Lapriyer 1

Akoz nou bezwen priye?

LAPRIYER. Pa bokou size dan Labib ki enteres bokou dimoun parey sa enn. Reflesir lo set kestyon ki dimoun i souvan demande lo lapriyer; apre zwenn ansanm avek nou pour egzamin larepons ki Labib i donnen. Sa bann lartik in ganny fer pour ed ou konmans priye si ou pa abitye priye, oubyen pour fer bann lapriyer ki Bondye i ekoute.

PARTOU dan lemonn, dan tou kiltir ek larelizyon, dimoun i priye. Zot priye kan zot tousel e zot osi priy an group. Zot priy dan bann legliz, tanp, sinagog, moske e kot bann lagrot. I kapab ki zot servi bann karpet, saple, zimaz, liv lapriyer, lapriyer ki’n ganny ekrir lo en pti bord ki zot met anpandan oubyen lezot lobze.

Lapriyer i fer imen inik parmi tou lezot form lavi ki egziste lo sa later. I vre, en kantite keksoz ki nou annan, zannimo osi i annan. Parey zot nou bezwen ler, delo ek manze. Parey zot, nou ne, nou viv e nou mor. (Eklezyast 3:19) Me zis bann imen ki priye. Akoz sa?

Petet larepons pli senp se ki nou santi nou annan sa bezwen pour priye. Apre tou, lapriyer i zeneralman ganny vwar konman en fason pour dimoun antre an kontak avek en keksoz ki zot konsider konman sen oubyen sakre e eternel. Labib i fer resorti ki nou’n ganny kree avek sa dezir. (Eklezyast 3:11) En zour Zezi Kri ti dir: “Byennere bann ki pov an-espri [oubyen “konsyan zot bezwen spirityel,” NW].”—Matye 5:3.

Si i pa ti akoz sa bezwen spirityel ki nou annan, ki mannyer nou ti pou eksplike akoz i annan tou sa bann gran gran batiman ek lobze relizye, e akoz dimoun i pas en kantite letan dan lapriyer? Byensir, serten dimoun i esey satisfer zot bezwen spirityel zot menm oubyen zot rod led lezot dimoun. Me, pa ou pou dakor ki imen napa sa abilite pour antyerman satisfer zot bezwen spirityel? Nou vreman frazil, nou lavi i kourt e nou pa kapab vwar lwen. Zis en dimoun ki pli saz, pli pwisan, ki eternel ki kapab donn nou sa ki nou bezwen. Me, ki bezwen spirityel ki pous nou pour priye?

Reflesir en pe: Eski ou’n deza vreman anvi ganny gidans, lasazes oubyen larepons bann kestyon ki paret difisil pour imen konpran? Eski ou’n deza santi ki ou ti bezwen rekonfor kan ou ti pe pas dan en sityasyon byen difisil? Oubyen eski ou ti santi ki ou ti bezwen gidans akoz ou ti annan en desizyon vreman enportan pour fer? Oubyen eski ou ti dekouraze akoz ou ti santi ou koupab e bezwen ganny pardonnen?

Dapre Labib, tousala i bann moman ki nou kapab priye. Ler nou pe koz lo lapriyer, Labib i sa liv ki nou pli kapab depan lo la. Lapriyer plizyer zonm ek fanm fidel in ganny rikorde ladan. Zot ti priye pour ganny rekonfor, gidans, pardon e pour ganny larepons bann kestyon tre konplike.—Psonm 23:3; 71:21; Danyel 9:4, 5, 19; Abakouk 1:3.

Menm si sa bann lapriyer ti diferan, zot ti annan en keksoz an komen. Dan lapriyer sa bann dimoun, ti annan en laspe enportan ki ti fer Bondye ekout zot lapriyer, en keksoz ki souvan ganny inyore oubyen pa ganny rekonnet dan sa lemonn ozordi. Zot ti konnen avek ki zot ti devret priye.

