Vre Kretyen I Pli For!
‘Parol Senyer ti fannen avek gran pisans e i ti pli for.’—AKT 19:20.
1. Dekrir ogmantasyon dan larelizyon Kretyen pandan premye syek.
ANFLANMEN par pouvwar lespri sen, bann premye Kretyen ti proklanm parol Bondye avek en larder ki personn pa ti pou kapab kalme. En istoryen ti ekrir: “Larelizyon Kretyen in propaz dan lemonn bann Romen avek en rapidite remarkab. Dan lannen 100, probableman sak provens ki ti bord avek Lamediterane ti annan en kominote Kretyen.”
2. Ki mannyer Satan ti esey diminyen lenpak sa bon nouvel, e konman ki sa ti’n ganny predir?
2 Satan Dyab pa ti kapab retenir bann premye Kretyen. Plito, i ti servi en lot mwayen—lapostazi—pour diminyen lenpak ki sa bon nouvel ti fer. Zezi ti’n predir ki sa ti pou arive dan son parabol dible ek move zerb. (Matye 13:24-30, 36-43) Lapot Pyer osi ti’n averti ki bann fo ansennyan ti pou leve parmi kongregasyon, e anmenn bann sekt destrikter. (2 Pyer 2:1-3) Demenm, lapot Pol ti’n presizeman averti ki lapostazi ti pou aparet avan ki zour Zeova i arive.—2 Tesalonisyen 2:1-3.
3. Ki ti arive apre lanmor bann zapot?
3 Apre lanmor bann zapot, sa bon nouvel ti ganny etoufe par bann lansennyman payen ek bann filozofi. Parey ti’n ganny predir, bann fo ansennyan ti deform e polye sa mesaz pir laverite. Gradyelman, vre larelizyon Kretyen ti ganny kasyet par en imitasyon nonmen Kretyente. En group klerze ti aparet e ti esey fer li enposib pour bann dimoun ordiner ganny akse avek Labib. Menm si lakantite bann ki ti apel zot lekor Kretyen ti ogmante, zot ladorasyon pa ti pir. Kretyente ti ogmante dan lakantite teritwar e i ti vin en lenstitisyon ki ti annan bokou pouvwar ek lenfliyans dan kiltir Oksidantal, me i pa ti resevwar ni benediksyon Bondye ni son lespri.
4. Akoz ki konplo Satan pour kontrarye plan Bondye pa ti en sikse?
4 Toutfwa, konplo Satan pour kontrarye plan Zeova pa ti pou reisi. Menm pandan letan kot lapostazi ti pli pir, vre larelizyon Kretyen ti ankor touzour vivan parmi serten dimoun. Bann zonm ki ti kopye Labib ti fer li avek bokou zefor ek prekosyon pour gard li egzakt. Alor, Labib ti reste entak menm si son mesaz ti ganny mal enterprete par bokou ki ti pretann ki zot annan lotorite pour ansenny li. Pandan bann syek, bann spesyalis Labib tel ki Jerome ek Tyndale ti montre zot brav pour tradwir e distribye Parol Bondye. Plizyer milyon dimoun ti ganny ekspoze avek Labib e avek en form larelizyon Kretyen, kantmenm i ti senpleman en imitasyon.
5. Ki profet Danyel ti predir konsernan sa “vre konnesans”?
5 Finalman, parey ti’n ganny predir dan liv Danyel, ‘vre konnesans ti vin an abondans.’ Sa in arive dan “letan lafen”—dan sa letan ki nou pe viv aktyelman. (Danyel 12:4) Lespri sen in fer bann ki kontan laverite partou dan lemonn ganny en konnesans egzakt lo sa vre Bondye ek son plan. Menm apre plizyer syek ki lansennyman aposta in egziste, parol Bondye i pli for! Ozordi, sa bon nouvel pe ganny proklanmen partou, i pe donn dimoun lespwar pour en nouvo monn merveye. (Psonm 37:11) Aprezan, annou egzamin ogmantasyon dan parol Bondye dan nou letan.
