Gete ki kalite dimoun ou devret ete

“Ki kalite [“dimoun zot devret ete,” NW]? Zot devre anmenn en lavi sen e annan respe [oubyen “devosyon,” NW] pour Bondye.”​—2 PYER 3:11.

KI OU POU REPONN?

Ki kalite dimoun ou devret ete pour ganny laprouvasyon Bondye?

Ki mannyer Satan i anbet dimoun?

Ki ou kapab fer pour protez ou relasyon avek Zeova?

1, 2. Ki kalite dimoun nou devret ete pour ganny laprouvasyon Bondye?

I NORMAL pour konsernen avek sa ki dimoun i panse lo nou. Me, konman Kretyen, eski pa nou devret pli enterese avek sa ki Zeova i panse lo nou? Apre tou, i sa pli gran Personnaz dan liniver e i “sours lavi.”​—Ps. 36:9.

² Pour met lanfaz lo ‘ki kalite dimoun nou devret ete’ dapre pwennvi Zeova, zapot Pyer ti ankouraz nou pour “anmenn en lavi sen e annan respe [oubyen “devosyon,” NW] pour Bondye.” (Lir 2 Pyer 3:11.) Pour nou ganny laprouvasyon Bondye, nou devret annan “en lavi sen,” setadir viv en lavi ki pir moralman, mantalman e spirityelman. Deplis, nou bezwen fer bann keksoz ki montre ki nou annan “devosyon pour Bondye.” Alor, pour arive ganny laprouvasyon Bondye, pa zis nou kondwit ki enportan, me osi sa dimoun ki nou ete anndan. Vi ki Zeova i “egzamin leker,” i konnen si nou pe anmenn en lavi sen e si nou devoue anver li oubyen non.​—1 Kron. 29:17.

3. Konsernan nou relasyon avek Bondye, ki kestyon nou bezwen demann nou lekor?

³ Nou lennmi, Satan oubyen Dyab pa anvi nou ganny laprouvasyon Bondye. Anfet, i fer tou sa ki i kapab pour fer nou kas nou relasyon avek Zeova. Satan pa ezite pour koz manti, tronp e anbet nou pour ki nou elwannyen avek sa Bondye ki nou adore. (Zan 8:44; 2 Kor. 11:13-15) Alor, i byen pour demann nou lekor sa bann kestyon: ‘Ki mannyer Satan i anbet dimoun? Ki mon kapab fer pour protez mon relasyon avek Zeova?’

KI MANNYER SATAN I ANBET DIMOUN?

4. Pour esey fer nou kas nou relasyon avek Bondye, ki Satan i targete e akoz?

⁴ Disip Zak ti ekrir: “Tou dimoun i ganny tante ler i les li ganny antrennen e atire par son prop move dezir. Alor, move dezir enn fwa ki i’n ganny formen i donn nesans pese, e pese, ler in devlope, i anmenn lanmor.” (Zak 1:14-15) Pour esey fer nou kas nou fidelite avek Bondye, Satan i target sours nou dezir, setadir nou leker.

5, 6. (a) Dan ki fason Satan i target nou leker? (b) Ki tantasyon Satan i servi ki kapab annan en move lenfliyans lo bann dezir ki dan nou leker e akoz i konn servi zot byen?

⁵ Dan ki fason Satan i target nou leker? Labib i dir ki “lemonn antye i dan pouvwar dyab.” (1 Zan 5:19) Zouti ki Satan i servi i enkli “sa bann keksoz ki dan lemonn.” (Lir 1 Zan 2:15, 16.) Pour plizyer milye lannen, Dyab in servi sa lemonn pour anbet dimoun. Vi ki nou pe viv dan sa lemonn, nou bezwen vey byen son bann taktik rize.​—Zan 17:15.

⁶ Satan i servi bann metod ki kapab annan en move lenfliyans lo bann dezir ki dan nou leker. Zapot Zan i idantifye trwa tantasyon ki Satan i servi: (1) “dezir natir imen,” (2) “dezir atraver nou lizye” ek (3) “lorgey dan lavi tou le zour.” Satan ti servi sa bann tantasyon avek Zezi dan dezer. Lefet ki Satan in servi sa bann latrap pour en kantite lannen, i konn servi zot byen e i kapab fasilman adapte son lapros dapre tandans en dimoun. Avan ki nou egzamin bann fason pour protez nou lekor kont Satan, annou vwar konman i ti reisi tant Ev e konman i pa ti reisi fer menm keksoz avek Garson Bondye.