Lapriyer 2

Avek ki nou devret priye?

ESKI Bondye i ekout tou lapriyer menm si i ganny adrese lo diferan non? Dan sa lemonn ki nou pe viv ozordi, i tre popiler pour dimoun mazin koumsa. Bokou dimoun ki kontan afilye avek diferan larelizyon an menm tan e ki ti a voudre ki tou larelizyon i ganny aksepte malgre zot diferans i mazin koumsa. Me, eski sa i vre?

Labib i eksplike ki laplipar di tan en kantite lapriyer pa ganny adrese avek sa enn ki nou devret priy avek. Dan lepase, kan Labib ti ganny ekrir, i ti popiler pour dimoun fer lapriyer avek bann stati. Me, plizyer fwa Bondye ti averti zot kont sa kalite pratik. Par egzanp, Psonm 115:4-6 i dir sa konsernan bann zidol: “Zorey zot annan, me zot pa kapab tande.” Sa pwen i kler. Eski i vo lapenn pour priy avek en bondye ki pa pou zanmen tann ou?

En resi Labib byen detaye i eklersi nou plis lo sa size. Eliya ki ti en vre profet ti demann bann fo profet Baal pour priy avek zot bondye e li apre i ti pou priy avek son Bondye. I ti dir zot ki sa vre Bondye ti pou reponn me sa enn fo pa ti pou reponn. Bann profet Baal ti aksepte pour fer sa. Zot ti konmans fer bann gran gran lapriyer entans, menm avek leokri, me nanryen pa ti arive! Sa resi i montre ki “ti napa personn ki ti reponn, e personn pa ti pe port latansyon.” (1 Lerwa 18:29) Me ki ti arive kan Eliya ti priye?

Zis apre ki Eliya ti’n fini priye, son Bondye ti reponn li. I ti fer dife sorti dan lesyel bril sa lofrann ki Eliya ti’n prepare. Ki diferans ti annan ant sa de lapriyer? I annan en lide enportan dan lapriyer ki Eliya ti fer ki ganny rikorde dan 1 Lerwa 18:36, 37. I en lapriyer byen kourt ki ti annan zis apepre 30 mo dan son langaz orizinal, Ebre. Pourtan, dan sa detrwa mo, Eliya ti adres Bondye trwa fwa par son prop non, Zeova.

Baal ki vedir “met,” ti bondye bann Kananeen. I ti annan diferan fason ki zot ti apel sa menm bondye. Me par kont, sa non Zeova i inik, i pour zis en Personnaz dan liniver antye. Sa Bondye ti dir avek son pep: “Mwan, mon Zeova. Sa i mon non; e mon pa pou donn mon laglwar personn.”—Izai 42:8.

Eski tou le de lapriyer ti ganny ekoute? Ladorasyon Baal ti enplik fer prostitisyon e menm sakrifye dimoun, bann pratik ki ti degradan. Tou le kontrer avek sa, Zeova ti enstrir son pep pour ador li dan en fason pli onorab. Sa kalite ladorasyon ti liber zot avek sa bann pratik degradan. Alor reflesir lo sa: Si ou ti pe adres en let spesifikman avek en zanmi ki annan en bon repitasyon, eski ou ti pou ekspekte ki sa let i ganny delivre kot en lot dimoun ki son repitasyon i totalman diferan avek sa ki pour ou zanmi? Definitivman non!

Si ou priy Zeova, ou pe aktyelman priy avek ou Kreater, Papa limanite an antye.a Dan son lapriyer profet Izai ti dir: “O Zeova, ou, ou nou Papa.” (Izai 63:16) Alor, sa Enn, i li menm li ki Zezi Kri ti pe koz lo la kan i ti dir avek son bann disip: “Mon pe al kot mon Papa ki osi zot Papa, mon Bondye, ki osi zot Bondye.” (Zan 20:17) Zeova i Papa Zezi. I sa Bondye ki Zezi ti priy avek e avek ki i ti ansenny son bann disip pour priye.—Matye 6:9.

