LO KOUVERTIR | RWAYONM BONDYE—AKOZ I ENPORTAN POUR OU?

Rwayonm Bondye—Akoz i enportan pour Zezi?

Pandan son minister lo later, Zezi ti koz lo plizyer size. Par egzanp i ti ansenny son bann disip konman pour priye, konman pour fer plezir Bondye e ki mannyer pour trouv vre lazwa. (Matye 6:5-13; Mark 12:17; Lik 11:28) Me size ki Zezi ti pli kontan koz plis lo la ti sa enn konsernan Rwayonm Bondye.​—Lik 6:45.

Parey nou’n vwar dan sa lartik avan, Zezi ti konsantre plis lo “pres Bonn Nouvel Rwayonm Bondye.” (Lik 8:1) Zezi ti fer bokou zefor, i ti mars plizyer santenn kilomet partou Izrael pour ansenny dimoun lo Rwayonm Bondye. Minister Zezi in ganny rikorde dan kat Levanzil kot Rwayonm Bondye i ganny mansyonnen plis ki 100 fwa. Laplipar sa bann referans ti ganny mansyonnen plis par Zezi me sirman sa i zis en parti sa ki i ti dir lo Rwayonm Bondye.​—Zan 21:25.

Akoz sa Rwayonm ti sitan enportan pour Zezi ler i ti lo later? En rezon i akoz Zezi ti konnen ki Bondye ti’n swazir li pour vin Lerwa dan sa Rwayonm. (Izai 9:6; Lik 22:28-30) Me Zezi pa ti pe mazin zis pour ganny pouvwar oubyen laglwar pour son prop lekor. (Matye 11:29; Mark 10:17, 18) I pa ti anons Rwayonm zis pour son prop lentere. Pli enportan ankor, Zezi ti e i ankor enterese avek Rwayonm Bondyea akoz sa ki i pou fer pour bann ki i kontan setadir son Papa dan lesyel ek son bann disip fidel.

SA KI RWAYONM POU FER POUR PAPA ZEZI

Zezi i annan en gran lanmour pour son Papa dan lesyel. (Proverb 8:30; Zan 14:31) I apresye bann zoli kalite son Papa tel parey Son lanmour, Son konpasyon ek Son lazistis. (Deterononm 32:4; Izai 49:15; 1 Zan 4:8) Sirman Zezi i ay bann mansonz ki dimoun i dir lo son Papa. Par egzanp, zot dir ki Bondye pa fatig li avek soufrans imen oubyen i anvi ki nou soufer. Sa i en rezon akoz Zezi ti vreman anvi “anons Bonn Nouvel konsernan Rwayonm Bondye.” I ti konnen ki avek letan, atraver sa Rwayonm, repros lo non son Papa ti pou ganny tire. (Matye 4:23; 6:9, 10) Konman i pou fer sa?

Atraver son Rwayonm, Zeova pou fer bann gran sanzman ki pou benefisye limanite. “I pou eswiy tou larm” dan lizye bann imen fidel. Zeova pou elimin tou lakoz soufrans e i pou fer sir ki “lanmor pou nepli egziste . . . ni dey, ni plere, ni soufrans.” (Revelasyon 21:3, 4) Atraver son Rwayonm, Bondye pou met en lafen avek tou nou soufrans.b

I pa drol alor ki Zezi ti vreman anvi koz avek dimoun lo sa Rwayonm. I ti konnen ki sa ti pou montre ki kantite pwisans son Papa i annan e ki I ranpli avek konpasyon. (Zak 5:11) Zezi ti osi konnen ki par fer sa, sa Rwayonm ti pou osi benefisye bann imen fidel ki i kontan.

SA KI RWAYONM POU FER POUR BANN IMEN FIDEL

Avan Zezi ti vin lo later, i ti reste dan lesyel avek son Papa. Atraver Zezi, son Papa in kre tou sa ki egziste setadir lesyel ek tou son bann zetwal ek galaksi ensi ki nou zoli plannet ek tou sa ki vivan lo la. (Kolosyen 1:15, 16) Me parmi tou sa kreasyon, Zezi ti pli kontan bann imen.​—Proverb 8:31.

