Met ou konfyans dan Zeova, sa “Bondye ki touzour donn konsolasyon”
“Nou rann glwar Bondye, Papa, nou Senyer Zezi-Kri, Papa ki ranpli avek labonte, Bondye ki touzour donn konsolasyon.”—2 KOR. 1:3.
1. Nenport ki laz nou annan, ki bann imen i bezwen?
DEPI nou nesans, nou santi sa lanvi pour ganny rekonforte. En pti baba i plere pour fer konnen ki i bezwen ganny konsole. Petet i lafen oubyen i anvi ki en dimoun i pran li. Menm ler nou vin adilt, nou souvan santi sa bezwen pour ganny rekonforte sirtou la ki nou pe viv dan bann sityasyon difisil.
2. Ki lasirans Zeova i donnen konmkwa i pou rekonfort bann ki met zot konfyans dan li?
2 Lo en serten degre, nou fanmir ek zanmi i souvan kapab rekonfort nou. Me par ler, bann keksoz ki fer nou soufer i an deor kontrol bann imen. Zis Bondye ki kapab rekonfort nou dan nenport ki sityasyon difisil ki nou pe pas ladan. Son Parol i asir nou: “Zeova i pros avek tou bann ki kriy li, . . . e kan zot kriy o sekour i pou tande.” (Ps. 145:18, 19) Wi, “lizye Zeova i lo bann ki drwat e son zorey i tann zot lapel o sekour.” (Ps. 34:15) Me si nou anvi Bondye i siport e rekonfort nou, nou bezwen met nou konfyans dan li. Psalmis David ti montre sa klerman ler i ti sante: “Zeova pou vin en landrwa o ki an sekirite pour nenport ki ki’n ganny oprimen, en landrwa o ki an sekirite pour letan ladetres. Sa bann ki konn ou non pou met konfyans dan ou, akoz bann ki rod ou O Zeova, sirman ou pa pou kit zot.”—Ps. 9:9, 10.
3. Ki legzanp Zezi ti donnen pour montre ki Zeova i kontan Son pep?
3 Bann adorater Zeova i presye pour li. Zezi ti fer sa kler ler i ti dir: “Eski senk sren pa i vann pour de sou? Me napa enn ki Bondye i oubliye. Wi, menm bren seve lo ou latet in konte. Pa bezwen per; zot vo plis ki en kantite sren.” (Lik 12:6, 7) Atraver profet Zeremi, Zeova ti dir Son pep: “Avek en lanmour pour en letan endefini mon’n kontan ou. Se pour sa rezon ki avek labonte leker mon’n atir ou.”—Zer. 31:3.
4. Akoz nou kapab met nou konfyans dan bann promes Zeova?
4 Met nou konfyans dan Zeova e dan lakonplisman son bann promes i kapab rekonfort nou dan letan ladetres. Alor, nou devret annan sa menm konfyans dan Zeova parey Zozye ki ti dir: “Napa okenn parol parmi tou bann bon parol ki Zeova zot Bondye in dir zot ki pa’n reisi. Tousala in vin vre pour zot. Napa en parol ki pa’n reisi.” (Zoz. 23:14) Deplis, nou kapab annan sa lasirans ki menm si nou dekouraze akoz bann sityasyon difisil, “Bondye i fidel” e i pa pou zanmen abandonn son bann serviter fidel.—Lir 1 Korentyen 10:13.
5. Akoz i posib pour nou rekonfort lezot?
5 Zapot Pol i apel Zeova “Bondye ki touzour donn konsolasyon.” Pour “konsol” oubyen rekonfort i vedir soulaz en dimoun ki dan soufrans oubyen sagrinasyon. Sa i ganny fer kan nou soulaz en dimoun ki dan lapenn e osi kan nou ankouraz e konsol enn ki dekouraze. Sanmenm ki Zeova i fer. (Lir 2 Korentyen 1:3, 4.) Napa nanryen oubyen personn ki kapab anpes nou Papa ki dan lesyel rekonfort nou. Zeova i kapab fer nenport kwa pour rekonfort bann ki kontan li. Pareyman, nou kapab rekonfort nou bann frer ek ser Kretyen ki dan tou sort kalite soufrans. Nou kapab fer sa ‘par sa konsolasyon ki nou menm nou’n gannyen avek Bondye.’ Pa sa i en zoli fason pour montre ki zis Zeova ki kapab rekonfort bann ki dan dezespwar!