Eski Labib i ankouraz nou pour priy avek Zezi, Mari, bann sen oubyen lanz? Non, i dir nou priy zis avek Zeova. Annou vwar de rezon akoz. Premyerman lapriyer i en form ladorasyon e Labib i dir ki zis Zeova tousel ki devret ganny adore. (Egzod 20:5) Dezyenmman, Labib i fer resorti ki se li ki ekout lapriyer. (Psonm 65:2) Menm si Zeova i zenerezman partaz bann responsabilite avek lezot, sa i en responsabilite ki i pa zanmen donn en lot dimoun pour fer. I sa Bondye ki promet pour personnelman ekout nou lapriyer.

Alor si ou anvi Bondye i ekout ou lapriyer, pa oubliye ki: “Sa ki pou kriy Senyer, [Zeova] pou ganny sove.” (Akt 2:21) Me, eski Zeova i ekout tou lapriyer san okenn kondisyon? Eski i annan ankor keksoz ki nou bezwen konnen si nou anvi Zeova ki i ekout nou lapriyer?

[Not anba lo paz]

[Portre lo paz 5]

Lefet ki zis lapriyer profet Eliya ki ti ganny reponn, sa i prouve ki pa tou lapriyer ki Bondye i ekoute

Lapriyer 3

Konman nou devret priye?

KOT i konsern lapriyer, en kantite tradisyon relizye i met plis lanfaz lo son laspe fizik. Zot plizoumwen konsantre lo pozisyon ki en dimoun i devret priye, parol ki i dir ek bann rityel. Me par kont, Labib i ed nou pour met tousala dekote e konsantre lo lezot laspe pli enportan sa kestyon, “Ki mannyer nou devret priye?”

Labib i mansyonn bann serviter fidel Bondye ki ti priy dan diferan landrwa ek pozisyon. Dapre sirkonstans ki zot ti ladan zot ti priy swa an silans oubyen aotvwa. Ler zot ti priye, zot ti swa get dan lesyel oubyen zot ti prosternen. Olye servi zimaz, saple oubyen liv lapriyer pour ed zot priye, zot ti senpleman eksprim zot senserman dan zot prop mo. Akoz Bondye ti ekout zot lapriyer?

Parey in ganny mansyonnen dan lartik avan, zot ti adres zot lapriyer zis avek Bondye, Zeova. I annan en lot fakter enportan. Nou lir sa dan 1 Zan 5:14: “Sa se lasirans ki nou annan dan li: si nou demann keksoz dapre son lavolonte, i pou ekout nou.” Nou lapriyer i bezwen an armoni avek lavolonte Bondye. Ki sa i vedir?

Pour nou kapab priy an armoni avek lavolonte Bondye nou bezwen konn son lavolonte. I vreman enportan ki nou etidye Labib pour konnen ki nou pour priy lo la. Eski sa i vedir ki Bondye pa pou anvi ekout nou si nou napa bokou konnesans lo Labib? Non. Me Bondye i ekspekte ki nou aprann konn son lavolonte e fer zefor pour konpran li e fer li. (Matye 7:21-23) Nou bezwen priy an armoni avek sa ki nou aprann.

Amezir ki nou aprann konn Zeova ek son lavolonte, nou lafwa pou ogmante. Sa i atir nou latansyon lo en lot fakter enportan kan nou fer lapriyer. Zezi ti dir: “Tou sa ki zot pou demande dan lapriyer, zot pou resevwar si zot annan lafwa.” (Matye 21:22) Lafwa pa vedir krwar dan nenport kwa san okenn levidans. O kontrer, i vedir nou krwar dan en keksoz ki menm si nou pa vwar i annan levidans konkret ki prouve ki i vre. (Ebre 11:1) Labib i ranpli avek levidans ki menm si nou pa vwar Zeova, i en personnaz reel, nou kapab depan lo li e i pare pour reponn lapriyer bann ki annan lafwa dan li. Deplis, nou kapab touzour demann li plis lafwa. Zeova i kontan pour donn nou sa ki nou bezwen.—Lik 17:5; Zak 1:17.