Ogmantasyon dan Laparol Ozordi
6. Ki bann verite ki bann Etidyan Labib ti’n konpran an 1914?
6 Ver lafen diznevyenm syek, laverite Biblik ti stimil en pti group Etidyan Labib, ki ozordi nou konn zot konman Temwen Zeova. An 1914, Labib ti’n vin vivan pour zot. Zot ti konpran bann verite merveye konsernan plan Bondye. Zot ti santi zot ganny pouse bokou par lanmour ki Zeova in demontre an anvoyan son Garson lo later, e ensi ouver semen pour lavi eternel. Zot ti’n osi arive konn e apresye non Bondye ek son personnalite. Deplis, zot ti realize ki “letan bann nasyon etranze” ti’n deza terminen, ki ti endike ki Rwayonm Bondye ti pros pour anmenn bann benediksyon pour bann imen. (Lik 21:24) Vreman sa ti en bon nouvel! Sa verite pwisan ti bezwen ganny partaze avek tou dimoun partou. Lavi ti an risk!
7. Ki mannyer laverite in dominen dan letan modern?
7 Zeova ti beni sa pti ponnyen Kretyen ki i ti’n swazir par son lespri. Ozordi, lakantite ki’n akeyir vre larelizyon Kretyen in depas sis milyon. Parol Bondye in osi propaz dan plis teritwar parski bann Temwen Zeova i ganny trouve dan 235 pei. Deplis, laverite Biblik in egzers son pouvwar e in pli for ki tou lobstak ki swa relizye ou lezot. Sa aktivite global pour prese i en lot laprev ki Zezi i prezan dan son pouvwar Rwayal, en laprev ki enposib pour demanti.—Matye 24:3, 14.
8. Ki serten in dir konsernan ogmantasyon bann Temwen Zeova?
8 Zis parey bann istoryen ti fer remark lo ogmantasyon enpresyonan dan lakantite Kretyen premye syek, plizyer spesyalis Labib in fer komanter lo ogmantasyon pep Zeova denozour. Letazini, de spesyalis Labib ti ekrir: “Pandan sa 75 lannen ki’n pase bann Temwen Zeova in mentenir en ritm ogmantasyon ki ekstraordiner . . . e zot in fer li lo en lesel global.” En zournal Les Lafrik ti refer avek bann Temwen Zeova konman “enn bann relizyon ki pe agrandi pli vitman e pe ganny pli respekte dan lemonn antye pour son devouman total anver bann lansennyman Biblik.” E en zournal konservatif Katolik, ki ti ganny pibliye Lerop, i refer avek “ogmantasyon enorm dan lakantite Temwen Zeova.” Kwa ki’n kontribye anver sa ogmantasyon?
Lespri Sen i Aktif Ozordi
9. (a) Nonm en rezon prensipal akoz parol Bondye i pli for ozordi? (b) Konman ki Zeova pe atir bann dimoun anver li?
9 En rezon prensipal akoz parol Bondye i pli for ozordi se ki lespri Zeova i tre aktif, zis parey dan premye syek. Zezi ti dir: “Personn pa kapab vin kot mwan, si mon Papa ki’n anvoy mwan, pa atir li kot mwan.” (Zan 6:44) Sa bann mo i sizere ki Bondye i atir dousman ver li bann ki dan dispozisyon neseser, par tous zot leker. Par mwayen predikasyon ki son bann Temwen pe akonpli, Zeova pe atir dan son servis “bann keksoz dezirab sorti dan tou nasyon”—bann dimoun lo later ki dosil konman mouton.—Agai 2:6, 7.
