Ki Kantite Presye Laverite I Ete Pour Ou?
“Zot a konn laverite e laverite i ava fer zot lib.”—ZAN 8:32.
1. Konman ki fason ki Pilat ti servi sa mo laverite i aparaman diferan avek fason ki Zezi ti servi li?
“KISISA laverite?” Kan Pilat ti demann sa kestyon, i paret ki i ti enterese avek laverite an zeneral. Parkont, Zezi ti’n fek dir: “Mon’n ne e mon’n vin dan lemonn pour servi temwen pour laverite.” (Zan 18:37, 38) Kontrerman avek Pilat, Zezi ti pe refer avek laverite divin.
Latitid Lemonn anver Laverite
2. Ki Zezi ti dir ki montre valer laverite?
2 Pol ti dir: “Pa tou dimoun ki annan lafwa.” (2 Tesalonisyen 3:2) Nou kapab dir menm keksoz pour laverite. Menm kan zot ganny loportinite pour konn laverite baze lo Labib, bokou dimoun i volonterman inyor li. Pourtan, ki kantite presye laverite i ete! Zezi ti dir: “Zot a konn laverite e laverite i ava fer zot lib.”—Zan 8:32.
3. Ki lavertisman konsernan bann lansennyman tronper ki nou bezwen pran kont?
3 Zapot Pol ti dir ki laverite pa pou ganny trouve dan bann filozofi ek tradisyon zonm. (Kolosyen 2:8) Anfet, sa bann kalite lansennyman i tronper. Pol ti averti bann Kretyen Efezyen ki si zot met konfyans dan sa bann lansennyman, zot pou vin parey bann pti zanfan “ki ganny trennen par laroul, . . . par nenport divan lansennyman ki dimoun tronper i fannen, bann ki antrenn dimoun dan lerer par tou sort riz ki zot envante.” (Efezyen 4:14) Ozordi, “tou sort riz” i ganny promote par propagann fer par bann ki opoz laverite divin. The New Encyclopædia Britannica i dekrir “propagann” konman “zefor sistematik pour manipil krwayans, latitid, oubyen aksyon lezot dimoun.” En tel propagann i deform laverite pour fer li vin mansonz e promot mansonz konman laverite. Pour arive trouv laverite malgre sa bann presyon tronper, nou bezwen etidye Labib seryezman.
Bann Kretyen ek Lemonn
4. Laverite i disponib pour ki sennla, e ki lobligasyon bann ki resevwar li i annan?
4 Letan i ti pe refer avek bann ki ti’n vin son bann disip, Zezi ti priy avek Zeova: “Fer zot vin sen par laverite; ou parol i laverite.” (Zan 17:17) Zot ti pou vin sen, oubyen ganny met apar, pour servi Zeova e fer konnen son non ek son Rwayonm. (Matye 6:9, 10; 24:14) Menm si laverite i pa pour tou dimoun, laverite Zeova i disponib konman en kado pour tou sa ki rod li, nenport ki nasyonalite, ras, oubyen kiltir ki zot sorti ladan. Zapot Pyer ti dir: “Mon vreman konpran ki Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.”—Akt 10:34, 35.
5. Akoz bann Kretyen i souvannfwa ganny persekite?
5 Bann Kretyen i partaz laverite Biblik avek lezot me pa dan tou landrwa ki zot ganny byen akeyir. Zezi ti averti: “Zot pou ganny persekite e met a-mor. Tou dimoun pou ay zot akoz mwan.” (Matye 24:9) An 1817, en pret Irlande, John R. Cotter, ti fer komanter lo sa verse kan i ti ekrir: “Olye apresye zefor ki [bann Kretyen] ti pou fer pour amelyor lavi bann dimoun par zot predikasyon, sa ti pou an realite fer sa bann dimoun ay sa bann disip e persekit zot akoz zot ti pou ekspoz zot bann vis.” Sa bann persekiter i “refize kontan laverite pour ki zot ganny sove.” Pour sa rezon, “Bondye i anvoy lo zot en pisans ki anmenn zot dan lerer e fer zot krwar sa ki fo. Alor tou bann ki pa’n krwar laverite, me ki’n pran plezir avek sa ki mal pou ganny kondannen.”—2 Tesalonisyen 2:10-12.