Son lanmour pour bann imen ti evidan dan son minister. Depi o konmansman, i ti kler ki i ti’n vin lo later pour “anons Bonn Nouvel” avek bann ki ti dan bezwen. (Lik 4:18) Me Zezi pa ti zis koz lo ed dimoun. Plizyer fwa i ti demontre son lanmour pour bann imen. Par egzanp, kan en gran lafoul dimoun ti rasanble pour ekout li, Zezi “ti pran pitye pour zot e i ti geri zot bann malad.” (Matye 14:14) Ler en zonm ki ti annan lalep ti montre ki i ti annan lafwa ki Zezi ti pou kapab geri li si i ti oule, Zezi ti pran pitye pour li. Ler i ti pe geri sa lepre, avek konpasyon i ti dir li: “Mon oule, vin prop.” (Lik 5:12, 13) Ler Zezi ti vwar son zanmi Mari dan sagrinasyon akoz son frer Lazar ti’n mor, “son leker ti touse e i ti emosyonnen” apre sa i “ti plere.” (Zan 11:32-36) Apre sa i ti fer en keksoz vreman enkrwayab. Zezi ti resisit Lazar menm si i ti’n mor depi kat zour!​—Zan 11:38-44.

Byensir Zezi ti konnen ki sa ki i ti fer sa letan ti zis tanporer. I ti realize ki pli tar, tou sa bann ki i ti’n geri ti kapab retonm malad e ki tou sa bann ki i ti’n resisit ti pou mor. Me, Zezi ti osi konnen ki Rwayonm Bondye ti pou met en lafen avek tou sa bann problenm konpletman. Pour sa rezon Zezi pa ti zis fer mirak, me i ti anons sa “bonn nouvel rwayonm” avek devouman. (Matye 9:35) Son bann mirak ti zis en avangou lo sa ki Rwayonm Bondye pou fer byento lo later antye. Annou vwar sa ki Labib i promet i pou fer.

Pou nepli annan maladi.

“Sa letan lizye bann aveg pou ouver e zorey bann sourd pou debouse. Sa letan sa enn ki bwete pou grenpe parey en serf, e lalang sa enn ki kozpa pou kriye avek lazwa.” Deplis, “okenn zabitan pa pou dir: ‘Mon malad.’”​—Izai 33:24; 35:5, 6.

Lanmor pou nepli egziste.

“Bann dimoun drwat pou posed later e zot pou reste lo la pour touzour.”​—Psonm 37:29.

“I pou anval lanmor pour touzour e Souvren Senyer Zeova pou eswiy larm lo tou figir.”​—Izai 25:8.

Bann ki’n mor pou resisite.

“Tou bann mor ki dan tonbo pou tann son lavwa, e zot pou sorti dan zot tonbo.”​—Zan 5:28, 29.

“Tou dimoun bon konman move, pour resisite.”​—Akt 24:15.

Tou dimoun pou annan zot prop lakaz ek travay.

“Zot pou konstri lakaz e zot pou reste ladan; zot pou plant pye rezen e zot pou manz son fri. Zot pa pou fer lakaz pour en lot reste ladan e zot pa pou plante pour en lot manze. . . . Sa bann ki mon’n swazir pou profit plennman travay zot lanmen.”​—Izai 65:21, 22.

Pou nepli annan lager.

“I pe fer arete lager ziska dan bann landrwa pli lwen lo later.”​—Psonm 46:9.

“Nasyon pa pou lev lepe kont nasyon e zot pou nepli aprann lager.”​—Izai 2:4.

Pou nepli annan lafamin.

“Later pou donn son prodwi; Bondye, nou Bondye pou beni nou.”​—Psonm 67:6.

“Legren pou annabondans lo later. I pou annan en kantite anler lo latet montanny.”​—Psonm 72:16.

Lapovrete pou nepli egziste.

“Bann pov pa pou toultan ganny oubliye.”​—Psonm 9:18.

“I pou sov sa enn pov ki pe kriy o sekour, osi sa enn ki pe soufer e nenport ki ki napa personn pour vin ed li. I pou pran lapenn pour sa dernyen dimoun ek sa enn pov, e i pou sov lavi bann ki pov.”​—Psonm 72:12, 13.

Kan ou mazin tou sa bann promes konsernan Rwayonm Bondye, eski ou konpran akoz sa Rwayonm i telman enportan pour Zezi? Ler i ti lo later, i ti vreman anvi koz lo Rwayonm Bondye avek nenport ki ti pare pour ekoute akoz i ti konnen ki sa Rwayonm pou met en lafen avek tou sa bann problenm ki fatig nou ozordi.

Eski sa bann promes lo Rwayonm Bondye i enteres ou? Si sa i leka, ki mannyer ou kapab aprann plis lo sa Rwayonm? Ki ou kapab fer pour fer sir ki ou ganny sa bann benediksyon? Sa dernyen lartik pou reponn sa bann kestyon.

[Not anba lo paz]