour zot lavi.” (Eklezyast 3:1, 4, 13; 8:15) Nou kapab eksperyans sa lazwa dan bann repa an fanmiy oubyen bann pti rankont ant zanmi Kretyen.—Zob 1:4, 5, 18; Lik 10:38-42; 14:12-14.

4. Si en dimoun i organiz en rankont, lo kwa i devret reflesir?

⁴ Si ou pe organiz en pti rankont e ou ki responsab, ou devret mazinen davans ki mannyer i pou deroule e menm si ou pe envit zis ennde zanmi Temwen pour en repa oubyen pour koz koze. (Romen 12:13) Ou pou anvi fer “tou keksoz byen e avek lord” gras a “lasazes ki sorti dan lesyel.” (1 Korentyen 14:40; Zak 3:17) Zapot Pol ti ekrir: “Ki ou manze, oubyen ki ou bwar, ou nenport kwa ki ou fer, fer tou pour laglwar Bondye. Viv dan en fason ki ou pa eskandaliz personn.” (1 Korentyen 10:31, 32) Dan ki laspe nou devret fer atansyon? Reflesir davans lo sa bann pwen pou ed nou ek nou bann envite pour montre nou lafwa par bann bon aksyon.—Romen 12:2.

Ki kalite Rankont?

5. Ler nou organiz en rankont, akoz i enportan pour byen reflesir si nou pou servi lalkol e zwe lanmizik?

⁵ Bokou ki organiz en rankont, i demann zot lekor si zot pou servi lalkol. Pa lalkol ki fer en rankont gou e ankourazan. Par egzanp Zezi ti ofer en repa avek en gran group ki ti vin kot Zezi ti ete e sa zour i ti fer dipen ek pwason vin en kantite. I pa dir si Zezi ti fer mirak pour donn zot diven menm si i ti kapab fer li. (Matye 14:14-21) Si ou deside servi lalkol pour ou bann envite, veye ki i pa tro bokou e ki bann ki prefere pa bwar lalkol i ganny lezot keksoz enteresan pour bwar. (1 Timote 3:2, 3, 8; 5:23; 1 Pyer 4:3) Deplis pa zanmen fors personn pour bwar akoz lalkol i kapab pike parey “en serpan.” (Proverb 23:29-32) Be prezan lanmizik ek sanson? Si ou pou zwe lanmizik, i enportan ki ou byen swazir kalite sanson, sa i enkli lanmizik li menm me osi parol sa bann sanson. (Kolosyen 3:8; Zak 1:21) Plizyer Kretyen in dakor ki zwe bann Kingdom Melodies oubyen sant bann kantik i fer sa rankont byen gou. (Efezyen 5:19, 20) Vey osi ki zot pa ouver lanmizik tro for, ki fer difisil pour fer en konversasyon oubyen ki deranz bann vwazen.—Matye 7:12.

6. Ki mannyer sa enn ki organiz en rankont i kapab montre ki son lafwa i vivan an sa ki konsern bann konversasyon ek lezot aktivite?

⁶ Dan sa bann rankont, bann Kretyen i kapab koz lo diferan size, lir for serten lenformasyon oubyen rakont bann leksperyans enteresan. Si konversasyon pe al lo en size pa apropriye, sa enn ki’n organize i kapab sanz konversasyon. I pa neseser ki serten i fer tou koze. Si i leka, avek bon zizman sa enn responsab i kapab li menm koze e sanz topik, kekfwa esey fer koze bann zenn oubyen koz lo en topik ki tou dimoun i kapab koz lo la. Zenn konman vye pou kontan en bon konversasyon koumsa. Ou ki organiz sa rankont, si ou diriz sitiasyon avek bon zizman, tou dimoun pou vwar ki ou rezonnab. (Filipyen 4:5, NW) Zot pou remarke ki ou annan en lafwa vivan, ki remarkab dan tou laspe ou lavi.

Maryaz ek Resepsyon Maryaz

7. Akoz i enportan pour byen prepar en maryaz ek son resepsyon?

⁷ En maryaz Kretyen i en levennman spesyal kot tou dimoun i kontan. Bann serviter Bondye letan lontan, enkli Zezi ek son disip, ti kontan pour la prezan zour maryaz ek son resepsyon. (Zenez 29:21, 22; Zan 2:1, 2) Selman dan letan modern, i evidan ki en zefor spesyal i bezwen ganny mete dan preparasyon sa resepsyon maryaz si nou oule ki sa levennman i reflekte bon zizman ek latitid rezonnab en Kretyen. Bann resepsyon maryaz i en keksoz normal dan lavi ki donn loportinite en Kretyen pour demontre son lafwa.

8, 9. Akoz serten maryaz i reflekte sa ki 1 Zan 2:16, 17 i dir?

⁸ Pour bokou dimoun ki pa konnen oubyen ki pa enterese avek bann prensip Labib, maryaz i en lokazyon pour fer oubyen aksepte en bann letalaz. Dan en magazin Lerop, en nouvel marye ti dir sa lo son maryaz “rwayal”: ‘Nou ti dan en kales avek son kat seval, 12 kales avek zot seval ti pe swiv nou e enn ankor avek en benn ki ti pe zwe lanmizik. Apre nou ti annan en dinen premyer klas, pli zoli lanmizik, i ti vreman lo la. I ti parey mon ti anvi, sa zour mon ki ti larenn.’