6. Ki dezir ki en Kretyen pa devret kiltive?
6 Zapot Zan ti ankouraz bann Kretyen ki pe viv dan sa lemonn ostil: “Pa bezwen kontan lemonn ni sa bann keksoz ki dan lemonn. . . . Tou sa ki dan lemonn: dezir natir imen, dezir atraver nou lizye ek lorgey dan lavi toulezour, tousala pa sorti kot nou Papa me i sorti dan lemonn.” (1 Zan 2:15, 16) Par dir “tou,” Zan pe montre klerman ki napa okenn leksepsyon. Pour sa rezon nou pa devret kiltiv en dezir pour okenn keksoz ki sa monn i annan pour ofer ki ti a kapab elwanny nou avek laverite. Si nou ekout konsey Zan, sa pou fer en gran lenfliyans lo nou lavi. Konman?
7. Konman ki en konnesans lo laverite i motiv bann dimoun drwat?
7 Pandan lannen 2001, Temwen Zeova partou dan lemonn ti kondwir plis ki 4.5 milyon letid Labib sak mwan, pour enstri bann endividi ensi ki bann group sa ki Bondye i ekspekte zot fer pour ganny lavi. An rezilta, 263,431 dimoun ti batize. Lalimyer laverite ti vin presye pour sa bann nouvo disip, e zot ti rezet bann move frekantasyon ek bann fason viv sa monn ki imoral e ki dezonnor Bondye. Depi ki zot in batize, zot in kontinyen viv an armoni avek bann standar ki Zeova in etabli pour tou Kretyen. (Efezyen 5:5) Eski laverite i osi presye pour ou?
Zeova i pran swen avek nou
8. Konman ki Zeova i reazir anver nou dedikasyon, e akoz i saz pour “rod plito rwayonm”?
8 Kantmenm nou annan nou bann defo, avek mizerikord Zeova i aksepte nou dedikasyon e dan en sans, i abes li pour atir nou ver li. Dan sa fason, i ansenny nou pour elev nou bann lobzektif ek dezir. (Psonm 113:6-8) Anmenmtan, Zeova i permet nou annan en relasyon personnel avek li, e i promet pour pran swen avek nou si nou kontinyen “rod plito Rwayonm Bondye ek son lazistis.” Si nou fer sa e nou protez nou dan en sans spirityel, i promet: “Limenm i a donn zot anplis tou lezot keksoz osi.”—Matye 6:33.
9. Lekel ‘lesklav fidel e pridan,’ e konman ki an servan sa “lesklav” Zeova i pran swen avek nou?
9 Zezi Kri ti swazir son 12 zapot e i ti poz fondasyon pour kongregasyon bann Kretyen swazir ki ti ganny apele “Izrael Bondye.” (Galat 6:16, NW; Revelasyon 21:9, 14) Plitar i ti ganny dekrir konman ‘kongregasyon Bondye vivan, ki pilye ek sipor laverite.’ (1 Timote 3:15) Zezi ti idantifye bann manm dan sa kongregasyon konman ‘lesklav fidel e pridan’ e konman “serviter fidel e onnet.” Zezi ti dir ki sa serviter fidel ti pou responsab pour donn bann Kretyen “zot rasyon manze kan i ler.” (Matye 24:3, 45-47; Lik 12:42) Si nou napa manze nou pou mor lafen. Pareyman, si nou pa pran nouritir spirityel, nou vin feb e mor spirityelman. Alors, legzistans ‘lesklav fidel e pridan’ i en lot laprev ki Zeova i pran swen avek nou. Fotespere ki nou touzour apresye sa bann provizyon spirityel presye ki Zeova i donn nou atraver ‘lesklav.’—Matye 5:3.
