Eski ou “oule” ed lezot?
1 Zezi ti vreman enterese avek dimoun. Kan en lepre ti sipliy li pour ed li, Zezi ti fil son lanmen, tous sa zonm, e dir: ‘Mon oule, ganny pirifye.’ (Mark 1:40-42) Dan ki fason nou kapab imit latitid Zezi konsernan ed lezot?
2 Dimoun enterese: Sak manm kongregasyon i zwe en rol pour ed bann dimoun enterese pour vin bann adorater Zeova. Ler bann nouvo i vin bann renyon, akey zot e fer konnesans avek zot. Rod bann fason pour ankouraz zot. Felisit zot pour bann komanter ki zot fer. Eksprim lapresyasyon pour zefor ki zot fer pour aplik bann prensip Labib dan zot lavi. Ed zot pour vwar bann posibilite ki zot annan pour fer bann vre zanmi dan kongregasyon.
3 Konpanyon Kretyen: Sirtou “nou bann frer dan lafwa” i merit nou led dan plizyer fason. (Gal. 6:10) Bokou pe lite avek bann problenm lasante. Par rann zot en pti vizit ankourazan, ou kapab ofer zot lasosyasyon ki zot bezwen e petet osi asiste zot dan bann fason pratik. Serten i kapab pe rankontre lezot difikilte dan zot lavi. Montre ou lentere par pran letan pour ekout zot e ankouraz zot. (1 Tesa. 5:14) Bann ansyen osi i bezwen nou korperasyon anmezir ki zot akonpli zot bann responsabilite. (Ebr. 13:17) Par demontre en lespri volonter e en dezir pour ede, nou kapab vin “en led fortifyan” pour nou bann konpanyon Kretyen.—Kol. 4:11, NW.
4 Manm Fanmiy: Nou devret osi esey imit Zezi an sa ki konsern montre lentere pour nou manm fanmiy. Lentere profon i pous bann paran pour ‘elve zot zanfan dan en ledikasyon ek lenstriksyon Senyer.’ (Efe. 6:4) Bann zanfan i kapab kontribye osi par met zot pare aler pour letid fanmiy, bann renyon kongregasyon, oubyen predikasyon. Bann zanfan ki’n vin adilt i kapab reflekte konpasyon Zezi par ed zot paran avek lanmour pour fer fas avek bann difikilte ki lavyeyes i anmennen. Dan sa bann fason e lezot ankor, nou tou nou kapab “met an pratik latasman avek Bondye dan [nou] lakour.”—1 Tim. 5:4, NW.
5 Ler nou imit Zezi par ed lezot, nou kapab soulaz bann problenm e anmenn nou fanmiy ek kongregasyon pli pros ansanm. Sa ki pli enportan, se ki nou anmenn loner pour Zeova, nou “Papa ki ranpli avek labonte.”—2 Kor. 1:3.