La ankor en lot laspe esansyel lo ki mannyer pour priye. Zezi ti dir: “Personn pa kapab ariv kot mon Papa san pas par mwan.” (Zan 14:6) Alor, Zezi i sa enn atraver ki nou kapab apros nou Papa, Zeova. Se pour sa rezon ki Zezi ti dir son bann disip priy lo son non. (Zan 14:13; 15:16) Sa pa vedir ki nou devret priy avek Zezi. O kontrer, nou priy lo non Zezi e nou devret gard antet ki Zezi i sa sel mwayen atraver ki nou kapab apros nou Papa parfe e sen.

En zour bann disip Zezi ki ti tre pros avek li ti demann li: “Senyer, montre nou fer lapriyer.” (Lik 11:1) I evidan ki zot pa ti pe demann li sa bann keksoz de baz ki nou’n fek diskite. Zot ti vreman anvi konnen ki pour dir dan zot lapriyer, andotmo zot ti pe demann li: ‘Ki nou devret priy lo la?’

[Pwen adisyonnel lo paz 6]

Bondye i ekout lapriyer ki an armoni avek son lavolonte e ki ganny fer avek lafwa lo non Zezi

Lapriyer 4

Ki nou devret priy lo la?

ZOT dir ki sa i en lapriyer ki ganny resite pli souvan ki lezot lapriyer kretyen. Ki swa i vre oubyen non, sa model lapriyer ki Zezi ti donnen, ki souvan ganny apele ‘Notreper’ i sirman en lapriyer ki bokou dimoun pa arive konpran. Plizyer milyon dimoun i resit li parker tou le zour, petet plizyer fwa dan lazournen. Me, i pa ti lentansyon Zezi pour sa lapriyer ganny fer dan sa fason. Ki mannyer nou konn sa?

Zis avan i ti montre zot ki mannyer pour priye, Zezi ti dir: “Kan zot priye, pa servi [oubyen “repet,” NW] en kantite parol.” (Matye 6:7) Eski Zezi ti pe kontredir son lekor par donn serten fraz pour resit parker? Definitivman non! O kontrer, Zezi ti pe ansenny nou lo kwa nou kapab priye e kwa ki devret en priyorite dan nou lapriyer. Annou get sa ki i ti dir avek plis latansyon. Sa lapriyer i ganny rikorde dan Matye 6:9-13.

“Nou Papa ki dan lesyel ki ou non sen i ganny glorifye.”

Zezi ti alor rapel son bann disip ki tou lapriyer i devret ganny adrese avek son Papa, Zeova. Me eski ou konnen akoz non Bondye i vreman enportan e akoz i bezwen ganny glorifye oubyen sanktifye?

Depi o konmansman listwar imen, non Bondye ki sakre in ganny sali. Lennmi Bondye, Satan, in apel Zeova en Dirizan egois ki koz manti e ki napa sa drwa pour diriz lo Son kreasyon. (Zenez 3:1-6) Bokou dimoun in pran kote avek Satan. Zot ansennyen ki Bondye napa santiman, i kriyel, oubyen zot konpletman rezet sa lide ki i en Kreater. Lezot in menm retir konpletman non Zeova dan Labib e defann dimoun servi sa non.

Labib i montre ki Bondye pou met en lafen avek tou sa bann lenzistis. (Ezekyel 39:7) An fezan sa i pou rezourd tou ou problenm e satisfer tou ou bann bezwen. Ki mannyer i pou fer sa? Sa lot keksoz ki Zezi ti dir dan son lapriyer i donn larepons.

“Ki ou Renny i ganny etabli.”

