Sapit Katorz
Ki mannyer Zeova i diriz son Lorganizasyon?
1. Ki lenformasyon konsernan lorganizasyon Zeova ki Labib i revele, e akoz i enportan pour nou?
ESKI Bondye i annan en lorganizasyon? Lekritir enspire i dir nou ki i annan enn. Dan son Parol, i donn nou ennde apersi lo parti seles sa lorganizasyon remarkab. (Ezekyel 1:1, 4-14; Danyel 7:9, 10, 13, 14) Kantmenm nou pa kapab vwar sa parti envizib, i vreman fer lefe lo bann vre adorater ozordi. (2 Lerwa 6:15-17) Lorganizasyon Zeova i osi annan en parti vizib, lo later. Labib i ed nou pour konpran ki i ete e ki mannyer Zeova i diriz li.
Idantifye sa Parti vizib
2. Ki nouvo kongregasyon ki Bondye ti met an legzistans?
2 Pour 1,545 lannen, nasyon Izrael ti kongregasyon Bondye. (Akt 7:38) Me Izrael pa ti arive gard bann lalwa Bondye e i ti rezet son prop Garson. An rezilta, Bondye ti rezet sa kongregasyon e abandonn li. Zezi ti dir avek bann Zwif: “Lala! ou lakaz aprezan in ganny abandonnen.” (Matye 23:38) Bondye ti met an legzistans en nouvo kongregasyon, avek ki i ti fer en nouvo lalyans. Sa kongregasyon ti pou ganny konpoze avek 144,000 endividi ki’n ganny swazir par Bondye pour zwenn ansanm avek son Garson dan lesyel.—Revelasyon 14:1-4.
3. Ki ti arive zour Lapannkot lannen 33 N.L. ki ti demontre klerman ki Bondye ti pe aprezan servi en nouvo kongregasyon?
3 Bann premye dimoun ki form parti dan sa nouvo kongregasyon ti ganny swazir avek lespri sen zour Lapannkot lannen 33 N.L. Konsernan sa levennman remarkab, nou lir: “Zour Lapannkot, tou bann disip ti’n rasanble ansanm dan en menm landrwa. Toutakou ti annan en tapaz sorti dan lesyel ki ti resanble en gro divan ki ti ranpli sa lakaz kot zot ti pe asize. E zot ti war en keksoz ki ti resanble en bann lalang dife ki ti separe e apoz lo latet sak dimoun la prezan. Zot tou zot ti ranpli avek Sent-Espri.” (Akt 2:1-4) Alor prezans lespri Bondye ti donn levidans kler ki sa ti aprezan sa group dimoun ki Bondye ti pou servi pour akonpli son plan anba direksyon Zezi Kri dan lesyel.
4. Lekel ki form parti lorganizasyon vizib Zeova ozordi?
4 Ozordi, zis en restan sa 144,000 Kretyen swazir ki ankor lo later. Me dan lakonplisman profesi Labib, “en gran lafoul” ‘lezot mouton,’ plizyer milyon zot, in zwenn ansanm avek sa restan Kretyen swazir. Zezi, sa Ekselan Berze, in inifye sa bann lezot mouton avek sa restan Kretyen swazir afen ki zot form en sel troupo anba son lotorite konman zot sel Berze. (Revelasyon 7:9; Zan 10:11, 16) Zot tou zot form en kongregasyon ini, lorganizasyon vizib Zeova.
Laranzman teokratik
5. Lekel ki diriz lorganizasyon Bondye, e konman?
5 Sa lekspresyon ‘kongregasyon Bondye vivan’ ki sorti dan Labib i fer vwar klerman lekel ki diriz li. Sa lorganizasyon i teokratik, setadir ganny dirize par Bondye. Zeova i diriz son pep atraver Zezi, sa enn ki I’n apwente pour vin Sef envizib sa kongregasyon, e osi par mwayen son Parol enspire, Labib.—1 Timote 3:14, 15; Efezyen 1:22, 23; 2 Timote 3:16, 17.
6. (a) Kwa ki montre ki kongregasyon dan premye syek ti ganny gidans sorti dan lesyel? (b) Kwa ki montre ki Zezi i ankor Sef kongregasyon?
6 En tel direktiv ti klerman evidan zour Lapannkot. (Akt 2:14-18, 32, 33) I ti ganny manifeste kan lanz Zeova ti diriz keksoz pour ki sa bon nouvel i ganny propaze dan Lafrik, kan lavwa Zezi ti donn direktiv zour Sol ki ti sorti Tars ti ganny konverti, e kan Pyer ti konmans pres avek bann non Zwif. (Akt 8:26, 27; 9:3-7; 10:9-16, 19-22) Me apre sa, okenn lavwa pa’n ganny tande sorti dan lesyel, okenn lanz pa’n ganny vwar, okenn don mirakilez pa’n ganny donnen. Toutfwa, Zezi ti promet: “E konnen ki mwan mon avek zot toulezour, ziska lafen dimoun.” (Matye 28:20; 1 Korentyen 13:8) Ozordi, bann Temwen Zeova i rekonnet gidans Zezi. San sa, ti pou enposib pour proklanm mesaz Rwayonm dan tou sa ostilite ki nou rankontre.
