Apros avek Bondye

“Bann keksoz dan lepase pa pou vin dan nou lespri”

BANN souvenir i kapab fer nou bokou dibyen. Kan nou mazin lo bann moman ki nou’n pase avek bann dimoun ki nou kontan, sa i fer nou leker kontan. Me i annan lezot ka kot nou souvenir i kapab parey en malediksyon. Eski souvenir bann move leksperyans dan lepase i ankor pe fer ou soufer? Si i le ka, petet ou’n deza poz ou lekor sa kestyon: ‘Eski en zour mon pou nepli rapel sa bann move souvenir?’ Nou vwar en larepons vreman rekonfortan dan parol ki profet Izai ti rikorde.​—Lir Izai 65:17.

I plan Zeova pour elimin lakoz tou bann move souvenir. Ki mannyer? I pou detrir sa move lemonn ek tou son bann soufrans e ranplas li avek enn ki definitivman pli bon. Atraver Izai, Zeova ti fer sa promes: “Mon pe kre nouvo lesyel ek en nouvo later.” Ler nou konpran sa promes sa pou donn nou lespwar pour en meyer lavenir.

Ki savedir nouvo lesyel? Labib i donn nou de lide ki kapab ed nou. Premyerman, i annan de ekriven Labib ki’n servi sa lekspresyon “nouvo lesyel” e dan tou le de sirkonstans sa lekspresyon i asosye avek en sanzman total lo later. (2 Pyer 3:13; Revelasyon 21:1-4) Dezyenmman, sa term “lesyel” i kapab reprezant dominasyon oubyen gouvernman. (Izai 14:4, 12; Danyel 4:25, 26) Alor, sa nouvo lesyel i en nouvo gouvernman, enn ki pou kapab etablir ladrwatir lo later. I annan zis en gouvernman ki kapab fer sa arive e sa i Rwayonm Bondye, setadir sa gouvernman ki dan lesyel ki Zezi ti demann nou pour priy lo la. Sa Rwayonm pou fer lavolonte Bondye ganny akonplir lo later antye.​—Matye 6:9, 10.

Ki sa nouvo later? Annou vwar de verse Labib ki pou ed nou tir sa bon konklizyon. Premyerman, dan Labib sa term “later” i parfwa refer avek dimoun non pa sa plannet. (Psonm 96:1) Dezyenmman, Labib ti predir ki bann imen fidel partou lo later pou aprann ladrwatir anba dominasyon Bondye. (Izai 26:9) Alor, sa nouvo later pe refer avek sosyete imen ki pou soumet anba dominasyon Bondye e viv dapre son standar drwat.

Eski ou kapab vwar ki mannyer Zeova pou elimin lakoz tou bann move souvenir? Byento Zeova pou konpletman akonplir son promes konsernan en nouvo lesyel ek en nouvo later par etablir en nouvo lemonn kot pou annan lazistis.a Dan sa nouvo lemonn, nou pou nepli rapel bann soufrans ki nou ti eksperyanse fizikman, mantalman e emosyonnelman. Bann imen fidel pou viv en lavi ki vreman gou kot sak zour zot pou rapel zis bann bon souvenir.

Ki nou pou dir lo bann soufrans ki pe fatig nou la konmela? Zeova ti osi fer sa promes atraver Izai: “Bann keksoz dan lepase pa pou vin dan nou lespri, zot pa pou ni vin dan leker.” Nenport ki soufrans ki nou’n eksperyanse dan sa move lemonn pou ptitapti disparet. Eski ou ti pou kontan ki sa i arive? Si sa i le ka, akoz ou pa rode ki mannyer ou kapab apros avek sa Bondye ki’n promet sa lavenir merveye?

[Not anba lo paz]

[Ekstre lo paz 12]

I plan Zeova pour elimin lakoz tou bann move souvenir