Ozordi, i annan en kantite konfizyon parmi bann ansennyan relizye lo Rwayonm Bondye. Me parey bann ki ti ekout Zezi ti deza konnen, bann profet Bondye ti’n predir depi byen lontan ki Mesi, en Sover ki ti’n ganny swazir par Bondye ti pou diriz en Rwayonm ki pou sanz lemonn. (Izai 9:6, 7; Danyel 2:44) I pou glorifye non Zeova par devwal tou bann mansonz Satan e apre detrir Satan ek tou son travay. Rwayonm Bondye pou met en lafen avek lager, maladi, lafamin e menm lanmor. (Psonm 46:9; 72:12-16; Izai 25:8; 33:24) Kan ou pe priye pour Rwayonm Bondye vini, ou pe priye pour ki tou sa bann promes i vin vre.

“Ki ou lavolonte i ganny akonpli lo later parey dan lesyel.”

Parol Zezi i montre nou ki lavolonte Bondye pou sirman ganny akonplir lo later zis parey dan lesyel kot Bondye i reste. Personn pa’n kapab anpes lavolonte Bondye ganny fer dan lesyel. Garson Bondye ti lager kont Satan ek son bann demon e i ti zet zot lo later. (Revelasyon 12:9-12) Parey sa de premye demann dan sa model lapriyer, sa enn trwazyenm i ed nou fikse nou latansyon lo sa ki pli enportan, lo lavolonte Bondye me pa lo nou prop lavolonte. Se son lavolonte ki toultan anmenn bann pli gran byenfe pour tou kreasyon. Alor, menm sa zonm pli parfe, Zezi, ti dir avek son Papa: “Non pa dapre mon lavolonte, me ou lavolonte.”—Lik 22:42.

“Donn nou sak zour nou dipen.”

Apre, Zezi ti montre ki nou osi kapab priy pour nou bann bezwen personnel. Napa nanryen mal pour nou priy Bondye pour sa ki nou bezwen sak zour. An realite, kan nou fer sa, sa i rapel nou ki Zeova i sa enn ki “donn tou dimoun, lavi, respirasyon ek tou keksoz.” (Akt 17:25) Labib i dir nou ki i en paran ranpli avek lanmour ki anvi donn son bann zanfan sa ki zot bezwen. Alor, parey en bon paran, i pa pou donn zot keksoz ki pa bon pour zot.

“Pardonn nou nou pese.”

Eski nou bezwen ganny pardonnen avek Bondye? Bokou dimoun ozordi nepli konnen ki si sa pese e si i vreman grav pour fer pese. Me Labib i dir ki nou pli gro problenm in arive akoz pese, e sa i rezon akoz nou mor. Vi ki nou tou nou’n ne konman peser, nou tou nou fer pese detanzaot, alor nou bezwen ganny pardonnen avek Bondye parski i sa sel lespwar pour nou ganny en lavenir dirab. (Romen 3:23; 5:12; 6:23) I rekonfortan pour aprann ki Labib i dir: “Ou, O Zeova, ou bon e pare pour pardonnen.”—Psonm 86:5.

“Me anpes nou tonm dan le mal.”

Eski ou realize ki i vreman irzan pour ou ganny proteksyon Bondye? Bokou dimoun pa oule krwar ki Satan i egziste e ki i kapab fer nou “tonm dan le mal”. Me Zezi ti ansennyen ki Satan i egziste e i menm apel li “sef lemonn.” (Zan 12:31; 16:11) Satan in fer sa lemonn ki i pe dirize vin koronpi e pareyman i pe zis vey en loportinite pour fer ou fer sa ki mal. I pa anvi ou devlop en relasyon pros avek ou Papa, Zeova. (1 Pyer 5:8) Par kont Zeova i pli for ki Satan e i vreman anvi protez bann ki kontan Li.