7. (a) Lekel ki form “lesklav fidel e pridan,” e akoz? (b) Ki devwar sa “lesklav” in resevwar?
7 En pe letan avan son lanmor, Zezi ti koz avek son bann disip konsernan “lesklav fidel e pridan,” avek ki li konman Met, ti pou konfye en responsabilite spesyal. Sa “lesklav” ti pou prezan kan Senyer ti al dan lesyel e ti pou ankor pe travay dir kan Kris, ki ti pou aprezan en Lerwa pwisan, ti pou retournen dan en fason envizib. En tel deskripsyon pa kapab pe dekrir en endividi, me i dekrir kongregasyon swazir par Kris. Vi ki i’n aste sa kongregasyon avek son disan, Zezi ti refer avek zot konman son “lesklav.” I ti donn bann manm sa kongregasyon sa misyon pour fer disip e pour nouri zot progresivman, par donn zot “zot manze [spirityel] kan i ler.”—Matye 24:45-47, NW; 28:19; Izai 43:10; Lik 12:42; 1 Pyer 4:10.
8. (a) Ki bann responsabilite ki sa group ki konpoz sa lesklav i annan ozordi? (b) Akoz nou fason azir avek lenstriksyon ki Bondye i donnen atraver sa sours i enportan?
8 Vi ki sa group ki konpoz sa lesklav ti pe fidelman fer travay Met ler i ti fer son retour envizib an 1914, i annan levidans ki sa group ti ganny konfye bann pli gran responsabilite an 1919. Bann lannen ki’n pase apre sa, in vin en letan pour en temwannyaz global lo sa Rwayonm, e en gran lafoul adorater Zeova pe ganny rasanble pour ganny prezerve pandan sa gran ladetres. (Matye 24:14, 21, 22; Revelasyon 7:9, 10) Sa bann osi i bezwen nouritir spirityel, e se sa group ki konpoz sa lesklav ki fourni zot sa nouritir. Pour fer plezir Zeova, nou alor bezwen aksepte lenstriksyon ki i donnen atraver sa sours e azir an armoni avek li.
9, 10. (a) Dan premye syek, ki laranzman ki ti annan pour rezourd bann kestyon konsernan krwayans e donn direktiv pour predikasyon sa bon nouvel? (b) Ki laranzman pour kordin bann aktivite pep Zeova ki egziste ozordi?
9 Parler, bann kestyon i ganny souleve konsernan krwayans ek fason pour tret serten sitiasyon. Ki nou devret fer dan sa ka? Akt sapit 15 i eksplik nou ki mannyer en sitiasyon konsernan bann non Zwif konverti ti ganny rezourd. Sa zafer ti ganny anmennen kot bann zapot ek bann ansyen an Zerizalenm, ki ti servi konman en konsey direkter. Sa bann zonm ti kapab fer fot, me Bondye ti servi zot. Zot ti pran an konsiderasyon bann verse Labib ki relye avek sa sitiasyon e osi levidans kot lespri Bondye ti entervenir pour predikasyon ariv kot bann non Zwif. Apre zot ti donn en desizyon. Bondye ti beni sa laranzman. (Akt 15:1-29; 16:4, 5) Atraver sa konsey direkter, bann endividi ti ganny anvoye pour avans predikasyon Rwayonm pli devan.
10 Ozordi, Konsey Direkter lorganizasyon vizib Zeova i konpoze avek bann frer swazir ki sorti dan diferan pei e i sitye kot biro prensipal Temwen Zeova. Anba lotorite Zezi Kri, Konsey Direkter i avans vre ladorasyon pir dan tou pei, e kordin bann aktivite predikasyon Temwen Zeova dan zot dizenn milye kongregasyon. Sa bann ki form Konsey Direkter i partaz menm pwenn-vi avek zapot Pol, ki ti ekri son bann konpanyon Kretyen: “I pa vedir ki nou konmann zot lafwa, akoz zot deza ferm dan zot lafwa, me nou pe kontribye dan zot lazwa.”—2 Korentyen 1:24.
11. (a) Konman bann ansyen ek bann asistan ministeryel i ganny apwente? (b) Akoz nou devret korpere etrwatman avek sa bann ki ganny apwente?