“DEZIR NATIR IMEN”

7. Ki mannyer Satan ti servi “dezir natir imen” pour tant Ev?

⁷ Bann imen i depan antyerman lo manze pour soutenir zot lekor. Nou Kreater ti fer later pour ki i kapab prodwir en kantite manze. Satan i kapab kapitaliz lo sa dezir ki nou annan pour manze pour fer nou aret fer lavolonte Bondye. Annou vwar ki mannyer i ti servi sa metod avek Ev. (Lir Zenez 3:1-6.a) Satan ti dir Ev ki i ti kapab manz sa fri dan “pye konnesans bon e move” e si i fer sa, i pa ti pou mor, me o kontrer, sa zour ki i ti pou manze, i ti pou vin parey Bondye. (Zen. 2:9) Alor, Satan ti pe dir ki Ev pa ti oblize obeir Bondye pour li kapab viv. Pa Satan i en gran manter! Kan sa lide ti’n antre dan lespri Ev, i ti annan de swa: I ti kapab rezet sa lide, ouswa kontinyen mazin lo la e les son dezir pour manz sa fri vin pli for. Kantmenm i ti kapab manz fri dan tou lezot pye, Ev ti swazir pour kontinyen mazin lo sa ki Satan ti’n dir li konsernan sa pye ki ti dan milye zarden, e alor i ti “kas sa fri e i ti manze.” Dan sa fason, Satan ti fer Ev devlop en dezir pour fer sa ki son Kreater ti’n defann li fer.

8. Ki mannyer Satan ti esey tant Zezi par servi “dezir natir imen,” e akoz i pa ti reisi?

⁸ Satan ti servi menm taktik ler i ti esey tant Zezi dan dezer. Apre ki Zezi ti’n zennen pour 40 zour e 40 nwit, Satan ti esey kapitaliz lo sa dezir ki Zezi ti annan pour manze. Satan ti dir avek li: “Si ou Garson Bondye, donn lord ki sa ros i vin dipen.” (Lik 4:1-3) Zezi ti annan de swa: I ti kapab pa servi ouswa servi son pouvwar pour satisfer son dezir pour manze. Zezi ti konnen ki i pa merit servi son pouvwar pour bann rezon egois. Menm si i ti lafen, i pa ti les son dezir pour manze pas avan son relasyon avek Zeova. Zezi ti reponn Satan: “Dan Lekritir i’n dir: ‘Zonm pa viv zis lo dipen tousel me lo tou parol ki sorti dan labous Bondye.’”​—Mat. 4:4.

“DEZIR ATRAVER NOU LIZYE”

9. Ki sa lekspresyon “dezir atraver nou lizye” i kapab pe dir, e ki mannyer Satan ti kapitaliz lo sa dezir dan ka Ev?

⁹ Zan ti osi mansyonnen ki Satan i servi “dezir atraver nou lizye” pour tant nou. Sa lekspresyon i kapab pe dir ki en dimoun i kapab devlop en dezir pour en keksoz zis par get sa keksoz. Dan ka Ev, Satan ti kapitaliz lo sa dezir kan i ti dir li: “Zot lizye pou sirman ouver.” Pli Ev ti get sa fri, pli i ti vwar li atiran. Ev ti vwar ki fri dan sa pye ti bon pour manze e “i ti en keksoz ki son lizye ti anvi gete.”