Sa pti apersi ki fer resorti bann pwen prensipal dan model lapriyer Zezi pa koz lo tou size ki nou kapab priy lo la. Rapel byen, 1 Zan 5:14 i dir nou sa lo Bondye: “Si nou demann keksoz dapre son lavolonte, i pou ekout nou.” Alor pa bezwen trakase pour krwar ki ou problenm pa sitan enportan akoz ou kapab priy Bondye lo nenport keksoz.—1 Pyer 5:7.

Ki nou pou dir konsernan ler ek landrwa pour priye? Eski i enportan kan e kote nou priye?

Lapriyer 5

Kote e kan nou devret priye?

SAN dout ou’n remarke ki laplipar lorganizasyon relizye i met lanfaz lo lefet ki i devret annan en batiman spesifik ek serten ler fikse dan lazournen pour fer lapriyer. Eski Labib i dir nou ki nou devret fer lapriyer zis en serten landrwa oubyen zis en serten ler?

I vre, Labib i montre nou ki i annan bann moman apropriye pour fer lapriyer. Par egzanp, avan ki Zezi ti manze avek son bann disip, i ti remersye Bondye dan lapriyer. (Lik 22:17) Kan son bann disip ti rasanble pour ladorasyon, zot ti priy ansanm. Zot ti pe swiv en koutim ki ti pe ganny pratike depi byen lontan dan bann sinagog Zwif e dan tanp Zerizalenm. Bondye ti anvi ki tanp i vin “en lakaz lapriyer pour tou nasyon.”—Mark 11:17.

Kan bann serviter Bondye i rasanble e priy ansanm, zot siplikasyon i kapab anmenn bon rezilta. Si sa group i priy ansanm dan linite e zot lapriyer i baze lo bann prensip Labib, Bondye i kontan pour ekoute. Lapriyer i menm kapab pous li pour fer en keksoz ki i pa ti pou’n fer. (Ebre 13:18, 19) Temwen Zeova i priy regilyerman dan zot bann renyon. Ou kordyalman ganny envite pour vin kot Lasal Rwayonm ki pli pros avek ou e ekout sa bann lapriyer pour ou menm.

Par kont, Labib pa dir ki nou devret fer nou lapriyer zis en serten ler oubyen landrwa spesifik. Dan Labib, nou trouv bann resi kot bann serviter Bondye ti priy nenport ler ek landrwa. Zezi ti dir: “Ler ou priye, antre dan ou lasanm, ferm laport e priy ou Papa la dan sa landrwa sekre; e ou Papa ki war sa ki ou fer an sekre i a rekonpans ou.”—Matye 6:6.

Pa sa i en zoli lenvitasyon? Aktyelman ou kapab apros Souvren liniver nenport ki moman an prive, e asire ki i pou donn ou son latansyon. I pa drol alor ki Zezi ti souvan al dan en landrwa li tousel pour priye! En zour i ti pas en lannwit antye dan lapriyer akoz i ti pe rod gidans lo en desizyon byen enportan ki i ti annan pour fer.—Lik 6:12, 13.

Dan Labib i annan resi kot lezot zonm ek madanm ti priye kan zot ti annan bann desizyon enportan pour fer oubyen kan zot ti dan difikilte e zot pa ti konnen ki pour fer. Parfwa zot ti priy aotvwa e parler an silans. Zot ti priy an group e menm kan zot ti tousel. Me lenportans se ki zot ti priye. Bondye i menm envit son bann serviter pour “priye tou letan!” (1 Tesalonisyen 5:17) I pare pour toultan ekout bann ki fer son lavolonte. Pa sa lenvitasyon i montre nou ki Zeova i kontan nou?

Byensir, dan sa lemonn kot dimoun i dout tou keksoz, bokou dimoun i kapab demann zot lekor si lapriyer i vreman annan valer. Ou kapab demande, ‘Eski lapriyer pou vreman ed mwan?’