10. Akoz i tre enportan pour nou regilyerman asiste bann renyon?
10 Pran nouritir spirityel i enplik fer letid personnel. I osi enplik asosye avek lezot Kretyen e asiste bann renyon kongregasyon. Eski ou mazinen egzakteman ki ou ti manze sis mwan pase, oubyen menm sis semenn pase? Petet non. Toudmenm, sa ki ou ti manze ti donn ou nouritir ki ou bezwen pour soutenir ou. E petet depi sa ou’n manz preski menm manze. Sa i osi leka pour nouritir spirityel ki ganny fourni dan nou bann renyon Kretyen. Petet, nou pa mazin tou pti detay lo sa ki nou’n tande dan bann renyon. E i kapab ki bann lenformasyon parey in deza ganny prezante plizyer fwa. Kantmenm sa, i apel nouritir spirityel, e i tre esansyel pour nou byennet. Nou bann renyon i touzour fourni bann bon aliman spirityel, ki ganny servi dan en moman apropriye.
11. Ki lobligasyon nou annan kan nou asiste bann renyon Kretyen?
11 Kan nou asiste bann renyon Kretyen, sa i osi met en responsabilite lo nou. Bann Kretyen i ganny konseye pour “ankouraz kanmarad,” e ensit bann manm kongregasyon “pour annan lanmour e fer sa ki byen.” Ler nou prepare, asiste, e partisipe dan tou renyon Kretyen, sa i fortifye nou prop lafwa e i osi ankouraz lezot. (Ebre 10:23-25) Parey bann manrmay ki tant pour swazir sa ki zot oule manze, petet serten i bezwen lankourazman detanzaot pour pran nouritir spirityel. (Efezyen 4:13) I en laprev lanmour lo nou par si nou donn lankourazman kan i neseser afen ki sa bann dimoun i kapab vin bann Kretyen matir, ki zapot Pol ti ekrir sa lo zot: “Nouritir solid i pour bann adilt ki par leksperyans zot konn fer diferans ant sa ki byen ek sa ki mal.”—Ebre 5:14.
Pran Swen avek nou Lekor lo Plan spirityel
12. Lo ki sennla responsabilite pour reste dan laverite i finalman tonbe? Eksplike.
12 Nou konzwen oubyen nou paran i kapab ankouraz nou dan semen laverite. Pareyman, bann ansyen dan kongregasyon i kapab vey lo nou vi ki nou form par troupo ki anba zot responsabilite. (Akt 20:28) Me finalman, lo ki sennla responsabilite i tonbe si nou anvi persevere dan nou fason viv ki baze lo laverite? Fransman, responsabilite i tonm lo sak endividi. Sa i leka dan bann letan normal e i reste parey dan bann moman difisil. Reflesir lo sa lensidan ki swiv.
13, 14. Parey nou’n vwar atraver leksperyans en mouton, konman ki nou kapab ganny led spirityel ki nou bezwen?
13 An Scotland, ti annan ennde pti mouton ki ti pe manze dan lerb kan enn antre zot ti kit group pour al lot kote en pti kolin e la i ti tonm dan en kap ros. I pa ti’n ganny dimal, me i ti per e i pa ti kapab remont anler. Alor, i ti konmans kriye. Son manman ti tann li, e li osi i ti konmans kriye ziska ki zot gardyen ti vini e sov sa pti mouton.
14 Remark lord ki sa levennman ti deroule. Sa mouton ti kriy osekour, son manman ti zwenn ansanm avek li pour kriye, e sa gardyen ki ti ganny sinyale ti imedyatman pran aksyon pour sov li. Si en zannimo, menm ki i ankor zenn, ek son manman i kapab santi danze e rod led deswit, eski pa nou osi nou devret fer parey kan nou tonbe spirityelman oubyen kan nou fer fas avek bann danze dan lemonn Satan ki nou pa ti pe ekspekte? (Zak 5:14, 15; 1 Pyer 5:8) Nou devret fer sa, sirtou si nou mank leksperyans akoz nou ankor zenn oubyen akoz nou ase nouvo dan laverite.