11 Temwen Zeova partou dan lemonn i depan lo Konsey Direkter pour swazir bann frer kalifye ki alor ganny otorize pour apwent bann ansyen ek bann asistan ministeryel pour pran swen avek bann kongregasyon. Bann kondisyon ki sa bann ki ganny apwente i bezwen ranpli i ganny endike dan Labib e zot pran an konsiderasyon ki sa bann zonm pa parfe e zot fer bann fot. Bann ansyen ki fer bann rekomandasyon e sa bann ki fer nominasyon i annan en gro responsabilite devan Bondye. (1 Timote 3:1-10, 12, 13; Tit 1:5-9) Donk, zot fer lapriyer pour ganny led lespri Bondye e sers gidans dan son Parol enspire. (Akt 6:2-4, 6; 14:23) Annou montre nou lapresyasyon pour sa bann “don an zonm,” ki ed nou tou ariv “dan linite nou lafwa.”—Efezyen 4:8, NW, 11-16.
12. Ki mannyer Zeova i servi bann madanm dan laranzman teokratik?
12 Labib i endike ki sirveyans dan kongregasyon i ganny fer par bann zonm. Sa pa abes bann madanm, parski serten parmi zot i bann eritye Rwayonm seles, e zot fer bokou dan travay predikasyon. (Psonm 68:11) Deplis, vi ki zot fidelman pran swen avek zot bann responsabilite familyal, bann madanm i kontribye pour fer kongregasyon annan en bon repitasyon. (Tit 2:3-5) Me lansennyman dan kongregasyon in ganny donnen avek bann zonm ki’n ganny apwente pour fer li.—1 Timote 2:12, 13.
13. (a) Dapre Labib, konman bann ansyen i devret konsider zot pozisyon? (b) Ki privilez nou tou nou kapab annan?
13 Dan lemonn, en dimoun ki annan en pozisyon eleve i ganny konsidere enportan, me dan lorganizasyon Bondye lalwa se: “Sa ki pli pti parmi zot, limenm ki pli enportan.” (Lik 9:46-48; 22:24-26) Labib i konsey bann ansyen pour fer atansyon pour pa domin sa bann ki leritaz Bondye me, plito vin bann legzanp pour troupo. (1 Pyer 5:2, 3) Pa zis ennde, me tou Temwen Zeova, zonm konman fanm, i annan sa privilez pour reprezant Souvren liniver, par koz an son non avek limilite e dir bann dimoun partou konsernan son Rwayonm.
14. Par servi bann verse ki’n ganny site, diskit sa bann kestyon alafen sa paragraf.
14 I byen apropriye pour nou demann nou lekor: ‘Eski mon vreman apresye lafason ki Zeova i diriz son lorganizasyon vizib? Eski mon bann latitid, fason koze ek aksyon i demontre sa? Par reflesir lo sa bann pwen swivan i kapab ed sakenn antre nou pour fer en tel analiz.
Si mon vreman soumet avek Kris konman Sef kongregasyon, alor, parey i’n ganny endike dan sa bann verse swivan, ki mon devret pe fer? (Matye 24:14; 28:19, 20; Zan 13:34, 35)
Kan mon aksepte avek rekonesans bann provizyon spirityel ki vin atraver sa group ki konpoz sa lesklav ek son Konsey Direkter, pour ki sennla mon pe montre respe? (Lik 10:16)
Ki mannyer tou dimoun dan kongregasyon, spesyalman bann ansyen, i devret tret kanmarad? (Romen 12:10)
15. (a) Ki nou latitid i demontre lo fason ki nou konsider lorganizasyon vizib Zeova? (b) Ki loportinite nou annan pour prouve ki Dyab i en manter e pour fer leker Zeova rezwir?
15 Ozordi, Zeova pe gid nou par mwayen son lorganizasyon vizib anba direksyon Kris. Nou latitid anver sa laranzman i demontre konman nou santi konsernan drwa Zeova pour dirize. (Ebre 13:17) Satan i deklare ki nou premye preokipasyon i nou prop lekor. Me si nou pare pour akonpli nenport ki servis ki neseser e evit bann keksoz ki atir tro bokou latansyon lo nou menm, nou prouve ki Dyab i en manter. Si nou kontan e respe sa bann ki diriz nou me refize ‘flat dimoun pour nou prop lentere,’ nou pou fer Zeova rezwir. (Zid 16; Ebre 13:7) Par reste fidel avek lorganizasyon Zeova, nou montre ki Zeova i nou Bondye e ki nou ini pour ador li.—1 Korentyen 15:58.
Revizyon
• Eksplike kisisa lorganizasyon vizib Zeova ozordi? Ki son lobzektif?
• Lekel ki’n ganny apwente Sef kongregasyon, e atraver ki laranzman vizib ki i fourni gidans avek lanmour pour nou?
• Ki bann bon latitid nou devret kiltive anver sa bann ki dan lorganizasyon Zeova?
[Portre lo paz 133]
Zeova i gid nou par mwayen son lorganizasyon vizib anba direksyon Kris