[Pwen adisyonnel lo paz 9]

Nou kapab priy nenport ler ek landrwa

Lapriyer 6

Eski lapriyer i kapab ed nou?

ESKI lapriyer i kapab anmenn byenfe pour nou? Labib i montre nou ki wi, lapriyer i kapab anmenn byenfe pour bann serviter fidel Bondye. (Lik 22:40; Zak 5:13) An realite, kan nou priye sa i kapab fer nou en kantite dibyen spirityelman, emosyonnelman e menm fizikman. Dan ki fason?

Fer konmsi ou annan en zanfan e i ganny en kado. Eski ou pou ansenny li ki i ase pour li zis santi ki i rekonesan? Oubyen ou pou ansenny li pour eksprim son rekonesans? Kan nou eksprim nou santiman pli o profon, sa i fer nou pli byen konpran zot e menm fer zot vin pli for. Eski nou kapab fer parey kan nou koz avek Bondye? Wi, definitivman! Egzamin serten legzanp.

Lapriyer remersiman. Kan nou remersi nou Papa pour bann bon keksoz ki ariv nou, nou tant pour konsantre lo bann benediksyon ki nou gannyen. An retour, nou kapab pli rekonesan, ere, e pli pozitif.—Filipyen 4:6.

Legzanp: Zezi ti eksprim son rekonesans pour lafason ki son Papa ti tann e reponn son lapriyer.—Zan 11:41.

Priye pour ganny pardonnen. Kan nou demann Bondye pour pardonn nou, nou pe antrenn nou konsyans, demontre vre repantans e nou pli konsyan gravite nou pese. Nou osi santi nou soulaze akoz nou nepli santi nou koupab.

Legzanp: Dan lapriyer, David ti eksprim son regre ek sagrinasyon.—Psonm 51.

Priye pour ganny gidans ek lasazes. Ler nou demann Zeova pour gid nou oubyen pour donn nou lasazes ki nou bezwen pour fer bann bon desizyon, sa i kapab fer nou demontre limilite. I kapab fer nou rapel nou limit e ed nou pour ogmant nou konfyans dan nou Papa ki dan lesyel.—Proverb 3:5, 6.

Legzanp: Avek limilite, Salomon ti demann gidans ek lasazes pour diriz pep Izrael.—1 Lerwa 3:5-12.

Priye kan nou dan problenm. Si nou devid nou leker avek Bondye kan nou vreman trakase, nou pou ganny soulaze e nou pou apiy lo Zeova olye depan lo nou menm.—Psonm 62:8.

Legzanp: Kan i ti pe fer fas avek en lennmi danzere, Lerwa Aza ti priye.—2 Kronik 14:11.

Priye pour byennet lezot. Sa bann kalite lapriyer i ed nou pour pa vin egois, pour devlop konpasyon e pour annan konsiderasyon pour lezot.

Legzanp: Zezi ti priy delapar son bann disip.—Zan 17:9-17.

Priye pour loue Bondye. Kan nou loue Zeova pour son bann travay merveye ek bann zoli kalite ki i annan, nou pou devlop plis respe ek lapresyasyon pour li. Sa bann kalite lapriyer i osi kapab ed nou pour apros pli pros avek Bondye, nou Papa.

Legzanp: David ti senserman loue Bondye pour son kreasyon.—Psonm 8.

En lot benediksyon ki nou gannyen kan nou priye i sa “lape Bondye ki depas tou konpreansyon imen.” (Filipyen 4:7) Lape lespri i en benediksyon ki byen rar dan sa lemonn ranpli avek problenm. I menm annan bann byenfe fizik ki vin avek. (Proverb 14:30) Me eski i par nou prop zefor ki nou pou reisi ganny sa bann benediksyon? Oubyen eski en lot keksoz ki pli enportan i enplike?

[Pwen adisyonnel lo paz 10]

Lapriyer i anmenn bokou byenfe fizikman, emosyonnelman e parlao tou, spirityelman

Lapriyer 7

Eski Bondye pou ekout e reponn nou lapriyer?