Swiv Lenstriksyon Divin i anmenn Boner
15. Konman ki en madanm ti santi kan i ti konmans asosye avek kongregasyon Kretyen?
15 Reflesir lo valer konprenezon Labib e sa lape lespri ki i anmennen pour bann ki servi Bondye laverite. En madanm 70 an ki ti al Lanmes Anglikan tou son lavi, ti aksepte pour etidye Labib avek en Temwen Zeova. Osito i ti aprann ki non Bondye i Zeova e i ti zwenn ansanm pour dir “Amenn” dan bann lapriyer senser ki ti ganny ofer dan Lasal Rwayonm. Avek gran lemosyon, i ti dir: “Olye portre Bondye konman kelken ki nou bann senp imen nou pa kapab aprose, zot anmenn li la parmi nou parey en bon zanmi. Sa i en keksoz ki mon pa’n zanmen eksperyanse avan.” Aparaman, sa dimoun senserman enterese pa pou zanmen oubliy sa premye lenpresyon ki laverite ti fer lo li. Fotespere ki nou osi nou pa zanmen oubliye konman ki laverite ti presye pour nou kan nou ti aksepte li pour premye fwa.
16. (a) Ki i kapab arive si nou fer larzan vin nou lobzektif prensipal? (b) Konman ki nou kapab trouv vre boner?
16 Bokou dimoun i krwar ki si zot ti annan plis larzan, zot ti pou pli ere. Toudmenm, si nou fer larzan vin nou lobzektif prensipal dan lavi, nou kapab soufer avek “en kantite tourman.” (1 Timote 6:10) Mazinen ki kantite dimoun ki aste tiket lotri, ki depans larzan dan kazino, oubyen ki fer bann spekilasyon dan bann aktivite komersyal, avek lespwar pour ganny en fortin. Me tre pe ki reisi vwar sa fortin ki zot in touzour reve. E souvannfwa menm bann ki reisi vwar li, zot souvan dekouver ki zot larises ki zot in gannyen en sel kou pa fer zot ere. Okontrer, boner eternel i vin atraver fer lavolonte Zeova, travay ansanm avek kongregasyon Kretyen avek gidans lespri sen Zeova ek led bann lanz. (Psonm 1:1-3; 84:4, 5; 89:15) Kan nou fer sa, nou kapab eksperyans bann byenfe ki nou pa ti pe ekspekte. Eski laverite i ase presye pour ou pour anmenn bann tel byenfe dan ou lavi?
17. Lefe ki Pyer ti reste avek Simon, en travayer lapo, ki sa i montre lo latitid sa zapot?
17 Annou vwar en leksperyans ki zapot Pyer ti pas ladan. Dan lannen 36 N.L., i ti fer en vwayaz misyonner pour al Laplenn Saron. I ti aret Lida, kot i ti geri Ene ki ti paralize e apre i ti kontiny son semen pour al lo por Zope. Laba i ti resisit Dorkas. Akt 9:43 i dir nou: “Pyer ti reste lontan Zope kot en zonm ki ti apel Simon, en travayer lapo.” Sa referans bref i montre ki Pyer pa ti fer lapreferans letan i ti servi bann dimoun dan sa lavil. Konman? Spesyalis Labib Frederic W. Farrar i ekrir: “Okenn dimoun ki ti pe strikteman swiv Lalwa Oral [Mozaik] san okenn fleksibilite, pa ti pou reste kot en dimoun ki travay avek lapo zannimo. Kontak ki ou ti bezwen gannyen avek bann lapo ek karkas diferan zannimo dan sa komers, ensi ki bann materyo ki ou ti bezwen servi, ti fer li enpir e degoutan dan lizye bann ki ti swiv lalwa san okenn fleksibilite.” Menm si lakaz Simon ki ti “lo bor lanmer,” pa ti pros avek son landrwa travay, Simon ti angaze dan en ‘komers ki ti ganny konsidere konman degoutan e alor tant pour abes dinite tou bann ki ti antreprann li,’ Farrar i dir.—Akt 10:6.