Fer fas avek lakoz soufrans
6. Donn legzanp serten keksoz ki kapab fer nou soufer.
6 Nou bezwen rekonfor dan diferan laspe lavi. Enn bann pli gran lakoz sagrinasyon i kan nou perdi en dimoun ki nou kontan dan lanmor, sirtou si i nou konzwen oubyen nou zanfan. En dimoun ki viktim diskriminasyon oubyen prezidis i osi bezwen ganny rekonforte. En move lasante, lavyeyes, lapovrete, problenm dan maryaz oubyen serten sityasyon penib dan lemonn i kapab fer ki dimoun i bezwen ganny rekonforte.
7. (a) Ki kalite rekonfor nou bezwen kan nou fer fas avek sagrinasyon? (b) Ki Zeova i kapab fer pour geri en leker “kase e brize”?
7 Nou bezwen rekonfor oubyen konsolasyon akoz nou leker, nou lespri, nou santiman, nou lasante fizik, osi byen ki nou lasante spirityel i kapab ganny afekte par bann sityasyon difisil ki nou kapab rankontre. Annou pran legzanp leker. Parol Bondye i montre ki nou leker i kapab ganny “kase e brize.” (Ps. 51:17) Sirman Zeova i kapab ede dan bann sityasyon koumsa, parski “i pe geri sa bann ki zot leker in brize, e i pe pans zot blesir fermal.” (Ps. 147:3) Menm dan bann sityasyon vreman difisil, si nou priye avek lafwa e obeir son bann komannman, Bondye i kapab soulaz sa enn ki son leker i brize.—Lir 1 Zan 3:19-22; 5:14, 15.
8. Ki mannyer Zeova i kapab ed nou ler nou lespri i fatige?
8 Souvan nou lespri i bezwen rekonfor akoz diferan problenm i kapab fatig nou en kantite. Lo nou menm, petet nou pa pou kapab fer fas avek sa bann leprev ki teste nou lafwa. Par kont, en psalmis ti sante: “Ler i ti annan bokou keksoz ki ti pe fatig mwan, ou konsolasyon ti konmans kares mwan.” (Ps. 94:19) Pol ti osi ekrir: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan. Ki lape Bondye ki depas tou konpreansyon imen i ava gard zot leker ek zot lespri dan Kris-Zezi.” (Fili. 4:6, 7) Lir e medit lo bann verse Labib i kapab ed nou fer fas avek bann problenm ki fatig nou lespri.—2 Tim. 3:15-17.
9. Ki mannyer nou kapab fer fas avek bann santiman negatif?
9 Par ler, nou kapab telman dekouraze ki finalman zis bann santiman negatif ki vin dan nou lespri. Petet nou krwar ki nou pa pou kapab fer en keksoz ki Zeova i ekspekte nou fer oubyen desarz kek responsabilite dan kongregasyon. Dan sa ka osi, Zeova i kapab rekonfort nou e ed nou. Pour donn en legzanp: Ler Zozye ti ganny demande pour diriz pep Izrael pour al lager avek bann nasyon pwisan ki ti zot lennmi, Moiz ti dir li: “Pran kouraz e vin for. Pa bezwen per e pa tranble devan zot, akoz Zeova ou Bondye i sa enn ki pe mars avek ou. I pa pou abandonn ou oubyen kit ou konpletman.” (Det. 31:6) Avek led Zeova, Zozye ti reisi anmenn pep Bondye dan Later Promiz e ganny laviktwar lo tou zot bann lennmi. Pli boner, Moiz ti osi ganny sipor Bondye ler zot ti kot Lanmer Rouz.—Egz. 14:13, 14, 29-31.
10. Si nou lasante fizik i ganny afekte akoz bann sityasyon difisil, ki kalite led nou kapab resevwar?
10 Bann sityasyon difisil i kapab annan en move lefe lo nou lasante fizik. Byensir, si nou manz byen, repoz byen, fer legzersis e annan en bon lizyenn, sa i kapab annan en bon lefe lo nou. En lespwar baze lo sa ki Labib i dir lo lavenir i osi kapab annan en bon lefe lo nou lekor. Alor, kan nou angwase, i byen pour nou gard antet leksperyans Pol ek son parol ankourazan: “Nou ganny pouse dan tou kote me san ganny kraze; nou enkyet me nou pa perdi lespwar; nou ganny persekite, me nou pa ganny abandonnen; nou ganny rabat, me nou pa ganny detri.”—2 Kor. 4:8, 9.