10. Ki kalite dimoun ki’n reazir favorableman anver parol Bondye?
10 Lespri sen pa’n zis donn pouvwar pep Bondye pour anmenn son parol dan bann rezyon pli lwen lo later; me i’n osi pous tou sort kalite dimoun pour reazir favorableman avek sa bon nouvel. Vreman, bann ki’n aksepte parol Bondye in sorti dan “tou nasyon, tribi, pep ek lalang.” (Revelasyon 5:9; 7:9, 10) Zot kapab ganny trouve parmi bann ki ris ensi ki bann ki pov e parmi bann ki byen edike ensi ki bann ki napa gran ledikasyon. Serten in aksepte laparol dan bann kondisyon lager ek persekisyon kriyel tandis ki lezot in fer li dan bann letan lape ek prosperite. Anba tou form gouvernman, dan tou kiltir, depi dan bann kan konsantrasyon ziska dan bann pale, bann zonm ek fanm in reazir favorableman anver sa bon nouvel.
11. Ki lefe lespri sen i fer dan lavi pep Bondye, e ki distenksyon ki evidan?
11 Malgre ki pep Bondye i konpri en sitan gran varyete dimoun, zot viv ansanm dan linite. (Psonm 133:1-3) Sa i en lot levidans ki lespri sen i aktif dan lavi bann ki pe servi Bondye. Son lespri i en lafors pwisan pour lebyen ki permet son bann serviter manifeste lanmour, lazwa, lape, labonte ek lezot kalite atiran. (Galat 5:22, 23) Ozordi nou kapab byen disteng sa ki profet Malaki ti predir byen lontan: “Zot pou . . . vwar distenksyon ant enn ki drwat ek enn ki mesan, ant enn ki pe servi Bondye ek enn ki pa’n servi li.”—Malaki 3:18.
Parol Bondye i Pli For dan Bann Zouvriye ki Zele
12. Ki santiman bann Temwen Zeova konsernan sa travay evanzelizater, e ki reaksyon zot ekspekte gannyen dan zot aktivite predikasyon?
12 Bann Temwen Zeova ozordi pa bann Kretyen ki senpleman al legliz. Zot partisip aktivman dan travay evanzelizater. Parey bann premye Kretyen, zot ofer zot lekor volonterman pour fer lavolonte Bondye, pour sey ed lezot aprann konsernan bann promes Rwayonm Zeova. Zot bann konpanyon travay Bondye ki rasanble lezot dan son servis, an armoni avek son lespri. An fezan sa, zot pe reflekte mizerikord Zeova ek son lanmour pour bann non krwayan. E zot pe fer sa menm si zot rankontre lendiferans, ridikil, ek persekisyon. Zezi ti prepar son bann disip pour diferan reaksyon ki ti pou devlope anver sa bon nouvel. I ti dir: “ ‘Okenn serviter pa pli gran ki son met.’ Si zot in persekit mwan, zot osi, zot pou ganny persekite, si sa bann dimoun in obei mon lansennyman, zot pou obei lansennyman ki zot osi zot pou donnen.”—Zan 15:20.
13. Ki bann keksoz ki manke dan Kretyente me ki bann Temwen Zeova i annan an abondans?
13 Similarite ant bann Temwen Zeova ozordi ek bann ki ti aksepte vre larelizyon Kretyen dan premye syek i enpresyonn nou bokou. Sa ki tre aparan ankor se sa diferans ant Temwen Zeova ek Kretyente ozordi. Apre ki en spesyalis Labib ti’n ekrir konsernan zel bann premye Kretyen, i ti eksprim son regre: “Amwen ki polisi legliz aktyel i sanze pour ki latas evanzelizater i ganny revwar konman en lobligasyon tou Kretyen batize, e ki sa i ganny apiye par en kalite lavi Kretyen ki pli siperyer ki pour sa bann ki napa lafwa, i probab ki nou pa pou fer bokou progre.” Se sanmenm sa bann keksoz ki Kretyente i manke ki bann Temwen i annan an abondans! Zot, zot annan en lafwa vivan, en vre lafwa, e en lafwa ki baze lo laverite Biblik ki zot santi zot ganny pouse pour partaz avek tou sa ki anvi ekoute.—1 Timote 2:3, 4.
