Parol Zeova i vivan
Bann pwen enteresan dan let pour bann Galat, Efezyen, Filipyen ek Kolosyen
KAN i ti tande ki serten Kretyen ti pe rezet vre ladorasyon akoz lenfliyans bann Zwif ek bann ki pa ti Zwif, zapot Pol ti ekrir en let vreman pwisan pour “bann kongregasyon Galasi.” (Gal. 1:2, NW) Sa let ti ganny ekrir apepre lannen 50-52 N.L. e i kontyen bann konsey byen direk ek bann parol vreman ankourazan.
Apepre di-z-an pli tar, kan i ti Ronm konman en “prizonnyen Zezi-Kri,” Pol ti ekrir bann kongregasyon dan Efez, Filip ek Kolos. I ti donn zot bann konsey pratik ek bann lankourazman ranpli avek lanmour. (Efe. 3:1) Denozour, nou osi nou kapab benefisye si nou port latansyon lo mesaz ki annan dan Labib dan liv Galat, Efezyen, Filipyen ek Kolosyen.—Ebr. 4:12.
DEKLARE DRWAT—KI MANNYER?
Vi ki bann Zwif ek bann ki pa ti Zwif ti pe fer trik pour esey rod fason pour sali repitasyon Pol, i ti defann son lekor konman en zapot par donn zot serten detay lo son lavi. (Gal. 1:11–2:14) Pour prouve ki zot lansennyman ti fo, Pol ti fer resorti sa pwen: “En dimoun i pa ganny zistifye [oubyen “deklare drwat,” NW] devan Bondye an pratikan sa ki Lalwa i ordonnen, me par lafwa dan Kris Zezi.”—Gal. 2:16.
Pol ti dir ki Kris in ‘delivre tou bann ki ti anba Lalwa par aste zot’ e liber zot pour ki zot ava kapab rezwir laliberte. I ti seryezman konsey bann Kretyen Galat: “Reste dan sa laliberte e pa retourn dan lesklavaz.”—Gal. 4:4, 5; 5:1.
Larepons pour bann kestyon lo Labib:
3:16-18, 28, 29—Eski sa lalyans ki ti ganny fer avek Abraam i ankor valid? Wi. Sa lalyans Lalwa ti pe konplemant sa enn ki ti deza la e non pa ranplas sa lalyans ki ti ganny fer avek Abraam. Alors, sa lalyans ki ti ganny fer avek Abraam ti ankor annan valer apre ki Lalwa ti ganny “aboli.” (Efe. 2:15, NW) Sa promes ti pas avek sa vre “desandans” Abraam ki premyerman ti Kris Zezi e apre tou bann ki ti “pour Kris.”
6:2—Kwa sa “lalwa Kris”? Sa lalwa i enplik tou sa ki Zezi ti ansennyen e demann nou pour fer. I enplik sirtou sa komannman pour “kontan kanmarad.”—Zan 13:34.
6:8—Ki mannyer nou “senm sa ki fer plezir Lespri”? Nou fer sa kan nou viv dan en fason ki nou permet lespri Bondye travay volonterman lo nou. Senm sa ki fer plezir lespri i enplik partisip avek tou nou leker dan bann aktivite ki permet lespri sen travay dan nou.
Leson pour nou:
1:6-9. Bann ansyen pa devret tarde pour reazir kan en problenm i leve dan kongregasyon. Par servi bann bon rezonnman ek verse Labib, zot kapab rezet bann fo rezonnman.
2:20. Sa ranson i en kado ki Bondye in personnelman donn nou. Nou devret aprann pour vwar li dan sa fason.—Zan 3:16.
5:7-9. Move frekantasyon i kapab ‘anpes nou obeir laverite.’ I saz pour nou evit zot.
6:1, 2, 5. Bann ki “posed lespri Bondye” oubyen bann ki annan kalifikasyon spirityel i kapab ed nou pour anmenn en fardo, petet en sitiasyon difisil akoz nou’n al dan en move semen san ki nou realize. Parkont, nou menm ki devret anmenn nou fardo an rapor avek nou bann responsabilite spirityel.
‘REINI TOU KEKSOZ DAN KRIS’
Pour met lanfaz lo tenm linite Kretyen kan i ti pe ekrir bann Efezyen, Pol ti dir ki “en ladministrasyon alafen letan fikse . . . pour reini ankor tou keksoz dan Kris, keksoz dan lesyel ek keksoz lo later.” Kris ti ed tou dimoun pour ‘ini ansanm dan lafwa’ par ofer son “kado” setadir serten zonm.—Efe. 1:10; 4:8, 13.