11. Si nou malad spirityelman, ki nou bezwen fer?
11 Serten leprev i kapab annan en move lefe lo nou lasante spirityel. Dan en tel sityasyon osi Zeova i kapab delivre nou. Son Parol i asir nou: “Zeova pe donn sipor tou sa bann ki pe tonbe e i pe redres tou sa bann ki’n kourbe.“ (Ps. 145:14) Pour nou ganny sa led neseser spirityelman, nou bezwen rod lasistans avek bann ansyen dan kongregasyon. (Zak 5:14, 15) Si nou gard antet sa lespwar pour ganny lavi eternel ki baze lo Labib, sa pou osi ed nou persevere dan bann leprev ki teste nou lafwa.—Zan 17:3.
Legzanp bann ki Bondye ti rekonforte
12. Dekrir lafason ki Zeova ti rekonfort Abraam.
12 Anba lenspirasyon, en psalmis ti dir: “Rapel sa parol ki ou ti dir ou serviter, sa parol ki [ou Zeova] ou’n fer mwan espere. Sa i mon konsolasyon dan mon soufrans, parski ou parol ki fer mwan kontinyen viv.” (Ps. 119:49, 50) Ozordi, nou annan Parol Bondye dan Labib, kot nou kapab lir bokou legzanp kot Zeova in rekonfort son bann serviter. Par egzanp, dwatet Abraam ti byen enkyet ler i ti konnen ki Zeova ti pe al detrir Sodonm ek Gomor. Sa zonm fidel ti demann Zeova: “Eski ou pou vreman detrir sa ki drwat avek sa ki move?” Pour rekonfort Abraam, Zeova ti asir li ki si i ti trouv zis 50 dimoun drwat, I pa ti pou detrir sa bann lavil. Me Abraam ti demann Zeova ankor senk fwa: Me si i annan 45 dimoun drwat? 40? 30? 20? 10? Avek bokou pasyans ek labonte, sak fwa Zeova ti asir Abraam ki i pa ti pou detrir sa bann lavil. Menm si i ti napa ni menm dis dimoun drwat dan sa landrwa, Zeova ti sov Lot ek son de fiy.—Zen. 18:22-32; 19:15, 16, 26.
13. Ki mannyer Ana ti demontre ki i ti annan konfyans dan Zeova?
13 Ana, madanm Elkana ti byen anvi en zanfan, me i pa ti kapab fer zanfan, alor sa ti fatig li. I ti priy Zeova konsernan sa sityasyon, e Gran Pret Eli ti dir li: “Ki Bondye Izrael i fer sa ki ou’n demann li.” Sa ti rekonfort Ana e “i ti nepli enkyet.” (1 Sam. 1:8, 17, 18) Ana ti met son konfyans dan Zeova e i ti kit tou keksoz dan son lanmen. Menm si i pa ti konnen ki ti pou arive apre, Ana ti santi lape lespri. Avek letan, Zeova ti reponn son lapriyer. I ti tonm ansent e donn nesans en pti garson ki i ti apel Samyel.—1 Sam. 1:20.
14. Akoz David ti bezwen ganny rekonforte e avek lekel i ti rod led?
14 En lot dimoun ki ti ganny rekonforte par Bondye i lerwa David. Vi ki Zeova i “vwar sa ki dan leker,” ler i ti swazir David konman fitir lerwa Izrael, i ti konnen ki David ti senser e devoue pour vre ladorasyon. (1 Sam. 16:7; 2 Sam. 5:10) Par kont, pli tar David ti komet adilter avek Bat-seba e i ti esey kasyet son fot par touy msye sa madanm. Ler David ti realize ki kantite grav son pese ti ete, i ti priy Zeova: “Selon labondans ou mizerikord, efas mon bann lofans. Lav mwan konpletman pour tir mon bann fot, e pirifye mwan avek mon pese. Parski mon konn mon bann fot, e mon pese i toultan la devan mwan.” (Ps. 51:1-3) David ti vreman repantir e Zeova ti pardonn li. Kantmenm sa, David ti bezwen fer fas avek konsekans son pese. (2 Sam. 12:9-12) Malgre sa, mizerikord Zeova ti en sours rekonfor pour sa serviter ki ti annan limilite.
15. Ki kalite led Zeova ti donn Zezi zis avan son lanmor?
15 Ler i ti lo later, Zezi ti fer fas avek en kantite leprev. Bondye ti les li pas atraver bann leprev ki ti teste son lafwa. Zezi ti gard son lentegrite konman en zonm parfe e i ti toultan met son konfyans dan Zeova e siport Son souvrennte. Ler i ti pros pour ganny trai e egzekite, Zezi ti priy Zeova: “Non pa dapre mon lavolonte, me ou lavolonte.” Apre sa, en lanz ti aparet avek Zezi e ankouraz li. (Lik 22:42, 43) Bondye ti donn Zezi sa rekonfor, lafors ek sipor ki i ti bezwen sa letan.