14. Konman ki Zezi ti vwar son minister, e ki latitid son bann disip i demontre ozordi?
14 Zezi ti pran son minister tre serye, i ti fer li vin en preokipasyon prensipal. I ti dir avek Pilat: “Mon’n ne e mon’n vin dan lemonn pour servi temwen pour laverite.” (Zan 18:37) Pep Bondye i santi parey Zezi ti santi. Avek sa verite Biblik ki zot in pran aker, zot sey zot mye pour trouv bann mwayen pour partaz li avek otan dimoun ki posib. Serten sa bann mwayen i reflekte en abilite remarkab pour mazin bann nouvo metod.
15. Konman ki serten in montre abilite pour pres sa bon nouvel?
15 Dan en pei Sid Lanmerik, bann Temwen ti bezwen desann toudilon en pti larivyer ki al zwenn avek Larivyer Amazonn, pour kapab anmenn laverite kot en group dimoun. Sepandan, kan konfli sivil ti eklate an 1995, bann sivilyen ti napa drwa sirkil obor larivyer. Determinen pour kontinyen fourni bann ki ti enterese avek bann piblikasyon Biblik, bann Temwen ti deside pour fer sa mesaz desann dan kouran larivyer. Zot ti ekrir bann let e plas zot avek bann kopi Latour Veyer ek Réveillez-vous! dan bann boutey plastik vid. Apre zot ti anvoy sa bann boutey dan larivyer. Sa ti kontinyen pour kat an edmi ziska ki larivyer ti reouver pour bann sivilyen. Toudilon sa larivyer, bann dimoun ti remersye bann Temwen pour zot piblikasyon. En madanm ki ti en etidyan Labib ti anbras zot avek larm dan son lizye e dir: “Mon ti krwar ki mon pa pou zanmen vwar zot ankor. Me, kan mon ti konmans resevwar piblikasyon dan boutey, mon ti konnen ki zot pa’n oubliy mwan!” Lezot ki ti pe reste obor larivyer ti dir ki zot in lir sa bann magazin plizyer fwa. Plizyer vilaz ti annan en “lapos”—en tourbiyon ki ti rasanble tanporerman bann lobze ki ti pe flote. Se la kot sa bann dimoun enterese ti vin vwar si i annan okenn “let” sorti en pe pli o sa larivyer.
16. Konman ki letan nou fer nou disponib, sa i parfwa ouver semen pour fer disip?
16 Proklanmasyon sa bon nouvel i ganny dirize e soutenir par Zeova ek son bann lanz pwisan. (Revelasyon 14:6) Parler, si nou zis fer nou disponib, bann loportinite pour fer disip ki nou pa pe ekspekte i arive. Kenya an Nayrobi, de ser Kretyen ti’n fini fer bann lakaz ki zot ti’n ganny dezinyen pour fer dan predikasyon. Toudenkou, en zenn madanm ti apros zot e dir avek leksitasyon: “Mon’n priye pour zwenn en dimoun parey zot.” I ti sipliy sa de Temwen pour vin se li osito pour en diskisyon, e sa zour menm i ti konmans en letid Labib. Akoz sa madanm ti’n apros sa de Kretyen avek en tel ensistans? Anviron de semenn avan, i ti’n perdi son pti baba dan lanmor. Alor kan i ti vwar en zenn avek sa trak “Ki lespwar i annan pou bann dimoun ki nou kontan e k’in mor?” i ti telman anvi sa trak ki i ti demann sa garson pour donn li. Sa garson ti refize, e dir li ki se bann Temwen ki’n donn li sa trak. Sa madanm pa ti pran bokou letan pour konmans fer bon progre spirityel e i ti pli kapab fer fas avek lanmor penib son zanfan.
Lanmour Bondye i Bezwen Pli For
17-19. Ki kalite lanmour Zeova in demontre anver limanite par mwayen sa ranson?
