LESON 10
Ki mannyer ou kapab benefisye avek renyon Temwen Zeova?
Eski ou’n deza ganny envite en renyon Temwen Zeova? Si ou pa’n zanmen deza asiste enn zot renyon, petet ou pa santi ou tro alez pour fer li pour premye fwa. Petet ou kapab demann ou lekor: ‘Ki mannyer sa bann renyon i ganny fer? Akoz zot sitan enportan? Akoz mon devret al sa bann renyon?’ Dan sa leson, ou pou aprann akoz rasanble avek lezot i kapab ed ou vin pli pros avek Bondye e ed ou personnelman.
1. Ki sa rezon pli enportan nou rasanble ansanm?
Gete ki rezon pli enportan en ekriven Labib ti donnen pour rasanble ansanm avek lezot: “Mon pou loue Zeova dan en gran kongregasyon.” (Psonm 26:12) Pareyman, ozordi Temwen Zeova i trouv bokou lazwa pour rasanble ansanm. Zot zwenn ansanm tou le semenn partou dan lemonn pour loue Bondye, sante e priye. Zot osi zwenn dan bann pli gran rasanbleman de trwa fwa par lannen.
2. Ki ou pou aprann dan nou bann renyon?
Dan nou renyon, nou konsantre lo etidye Parol Bondye, ‘eksplik li byen e fer [dimoun] konpran.’ (Lir Neemya 8:8.) Ler ou asiste renyon, ou pou aprann konsernan Zeova ek son zoli personnalite. Anmezir ki ou konn plis lo ki mannyer i kontan ou, ou pou vin pli pros avek li. Ou pou osi vwar ki mannyer i kapab ed ou annan en lavi ki satisfezan.—Izai 48:17, 18.
3. Ki byenfe ou pou gannyen ler ou zwenn ansanm avek lezot dan nou bann renyon?
Zeova i demann nou pour “demontre en lentere senser dan lezot pour ki nou kapab ankouraz kanmarad pour demontre lanmour e fer bann bon aksyon. . . . Pa aret rasanble ansanm.” (Ebre 10:24, 25) Dan nou bann renyon, ou pou zwenn bann dimoun ki vreman enterese avek kanmarad e ki parey ou, i anvi aprann lo Bondye. Ou pou antann zot partaz bann panse ankourazan sorti dan Labib. (Lir Romen 1:11, 12.) Ou pou osi aprann konn lezot, serten i marye, lezot i selibater. Menm si zot annan zot problenm, zot reisi fer fas avek. Sa i zis enn de rezon akoz Zeova i anvi nou rasanble ansanm regilyerman!
AL PLI O PROFON
Gete ki mannyer renyon bann Temwen Zeova i ete e akoz i vo lapenn pour vin asiste sa bann renyon.
4. Renyon Temwen Zeova
Dan premye syek, bann Kretyen ti rasanble ansanm regilyerman pour ador Zeova. (Romen 16:3-5) Lir Kolosyen 3:16 e apre reponn sa kestyon:
Ki mannyer bann premye Kretyen ti ador Zeova?
Ozordi, bann Temwen osi i rasanble ansanm kot zot landrwa ladorasyon. Gete ki mannyer zot renyon i deroule, zwe sa VIDEO. Get portre en renyon dan kongregasyon e apre reponn sa bann kestyon.
Eski sa ki pase kot en Lasal Rwayonm i parey sa ki ou’n lir dan Kolosyen 3:16?
Eski ou’n remark okenn lezot keksoz ki ou kontan konsernan nou renyon dan sa video ouswa dan sa portre?
Lir 2 Korentyen 9:7 e apre reponn sa kestyon:
Akoz renyon Temwen Zeova i gratwit?
Ansanm avek ou ansenyan, get en keksoz ki pou ganny diskite dan renyon sa semenn.
Ki parti dan sa renyon ki enteres ou plis oubyen ki pli itil pour ou?
Eski ou ti konnen?
Lo jw.org, ou kapab vwar kote e kan bann renyon i ganny fer partou dan lemonn.
Dan nou renyon i annan bann diskour, demonstrasyon ek video. Renyon i konmans e fini avek en kantik ek en lapriyer
I annan serten parti renyon ki lodyans i ganny envite pour fer komanter
Tou dimoun i ganny envite: bann fanmir, selibater, dimoun aze e menm bann zanfan
Renyon i gratwit. Ou pa bezwen peye pour antre e Temwen Zeova pa pas laket
5. I demann zefor pour asiste renyon
Annou get legzanp fanmir Zezi. Pour asiste en rasanbleman ki ti ganny fer tou le zan, zot ti bezwen mars pour apepre 100 kilomet sorti Nazaret pour al Zerizalenm e pas dan bann landrwa vreman apik. Lir Lik 2:39-42 e apre reponn sa bann kestyon:
Ou krwar i ti demann zefor pour fer sa vwayaz pour al Zerizalenm?
Akoz petet ou bezwen fer zefor pour asiste renyon?
Eski ou krwar i vo lapenn fer zefor? Akoz?
Labib i dir ki rasanble ansanm pour ador Zeova i vreman enportan. Lir Ebre 10:24, 25 e apre reponn sa kestyon:
Akoz nou devret asiste renyon regilyerman?
SERTEN DIMOUN I DIR: “I pa neseser pour zwenn avek lezot. Etidye Labib kot lakour i sifi.”
Ki verse oubyen legzanp dan Labib, ki montre nou sa ki Zeova i anvi nou fer?
REZIMEN
Asiste renyon pou ed ou pour aprann plis lo Zeova, fer ou lanmitye avek li vin pli for e ador li avek lezot.
Revizyon
Akoz Zeova i ankouraz nou pour rasanble ansanm?
Ki ou pou aprann kot renyon Temwen Zeova?
Ki lezot byenfe ou krwar ou pou gannyen ler ou asiste sa bann renyon?
FER PLIS RESERS
Si ou vreman pa santi ou alez pour asiste renyon, gete ki mannyer en msye ki ti santi koumsa ti arive kontan renyon apre.
Vwar ki mannyer en garson ti apresye bann renyon e ki i ti fer pour li kontinyen asiste zot.
Dekouver ki mannyer lezot i santi konsernan asiste renyon.
“Akoz mon devret asiste bann renyon kot Lasal Rwayonm?” (Lartik lo jw.org)
Vwar ki mannyer lavi en zonm ki ti form parti en geng vyolan ti sanze apre ki i ti asiste renyon Temwen Zeova.
“I Never Went Anywhere Without My Gun” (Latour Veyer 1 Zilyet 2014 an Angle)