10. Dan ki fason Satan ti servi ‘dezir atraver lizye’ pour tant Zezi, e ki mannyer Zezi ti reakte?

¹⁰ Ki nou pou dir dan ka Zezi? Satan “ti montre [Zezi] tou bann rwayonm later. I ti dir li, ‘Mon a donn ou tou sa pouvwar ek laglwar sa bann rwayonm.’” (Lik 4:5, 6) Zezi pa ti pou’n kapab vwar tou sa bann rwayonm ansanm en sel kou, avek son de lizye, me Satan ti’n bezwen santi ki si laglwar sa bann rwayonm ti ganny reprezante dan en vizyon, sa ti pou en keksoz atiran pour Zezi. San okenn laont, Satan ti dir: “Si ou ador mwan, tousala, a vin pour ou.” (Lik 4:7) Definitivman, Zezi pa ti anvi vin sa kalite dimoun ki Satan ti oule i vini. Deswit i ti reponn Satan: “I’n ekri, ‘Ou devre ador [“Zeova,” NW] ou Bondye, e servi zis li tousel.’”​—Lik 4:8.

“LORGEY DAN LAVI TOU LE ZOUR”

11. Ki mannyer Satan ti tant Ev?

¹¹ Ler i ti koz lo bann keksoz dan sa lemonn, Zan ti mansyonn “lorgey dan lavi tou le zour.” Kan zis Adan ek Ev tousel ki ti lo later, byensir zot pa ti kapab fer vantar avek sa ki zot ti annan devan lezot. Me selman, zot ti demontre lorgey. Kan Satan ti pe tant Ev, i ti dir ki Bondye ti’n priv Ev en keksoz merveye. Dyab ti dir li ki sa zour menm ki i manz sa fri dan “sa pye konnesans bon e move” i ti pou sirman vin ‘parey Bondye, e i ti pou konn sa ki bon ek sa ki move.’ (Zen. 2:17; 3:5) Alor Satan ti pe dir ki Ev ti kapab vin endepandan avek Zeova. Lorgey ti sa fakter ki ti fer Ev krwar dan sa mansonz. I ti manz sa fri ki Bondye ti’n defann li manze an krwayan ki i pa ti pou mor. Pa Ev ti vreman bet!

12. Ki lot fason Satan ti esey tant Zezi e ki mannyer i ti reakte?

¹² Kontrerman avek Ev, pa Zezi in kit sa pli bon legzanp limilite! Satan ti esey tant Zezi dan en lot fason, me Zezi pa ti ni menm mazinen pour teste Bondye par fer en keksoz enpresyonan. Pa sa ti pou montre ki i annan lorgey! O kontrer, Zezi ti donn Satan en larepons kler e direk: “I’n ekri: ‘Ou pa devre tant [“Zeova,” NW] ou Bondye.’”​—Lir Lik 4:9-12.

KI MANNYER NOU KAPAB PROTEZ NOU RELASYON AVEK ZEOVA?

13, 14. Eksplike dan ki fason Satan i servi serten metod pour tant nou ozordi.

¹³ Ozordi, Satan i servi menm metod ki i ti servi avek Ev ek Zezi. Dan sa lemonn, Dyab i kapitaliz lo “dezir natir imen” pour promot limoralite seksyel e ankouraz dimoun pour manze e bwar tro bokou. Atraver pornografi, sirtou lo Internet, i kapab atir latansyon bann ki pa vizilan par kapitaliz lo “dezir atraver nou lizye.” An sa ki konsern materyalizm, pouvwar ek popilarite, pa i servi “lorgey dan lavi tou le zour” pour tant sa bann dimoun orgeye!

¹⁴ “Sa bann keksoz ki dan lemonn” i parey bann diferan labwet ki en peser i servi. Zot atiran, me sak kalite labwet i ganny atase avek en lanmson. Satan i servi bann keksoz ki paret normal e neseser pour fer dimoun fer lekontrer avek sa ki Bondye i ekspekte. Me, Satan i servi sa kalite metod rize pour tant nou akoz i anvi enfliyans nou bann dezir e fer nou leker vin koronpi. Sa bann tantasyon i fer nou krwar ki nou bann bezwen personnel i pli enportan ki fer lavolonte Bondye. Eski sa bann tantasyon i annan lefe lo nou?

