LESON 44
Eski tou lafet i fer plezir Bondye?
Zeova i anvi nou lavi i gou e ki par ler nou anmize. Me eski tou lafet ek selebrasyon i fer li plezir? Ki mannyer nou kapab montre nou lanmour pour Zeova dan sa domenn?
1. Akoz bokou lafet pa fer plezir Zeova?
Petet ou pou sirprann pour konnen ki bokou lafet i baze lo bann lansennyman ki napa nanryen pour fer avek Labib oubyen zot sorti dan bann fo larelizyon. Zot kapab relye avek bann keksoz demonyak oubyen zot baze lo sa nide ki nou kontinyen viv ler nou mor. Serten sa bann selebrasyon i baze lo bann krwayans dan siperstisyon oubyen lasans. (Izai 65:11) Zeova i averti son bann adorater: “Separ zot e aret tous sa keksoz enpir.”—2 Korentyen 6:17.a
2. Ki mannyer Zeova i santi konsernan bann selebrasyon ki onor bann imen dan en fason ki pa apropriye?
Zeova i averti nou pour pa tonm dan sa latrap pour met “konfyans dan bann imen.” (Lir Zeremi 17:5.) Serten lafet i onor bann dirizan oubyen bann solda. Lezot i onor bann senbol nasyonal oubyen lendepandans. (1 Zan 5:21) Lezot ankor i promot bann lorganizasyon politik oubyen sosyal. Ki mannyer Zeova i santi si nou onor en dimoun oubyen en lorganizasyon dan en fason ki pa apropriye, sirtou si i pe promot bann nide ki pa annakor avek Son plan?
3. Ki kondwit ki kapab fer en selebrasyon pa akseptab?
Labib i kondann “bwar tro bokou, parti san kontrol [ek] parti bwar.” (1 Pyer 4:3) Dan serten sa bann lafet, dimoun napa kontrol lo zot lekor e zot fer bokou keksoz imoral. Pour nou reste zanmi avek Zeova, nou bezwen rezet net sa bann move kondwit.
AL PLI O PROFON
Dekouver ki mannyer ou kapab fer plezir Zeova par fer bann bon desizyon konsernan bann lafet ek selebrasyon.
4. Rezet bann selebrasyon ki dezonor Zeova
Lir Efezyen 5:10 e apre reponn sa bann kestyon:
Ki nou bezwen fer sir ler nou pe deside si nou pou selebre en lafet?
Ki bann lafet ki popiler kot ou reste?
Eski ou krwar sa bann lafet i fer plezir Zeova?
Par egzanp, eski ou’n deza mazinen ki Bondye i panse lo selebrasyon lanniverser nesans? Labib pa mansyonn okenn serviter Zeova ki ti selebre son lanniverser nesans. Me i mansyonn de dimoun ki pa ti servi Zeova e ki ti selebre zot lanniverser nesans. Lir Zenez 40:20-22 ek Matye 14:6-10. Apre, reponn sa bann kestyon:
Ki sa de selebrasyon lanniverser nesans ti annan an komen?
Ki santiman ou krwar Zeova i annan konsernan lanniverser nesans apre ki ou’n lir sa de resi dan Labib?
Petet ou demande, ‘Eski i vreman enportan pour Zeova si mon al en parti lanniverser ouswa lezot lafet ki pa annakor avek sa ki Labib i dir?’ Lir Egzod 32:1-8. Apre, zwe sa VIDEO e reponn sa bann kestyon.
Akoz nou bezwen fer sir nou konnen sa ki akseptab pour Zeova?
Ki mannyer nou kapab fer sa?
Ki mannyer nou konnen si en lafet pa fer plezir Bondye?
Eski i baze lo bann lansennyman ki pa sorti dan Labib? Pour ou konnen, rode ki mannyer sa lafet ti konmanse.
Eski i onor bann imen, lorganizasyon oubyen bann senbol nasyonal dan en fason ki pa apropriye? Nou devret onor Zeova premye e nou fer li konfyans pour rezourd tou problenm sa lemonn.
Eski sa ki zot abitye fer dan sa bann lafet i kont bann standar Labib? Nou bezwen reste prop moralman.
5. Ed lezot pour respekte ou krwayans
I kapab difisil pour reziste presyon lezot pour partisip dan sa bann lafet ki pa fer plezir Zeova. Ler ou eksplik ou desizyon, demontre pasyans ek konsiderasyon. Pour vwar en legzanp konman pour fer sa, zwe sa VIDEO.
Lir Matye 7:12 e apre reponn sa bann kestyon:
Dapre sa verse, eski ou devret dir ou bann fanmir ki napa menm krwayans avek ou ki zot pa devret selebre en lafet?
Ki ou kapab fer pour reasir ou fanmir ki menm si ou pa pe fet avek zot, ou kontan e apresye zot?
6. Zeova i anvi nou zwaye
Zeova i anvi nou pas bann bon moman avek nou fanmir ek zanmi. Lir Eklezyas 8:15 e apre reponn sa kestyon:
Ki mannyer sa verse i montre ki Zeova i anvi nou zwaye?
Zeova i anvi son bann serviter i pas bann bon moman ki gou ansanm. Zwe sa VIDEO pour vwar ki mannyer sa i evidan dan nou bann lasanble enternasyonal.
Lir Galat 6:10 e apre reponn sa bann kestyon:
Eski nou bezwen selebre bann lafet popiler pour fer “sa ki byen” anver lezot?
Kwa ki fer ou pli zwaye? Ler ou donnen akoz sa lafet i obliz ou pour fer li oubyen ler ou donnen akoz ou anvi fer li?
Bokou Temwen i organiz bann pti keksoz spesyal detanzaot pour zot zanfan e menm fer en sirpriz par donn zot bann pti kado. Si ou annan zanfan, ki bann keksoz spesyal ou ti kapab fer pour zot?
SERTEN DIMOUN I DIR: “I pa vreman enportan ki mannyer sa lafet ti konmanse. Sa ki enportan, se pas en bon moman avek ou fanmir ek zanmi.”
Ki ou ti pou dir?
REZIMEN
Zeova i anvi ki nou pas bann bon moman avek nou fanmir ek zanmi. Me i osi oule ki nou evit bann lafet ki depler li.
Revizyon
Ki bann kestyon nou kapab demande pour konnen si en lafet pa fer plezir Zeova?
Ki mannyer nou kapab ed nou fanmir ek zanmi pour konpran nou desizyon konsernan serten lafet?
Ki mannyer nou konnen ki Zeova i anvi nou zwaye e pas bann bon moman avek lezot?
FER PLIS RESERS
Egzamin serten lafet spesifik ki bann Kretyen pa fete.
“Why Don’t Jehovah’s Witnesses Celebrate Certain Holidays?” (Lartik lo jw.org)
Vwar kat rezon akoz nou krwar ki selebrasyon lanniverser nesans pa fer plezir Bondye.
“Akoz Temwen Zeova pa selebre lanniverser nesans?” (Lartik lo jw.org)
Vwar ki mannyer bann zanfan ki kontan Zeova zot kapab fer li plezir ler i annan bann lafet.
Plizyer milyon Kretyen in deside pour pa fet Nwel. Ki mannyer zot santi konsernan zot desizyon?
“They Found Something Better” (Latour Veyer 1 Desanm 2012 an Angle)
a Vwar Lezot lenformasyon No. 5 pour vwar ki pour fer dan serten sityasyon kot lezot dimoun pe selebre en lafet.