17 Ogmantasyon dan parol Bondye i relye etrwatman avek sakrifis ranson Zezi. Parey sa ranson, travay predikasyon i en lekspresyon lanmour Zeova pour tou dimoun partou lo later. Lapot Zan ti ganny enspire pour ekrir: “Bondye in telman kontan lemonn [bann imen] ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.”—Zan 3:16.
18 Reflesir lo sa lanmour ki Zeova in demontre kan in fourni sa ranson. Pour en peryod letan enfini, Bondye in rezwir en relasyon entim avek son sel Garson ki i kontan bokou, “konmansman Kreasyon Bondye.” (Revelasyon 3:14) Zezi i kontan son Papa enfiniman, e Zeova ti kontan son Garson “avan ki lemonn ti ganny kree.” (Zan 14:31; 17:24) Zeova ti permet son Garson byenneme pas atraver lanmor pour ki bann imen i kapab ganny lavi eternel. En lekspresyon lanmour pour limanite ki nou vreman kapab admire!
19 Zan 3:17 i dir: “Bondye pa’n anvoy son garson dan lemonn pour kondann lemonn, me pour ki par li lemonn i a ganny sove.” Alor Bondye ti anvoy son Garson lo en misyon lanmour pour delivre, non pa pour zize oubyen kondannen. Sa i armoniz byen avek parol Pyer: “[Zeova] pa oule ki personn i ganny detri, me ki tou dimoun i arive repanti.”—2 Pyer 3:9.
20. Konman ki delivrans i relye avek pres sa bon nouvel?
20 Etan donnen ki i’n fourni baz legal pour delivrans, ki’n kout li bokou, Zeova i anvi ki otan dimoun i benefisye. Lapot Pyer ti ekrir: “ ‘Tou sa ki envok non Senyer pou ganny sove.’ Me ki mannyer zot pou envok li si zot pa kwar dan li? E ki mannyer zot pou kwar dan li san ki zot in tann koz lo li? E ki mannyer zot pou tann koz lo li si personn pa anons li?”—Romen 10:13, 14.
21. Konman nou devret santi anver sa loportinite pour partisip dan sa travay predikasyon?
21 Pa i en privilez merveye pour partisip dan sa travay predikasyon ek lansennyman global! I pa en travay fasil, pourtan ki degre zwaye Zeova i zwaye kan i obzerv son pep pe fidelman viv laverite e partaz li avek lezot! Alor nenport ki sitiasyon ki ou ladan, les lespri Bondye ek lanmour ki ou annan dan ou leker motiv ou pour partisip dan sa travay. Mazinen ki sa ki nou pe vwar akonpli partou dan lemonn i donn nou laprev konvenkan ki Zeova pou byento akonpli son promes pour fer nou antre dan “nouvo lesyel ek en nouvo later kot pou annan lazistis.”—2 Pyer 3:13.
Eski Ou Mazinen?
• Akoz lapostazi pa ti kapab fer bann ki pres sa bon nouvel reste silans?
• Konman ki parol Bondye in pli for dan nou letan?
• Dan ki bann fason lespri Bondye pe travay denozour?
• Konman ki sa ranson i relye avek proklanmasyon sa bon nouvel?
[Portre lo paz 25]
JEROME
TYNDALE
GUTENBERG
HUS
[Portre lo paz 25]
Gutenberg ek Hus: Tire dan liv The Story of Liberty, 1878
[Portre lo paz 25]
Bann Etidyan Labib pe proklanm sa bon nouvel dan bann lannen 1920
[Tablo/Portre lo paz 26]
Pour prezantasyon, vwar piblikasyon)
Ogmantasyon dan lakantite proklanmater Rwayonm dan 20 tyenm syek
Proklanmater an mwayenn (par milyon)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
[Portre lo paz 27]
Dimoun partou dan lemonn pe reazir favorableman anver sa bon nouvel
[Portre lo paz 28]
Parey sakrifis ranson Zezi, predikasyon i glorifye lanmour ki Bondye i annan