16. Ki Bondye i kapab fer si nou dan en sityasyon kot nou ant lavi ek lanmor akoz nou lafwa?
16 Menm si i kapab ki nou dan en sityasyon kot nou ant lavi ek lanmor akoz nou pozisyon ferm ki nou pran konman Kretyen, Zeova i kapab e i pou ed nou pour gard nou lentegrite. Deplis, nou ganny rekonforte par sa lespwar pour ganny resisite. Pa i pou vreman gou ler ‘dernyen lennmi [setadir lanmor] pou ganny detri’! (1 Kor. 15:26) Bann serviter fidel Bondye ki’n mor ek lezot ankor i dan memwar Bondye e i pa pou oubliy zot. Zot pou ganny resisite. (Zan 5:28, 29; Akt 24:15) Konfyans dan promes Zeova konsernan rezireksyon i rekonfort nou e i donn nou en lespwar kan nou ganny persekite.
17. Ki mannyer Zeova i kapab rekonfort nou kan en dimoun ki nou kontan i mor?
17 Pa i rekonfortan pour konnen ki nou bann byenneme ki pe dormi dan lanmor i annan sa lespwar pour rekonmans viv dan en nouvo lemonn kot pou napa okenn problenm! Pa i pou en gran privilez pour sa “gran lafoul” serviter Zeova ki pou sirviv lafen sa move lemonn pour akey e ansenny bann ki pou resisite pour viv lo later!—Rev. 7:9, 10.
Proteksyon anba lebra eternel Bondye
18, 19. Ki mannyer bann serviter Zeova in ganny rekonforte ler zot in ganny persekite?
18 Dan en zoli kantik ki pwisan e tousan, Moiz ti reasir pep Izrael: “Bondye bann letan lontan i en landrwa kasyet e nou ganny proteze anba son lebra eternel.” (Det. 33:27) Pli tar, profet Samyel ti dir bann Izraelit: “Pa bezwen aret swiv Zeova e ou devret servi Zeova avek tou ou leker. . . . Zeova pa pou kit son pep akoz son gran non.” (1 Sam. 12:20-22) Tan ki nou reste atase avek Zeova e servi li fidelman, i pa pou zanmen abandonn nou. I pou toultan donn nou sa sipor ki nou bezwen.
19 Bondye pe kontinyelman donn son pep sa led ek rekonfor ki zot bezwen dan sa bann dernyen zour difisil. Pour plis ki en syek, plizyer milye frer ek ser partou dan lemonn in ganny persekite e anprizonnen zis akoz zot servi Zeova. Zot leksperyans i prouve ki Zeova i vreman rekonfort son bann serviter dan letan ladetres. Par egzanp, enn nou frer dan ansyen Linyon Sovyetik ti ganny met dan prizon pour 28 an akoz son lafwa. Kantmenm sa, zot ti trouv en mwayen pour li ganny son manze spirityel pour donn li lafors ek rekonfor. I ti dir: “Pandan tou sa letan, mon ti aprann met mon konfyans dan Zeova e mon ti ganny lafors avek li.”—Lir 1 Pyer 5:6, 7.
20. Akoz nou kapab asire ki Zeova pa pou abandonn nou?
20 Malgre nenport kwa ki nou kapab fer fas avek, i pou byen pour nou gard antet sa parol rekonfortan: “Zeova pa pou abandonn son pep.” (Ps. 94:14) Menm si nou bezwen ganny rekonforte, nou osi annan sa gran privilez pour rekonfort lezot. Parey nou pou vwar dan prosen lartik, nou kapab rekonfort bann ki dan lapenn dan sa lemonn trouble.
Ki ou pou reponn?
• Ki serten keksoz ki kapab fer nou soufer ozordi?
• Ki mannyer Zeova i rekonfort son bann serviter?
• Si nou dan en sityasyon kot nou ant lavi ek lanmor, kwa ki kapab rekonfort nou?
[Bwat/Portre lo paz 23]
KONMAN POUR FER FAS AVEK BANN KEKSOZ KI AFEKTE NOU . . .
▪ leker Ps. 147:3; 1 Zan 3:19-22; 5:14, 15
▪ lespri Ps. 94:19; Fili. 4:6, 7
▪ santiman Egz. 14:13, 14; Det. 31:6
▪ lasante fizik 2 Kor. 4:8, 9
▪ lasante spirityel Ps. 145:14; Zak 5:14, 15