18, 19. (a) Akoz Pyer ti konfize konsernan en vizyon ki i ti gannyen? (b) Ki benediksyon ki Pyer ti gannyen san ekspekte?
18 Pyer ki pa ti fer lapreferans ti aksepte lospitalite Simon, e se laba ki Pyer ti ganny en lenstriksyon divin ki i pa ti pe ekspekte. I ti vwar en vizyon dan ki i ti ganny demande pour manz bann kreatir ki ti ganny konsidere konman enpir dapre lalwa Zwif. Pyer ti proteste ki i pa ti’n zanmen “manz nanryen ki defann manze, ni sa ki enpir.” Me trwa fwa i ti ganny dir: “Pa bezwen apel enpir, sa ki Bondye in deklare in pirifye.” Nou kapab konpran akoz “Pyer ti demann son lekor, ki sinifikasyon sa vizyon ki i ti’n gannyen.”—Akt 10:5-17; 11:7-10.
19 Pyer pa ti konnen ki son lavey en zonm nonmen Korney, ki ti reste an Sezare 50 kilomet distans, ti ganny en vizyon li osi. Lanz Zeova ti demann Korney pour anvoy bann serviter sers Pyer dan lakaz Simon, sa travayer lapo. Korney ti anvoy son bann serviter kot Simon, e Pyer ti retourn avek zot an Sezare. Laba i ti pres avek Korney ek son bann fanmiy ek zanmi. An rezilta, zot ti vin bann premye krwayan non Zwif ki ti resevwar lespri sen konman bann eritye Rwayonm. Menm si bann zonm pa ti sirkonsi, tou bann ki ti ekout parol Pyer ti batize. Sa ti ouver semen pour bann dimoun diferan nasyon, ki ti ganny konsidere enpir par bann Zwif, pour vin manm dan kongregasyon Kretyen. (Akt 10:1-48; 11:18) Pa sa ti en privilez ekstraordiner pour Pyer—tou sa akoz laverite ti presye pour li e ti fer li ekout lenstriksyon sorti kot Zeova e azir avek lafwa!
20. Ki lasistans divin ki nou gannyen kan nou met laverite premye dan nou lavi?
20 Pol i ankouraz nou: “An proklaman laverite avek lanmour, nou devre grandi dan tou fason an Kris, nou sef.” (Efezyen 4:15) Wi, laverite pou anmenn nou en boner la konmela ki pa kapab ganny konpare si nou met li premye dan nou lavi e les Zeova diriz nou lepa atraver son lespri sen. Deplis gard antet soutyen ki bann lanz sen i donn nou dan nou aktivite evanzelizasyon. (Revelasyon 14:6, 7; 22:6) Konman nou privilezye pour annan en tel soutyen dan sa travay ki Zeova in donn nou! Mentenir nou lentegrite pou fer nou loue Zeova, Bondye laverite, pour tou leternite. Eski i annan okenn keksoz ki pli presye ki sa?—Zan 17:3.
Ki nou’n aprann?
• Akoz bokou dimoun pa aksepte laverite?
• Konman ki bann Kretyen i devret vwar bann keksoz ki dan lemonn Satan?
• Ki latitid nou devret annan vizavi bann renyon e akoz?
• Ki responsabilite nou annan pour pran swen avek nou lekor lo plan spirityel?
[Caption on page 28]
Zezi ti servi konman temwen pour laverite
[Caption on page 31]
Parey nouritir fizik, nouritir spirityel i tre esansyel pour nou byennet