15. Ki mannyer nou kapab imit Zezi pour arive reziste tantasyon Satan?

¹⁵ Menm si tantasyon Satan ti fer Ev tonbe, Zezi li, i ti reziste sa bann tantasyon. A sak fwa, i ti reponn atraver Lekritir an dizan: “Dan Lekritir i’n dir” oubyen “I’n ekri.” Si nou etidye Labib o profon, nou pou konn byen Lekritir e nou pou kapab rapel bann verse ki kapab ed nou pour fer fas avek tantasyon. (Ps. 1:1, 2) Ler nou rapel legzanp bann serviter fidel dan Labib, sa pou ed nou imit zot. (Rom. 15:4) Ler nou annan sa vre lakrent pour Zeova, ler nou kontan sa ki i kontan e ay sa ki i deteste, i pou protez nou.​—Ps. 97:10.

16, 17. Ki lefe nou “abilite pour rezonnen” i annan lo sa kalite dimoun ki nou ete?

¹⁶ Zapot Pol i ankouraz nou pour servi nou “abilite pour rezonnen” pour vin bann dimoun ki annan menm fason panse avek Zeova, non pa avek sa ki pour lemonn. (Rom. 12:1, NW, 2) Pour met lanfaz lo annan kontrol lo sa ki nou panse, Pol ti dir: “Nou detri tou bann rezonnman ek tou lopozisyon lorgey kont konnesans Bondye. E nou anmenn tou lentelizans konman prizonnyen pour fer obei Kris.” (2 Kor. 10:4, 5) Nou fason panse i annan en gran lefe lo sa kalite dimoun ki nou ete, alor nou bezwen kontinyen ‘mazin lo tou bann keksoz’ ki batir.​—Fili. 4:8.

¹⁷ Nou pa kapab reste pir si nou kontinyen nouri nou avek bann panse ek dezir ki move. Nou bezwen kontan Zeova avek “en leker pir.” (1 Tim. 1:5) Me leker i tret, e nou kapab pa realize ki degre “sa bann keksoz ki dan lemonn” pe afekte nou. (Zer. 17:9) Alor, eski pa nou devret ‘kontinyen teste pour vwar si nou dan lafwa, kontinyen prouve sa ki nou ete’ par analiz nou lekor an rapor avek sa ki nou etidye dan Labib?​—2 Kor. 13:5.

18, 19. Akoz nou devret determinen pour reste sa kalite dimoun ki Zeova i oule nou ete?

¹⁸ En lot fakter ki kapab ed nou pour reziste “sa bann keksoz ki dan lemonn” i ki nou gard antet sa parol enspire ki Zan ti ekrir: “Lemonn pou disparet ek tou son bann dezir; me sa ki fer lavolonte Bondye i reste eternelman.” (1 Zan 2:17) Pour lemoman, sistenm Satan i paret reel e permanan. Me, i pou disparet en zour. Napa nanryen dan lemonn Satan ki permanan. Si nou gard sa antet, sa pou ed nou pour pa ganny anbete par bann tantasyon Dyab.

¹⁹ Zapot Pyer i ankouraz nou pour vin bann dimoun ki Bondye i aprouve anmezir ki nou “pe espere, e gard antet zour Zeova, par ki lesyel pou alimen e ganny detri, e tou bann eleman ki pou vreman so pou fonn!” (2 Pyer 3:12, NW) Tre byento sa zour pou arive, e Zeova pou antyerman detrir lemonn Satan. Ziska ki sa i arive, Satan pou kontinyen servi “sa bann keksoz ki dan lemonn” pour tant nou parey i ti fer avek Ev ek Zezi. Nou pa devret fer parey Ev ki ti satisfer zis son bann dezir egois. Si nou fer sa, i pou konmsi nou pe rekonnet Satan konman nou bondye. Nenport tantasyon ki Satan i met devan nou, menm si zot paret vreman atiran, annou touzour fer parey Zezi e reziste tantasyon. Annou determinen pour reste sa kalite dimoun ki Zeova i oule nou vini.

[Not anba lo paz]

[Portre lo paz 23]

[Portre lo paz 24]

“Dezir natir imen” ti fer Ev tonbe (Vwar paragraf 7)

[Portre lo paz 25]

Zezi pa ti les nanryen kas son relasyon avek Zeova (Vwar paragraf 8)

[Portre lo paz 26]

Ki prensip Labib ou devret rapel kan ou dan sa bann sityasyon? (Vwar paragraf 13, 14)