SA KESTYON i fer bokou dimoun kirye e i anmenn gran leksitasyon. Labib i montre nou ki ozordi Zeova i ekout lapriyer. Ki swa i ekout nou lapriyer oubyen non, i tou depan lo nou.

Zezi ti kondann bann sef relizye dan son letan ki ti pe priy dan en fason ipokrit akoz zot ti pe zis pretann ki zot ti fidel. I ti dir ki sa bann zonm “in deza ganny zot rekonpans.” Sa i vedir ki zot ti pou ganny zis sa ki zot ti vreman anvi, setadir laglwar sorti kot zonm, me pa sa ki zot ti vreman bezwen, ki Bondye i ekout zot lapriyer. (Matye 6:5) Pareyman ozordi, bokou dimoun pa priy konsernan lavolonte Bondye me zot priy pour sa ki zot anvi. Kan zot inyor sa bann prensip Labib ki nou’n fek diskite, Bondye pa ekout zot lapriyer.

Me ou? Eski Bondye pou ekout e reponn ou lapriyer? Pour Bondye reponn ou lapriyer pa depan lo ou ras, nasyonalite oubyen ran sosyal. Labib i asir nou: “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.” (Akt 10:34, 35) Eski ou santi ki sa bann parol i al byen avek ou? Si ou annan respe pour Bondye, sa i vedir ki ou annan lakrent pour li e ou pa anvi depler li. Si ou en dimoun ki fer sa ki drwat, ou pou fer bokou zefor pour fer sa ki Bondye i dir i byen olye fer sa ki ou anvi oubyen sa ki lezot i dir ou fer. Eski ou vreman anvi ki Bondye i ekout ou lapriyer? Atraver Labib ou kapab aprann ki mannyer pour priye pour Bondye ekout ou.a

Byensir, bokou dimoun i anvi Bondye i reponn zot lapriyer par en mirak. Me menm dan lepase, pa toultan ki Bondye ti reponn lapriyer dan sa fason. Parfwa, apre ki en mirak ti ganny fer, plizyer syek ti pase avan ki en lot ti ganny fer. Deplis, Labib i montre ki sa peryod letan ki mirak ti ganny fer, ti terminen apre lanmor bann zapot. (1 Korentyen 13:8-10) Alor, eski sa i vedir ki Bondye pa reponn lapriyer ozordi? Non, i pa vedir sa! Annou vwar serten lapriyer ki i reponn.

Bondye i donn lasazes. Zeova i Sours vre lasazes. I zenere, i pa ezite pour partaz son lasazes avek bann ki anvi son gidans e ki fer zefor pour met li an pratik dan zot lavi.—Zak 1:5.

Bondye i donn son lespri sen ek tou bann byenfe ki vin avek. Lespri sen i lafors aktif Bondye. Napa okenn lezot lafors ki pli for ki son lespri sen. I kapab ed nou andir bann leprev. I kapab donn nou lape lespri kan nou trakase. I kapab ed nou pour devlop lezot zoli kalite ki atir lezot anver nou. (Galat 5:22, 23) Zezi ti asir son bann disip ki Bondye i donn sa kado zenerezman.—Lik 11:13.

Bondye i donn konnesans bann ki senserman rod li. (Akt 17:26, 27) Partou dan lemonn, i annan dimoun ki pe senserman rod laverite. Zot anvi konn Bondye, son non, son lavolonte pour later ek limanite e ki mannyer zot kapab apros avek li. (Zak 4:8) Souvan Temwen Zeova i zwenn bann dimoun koumsa e zot byen kontan pour reponn sa bann kalite kestyon par servi Labib.

Eski pour sanmenm rezon ou’n aksepte sa magazin? Eski ou anvi annan en relasyon pros avek Bondye? Petet sa i fason ki i pe reponn ou lapriyer.

[Not anba lo paz]