⁹ Menm si koutim pa parey dan en pei pour en lot, sa bann remark i konfirm sa ki zapot Zan ti ekrir: “Tou sa ki dan lemonn: dezir natir imen, dezir atraver nou lizye ek lorgey dan lavi toulezour, tousala pa sorti kot nou Papa me i sorti dan lemonn.” Eski ou imazin en koup Kretyen matir ki anvi en maryaz “rwayal” avek en resepsyon ekstravagan parey dan bann roman? Okontrer, zot pwennvi i devret pran aker ki “sa ki fer lavolonte Bondye i reste eternelman.”—1 Zan 2:16, 17.

10. (a) Pour ki en maryaz i pas byen, akoz en bon preparasyon i enportan? (b) Ki mannyer zot pou pran desizyon konsernan bann envite?

¹⁰ Bann koup Kretyen i anvi realis e rezonnab, e pour sa, Labib i kapab ed zot. Menm si zour maryaz i enportan, zot realize ki sa i senpleman konmansman zot lavi maryaz e ki zot annan lavi eternel devan zot. I pa en lobligasyon pour fer en gro maryaz. Si zot anvi fer en resepsyon, zot pou anvi estimen konbyen i pou kout zot e ki kalite resepsyon zot oule. (Lik 14:28) Dan zot lavi maryaz, dapre Labib sa msye pou sef lakour. (1 Korentyen 11:3; Efezyen 5:22, 23) Alors i responsab pour sa ki pou deroule pandan sa resepsyon maryaz. Byensir i toutafe normal ki i pran an konsiderasyon santiman son fitir madanm lo bann keksoz parey lekel zot oule oubyen zot kapab envite. Petet i pa pou posib pour envit tou zot zanmi ek fanmiy e alor zot pou bezwen fer serten desizyon ki demontre ki zot rezonnab. Sa koup i devret asire ki menm si zot pa kapab envit tou bann Kretyen ki zot konnen, zot pou konpran e zot pa pou ofanse.—Eklezyast 7:9.

“Responsab Lafet”

11. Ki rol sa “responsab lafet” i zwe dan en resepsyon maryaz?

¹¹ Si en koup i deside pour fer en resepsyon maryaz, ki mannyer zot kapab fer sir ki sa lokazyon i gard nou bon repitasyon Kretyen? Zour rankont dan lavil Kana, i mansyonnen ki i ti annan “en responsab lafet,” tre probab en serviter Zeova responsab. Pour en bon pe letan, Temwen Zeova in vwar li saz pour fer sanmenm. (Zan 2:9, 10) Pareyman, en nouvo marye responsab pou swazir en frer Kretyen ki matir spirityelman pour zwe sa rol enportan. Ler sa frer responsab resepsyon in konpran bann preferans sa frer ki pe al marye, alor i pou kapab okip bann detay avan e pandan sa resepsyon.

12. Ki sa frer ki pe marye i devret veye konsernan lalkol?

¹² An armoni avek sa ki paragraf 5 i dir, serten koup i deside pour pa servi lalkol pour evit bann labi ki ti pou gat lazwa ek sikse sa levennman. (Romen 13:13; 1 Korentyen 5:11) Selman si zot deside pour servi lalkol, sa nouvo marye i devret fer sir ki lalkol i ganny servi avek kontrol par tou dimoun. Dan maryaz dan lavil Kana kot Zezi ti prezan, ti annan diven. Zezi ti menm fourni en bon kalite diven. I enteresan ki responsab sa lafet ti dir: “Tou dimoun i servi pli bon diven premye, e ler bann envite in bwar en kantite la ou servi diven ordiner, me ou, ou’n gard bon diven ziska dernyen moman.” (Zan 2:10) I evidan ki Zezi pa ti ankouraz bwar an ekse, akoz i ti vwar sa mal. (Lik 12:45, 46) Ler sa responsab ti dir i sirprann avek sa bon kalite diven, i ti dir i ti’n deza vwar dan lezot resepsyon maryaz ki bann envite ti bwar pour sou. (Akt 2:15; 1 Tesalonisyen 5:7) Alors tou le de, sa frer ki marye ek sa lot frer ki responsab resepsyon i devret veye ki sa konsey byen kler i ganny aplike: “Pa bezwen soul zot avek diven, akoz sa pou zis antrenn zot dan en lavi dezordonnen.”—Efezyen 5:18; Proverb 20:1; Osea 4:11.

13. Ki en koup i devret fer sir si zot deside pour zwe lanmizik, e akoz?

¹³ Parey lezot rankont, si zot deside pour zwe lanmizik, i enportan ki zot veye ki lanmizik pa ganny zwe sitan for ki difisil pour annan en konversasyon. En ansyen ti dir: “Parler, pli tar pe fer e dimoun pe byen koze oubyen dimoun pe konmans danse, pli lanmizik pe zwe pli for. Okonmansman lanmizik ti zwe byen normal, me finalman zot ouver sitan for ki ou vwar li difisil pour konpran sa ki lezot pe dir. En resepsyon maryaz i en bon lokazyon pour koz koze. I vreman domaz si lanmizik i telman for ki ou pa kapab profit sa loportinite!” Dan bann ka parey, sa nouvo marye ek sa frer responsab pou bezwen pran aksyon e pa les bann ki okip lanmizik, ki swa zot in ganny peye oubyen non, pour kontrol ki kalite lanmizik zot zwe e kantite for i ganny zwe. Pol ti ekrir: “Dan tou sa ki zot fer e dir, fer tou dan non Senyer Zezi.” (Kolosyen 3:17) Ler bann envite i retourn kot zot, eski zot pou mazin en lanmizik ki ti demontre ki sa koup ti fer tou dan non Zezi? I devret leka.

14. Ki bann Kretyen i devret kapab rapel lo en maryaz?

¹⁴ Dimoun pou rapel avek plezir en maryaz byen organize. Adam ek Edyta ki’n marye depi 30 an, i dir sa lo en maryaz: “Ou ti vreman santi ki ti annan en lanbyans Kretyen. Ti annan bann kantik pour loue Zeova e osi lezot bon divertisman. Se pa lanmizik ek ladans ki ti pli enportan. I ti gou e ankourazan, tou keksoz ti an armoni avek bann prensip Labib.” Alor i evidan ki sa nouvo koup i kapab fer bokou pour demontre zot lafwa par bann bon aksyon.

Kado Maryaz

15. Konsernan bann kado maryaz, ki konsey Labib ki aplikab?

¹⁵ Dan bokou pei, i en labitid pour bann envite ek fanmiy ofer en kado sa nouvo koup. Si ou deside fer sa, ki ou devret mazinen? Rapel sa ki zapot Zan ti dir lo “lorgey dan lavi toulezour.” I ti relye sa latitid avek sa “lemonn ki pou disparet” me pa avek latitid en Kretyen ki demontre son lafwa. (1 Zan 2:16, 17) Si nou pran kont sa ki zapot Zan ti dir, eski i pou en bon lide pour sa nouvo koup dir lekel ki’n ofer tel tel kado? Bann Kretyen sorti Masedwann ek Akai ti anvoy bann kontribisyon pour kongregasyon Zerizalenm. Me napa okenn levidans ki montre ki zot ti dir lekel egzakteman ki ti donn sa bann kontribisyon. (Romen 15:26) Bokou Kretyen ki’n ofer en kado ti a pli kontan ki lezot pa konnen olye atir latansyon lo zot menm. Alor ou kapab revwar konsey Zezi dan Matye 6:1-4.

16. Ki mannyer bann nouvo marye i kapab respekte santiman lezot an rapor avek bann kado maryaz?

¹⁶ Si non sa bann ki’n fer en kado i ganny dir, sa i kapab devlop dan en paryaz pour konnen lekel ki’n donn pli zoli kado oubyen sa enn pli ser. Pour sa rezon, en nouvo koup Kretyen ki saz pa pou fer sa e dan sa fason pa pou anbaras bann ki pa’n kapab ofer en kado. (Galat 5:26; 6:10) I vre napa nanryen mal pour sa nouvo koup konnen lekel ki’n ofer zot en kado. Kekfwa zot pou konn sa avek en kart ki vin avek sa kado, me i pa neseser lir devan dimoun sa kart. Osi menm ler nou pe aste, donn oubyen resevwar kado, nou kapab montre nou lafwa par nou aksyon dan bann domenn nou lavi prive.a

17. Ki lobzektif bann Kretyen an sa ki konsern zot lafwa ek aksyon?

¹⁷ Nou bezwen fer plis ki annan en lavi drwat, asiste bann renyon Kretyen e partisip dan predikasyon pour demontre nou lafwa. Annou annan en lafwa vivan ki remarkab dan tou sa ki nou fer. Wi, nou kapab demontre nou lafwa par bann “aktivite parfe,” menm dan bann domenn nou lavi parey sa ki nou fek diskite.—Revelasyon 3:2.

18. Ki mannyer Zan 13:17 i kapab vin vre an rapor avek bann rankont oubyen resepsyon maryaz?

¹⁸ Apre ki Zezi ti’n kit en bon legzanp pour son bann zapot ler i ti’n abes li e lav zot lipye, Zezi ti dir: “Aprezan ki zot konn sa, zot ere si zot met li an pratik.” (Zan 13:4-17) Kot nou reste konmela, i probab ki i pa neseser oubyen en labitid pour lav lipye en lot dimoun, ouswa nou bann envite. Me parey nou’n vwar dan sa lartik, i annan lezot laspe dan lavi parey bann rankont oubyen resepsyon maryaz kot nou kapab demontre nou lafwa par bann aksyon ki ranpli avek lanmour ek konpasyon pour lezot. Sa i leka si nou pe al marye, si nou asiste en maryaz oubyen lezot rankont ant Kretyen ki anvi demontre zot lafwa par zot aksyon.