Pour onor Bondye e promot linite, bann Kretyen i devret “vin en dimoun konpletman nouvo” e “aksepte volonterman pour obei kanmarad akoz sa respe ki zot annan pour Kris.” Zot devret osi “reziste kont tou bann riz Dyab” par met tou zot lekipman batay spirityel.—Efe. 4:24; 5:21; 6:11.
Larepons pour bann kestyon lo Labib:
1:4-7—Ki mannyer bann Kretyen ki pou viv dan lesyel i ganny swazir menm avan ki zot ne? Zot ti ganny swazir davans konman en group e non pa endividyelman. Sa ti arive avan ki premye zanfan enparfe ti ne. Sa profesi ki ganny rikorde dan Zenez 3:15, ki ti ganny anonse avan ki okenn imen enparfe ti ganny konsevwar ti enplik plan Zeova pour ki serten bann disip Kris i dirize avek li dan lesyel.—Gal. 3:16, 29.
2:2—Ki mannyer lespri sa lemonn i parey lespas oubyen ler e ki mannyer i egzers lotorite lo lemonn? “Lespri dapre lemonn,” setadir lespri lendepandans ek dezobeisans i partou zis parey sa ler ki nou respire. (1 Kor. 2:12) I egzers son lotorite ouswa pouvwar lo lemonn par son gran lenfliyans ki i annan e ki i kontinyen annan.
2:6—Ki mannyer bann Kretyen swazir i kapab “dan lesyel” pandan ki zot ankor lo later? Sa lekspresyon “lesyel” ki la pa pe refer avek leritaz ki’n ganny promet pour al dan lesyel. O kontrer, i endik sa pozisyon spirityel vreman enportan ki zot gannyen kan zot “ganny sele avek Lespri Sen.”—Efe. 1:13, 14.
Leson pour nou:
4:8, 11-15. Zezi Kri ti anmenn “bann lo ki i ti’n ganny laviktwar,” setadir, pran bann zonm ki ti anba kontrol Satan e servi zot konman bann kado pour batir kongregasyon Kretyen. Kan nou obeir e soumet avek bann ki donn gidans e korpere avek bann laranzman dan kongregasyon, nou kapab “avek lanmour, . . . grandi dan tou fason an Kris.”—Ebr. 13:7, 17.
5:22-24, 33. Apard soumet avek son mari, en madanm i bezwen annan respe pour li. I fer sa kan i annan “en lespri bon e trankil” e travay dir pour rann loner son mari pandan ki i koz an byen lo li e travay pour fer son bann desizyon marse.—1 Pyer 3:3, 4; Tit 2:3-5.
5:25, 28, 29. Zis parey i “nouri” son lekor, en mari i devret pran swen avek son madanm dan domenn fizik, emosyonnel e spirityel. I devret osi pas letan avek son madanm pour montre ki i apresye li e tret li avek tandres par parol ek aksyon.
6:10-13. Avek tou nou leker, nou bezwen met nou lekipman batay spirityel ki Bondye in donn nou pour nou kapab reziste kont pouvwar bann move lespri.
“TENIR FERM LA KOT NOU’N ARIVE”
Lanmour i sa keksoz ki Pol ti met bokou lanfaz lo la dan son let pour bann Filipyen. I ti dir: “Mon demande dan mon lapriyer ki zot lanmour i ogmante e vin plis ankor, avek en vre konnesans ek en zizman parfe.” Pour ed zot pa tonm dan sa latrap pour zot annan tro bokou konfyans dan zot lekor, Pol ti ankouraz zot pour kontinyen “travay pour zot delivrans avek lafreyer ek reverans.”—Fili. 1:9; 2:12.
Pol ti ankouraz bann ki matir pour tay for pour “ariv lo bit, pour ganny sa pri, ki Bondye . . . in apel [zot] pour resevwar lao.” I ti dir: “Nenport konman, annou tenir ferm la kot nou’n arive.”—Fili. 3:14-16.
Larepons pour bann kestyon lo Labib:
1:23—Ki sa “de kote” ki ti met Pol anba presyon e ki i ti anvi? Akoz sirkonstans ki i ti ladan, Pol ti anba presyon an rapor avek de posibilite ki ti devan li, swa lavi ouswa lanmor. (Fili. 1:21) Menm si i pa ti endike ki i ti pou swazir, i ti fer konnen ki i ti pou kontan ganny libere pour “al avek Kris.” (Fili. 3:20, 21; 1 Tesa. 4:16) Pandan prezans Kris, Pol ti pou ganny libere pour “al avek Kris,” setadir i ti pou ganny sa rekonpans ki Zeova ti’n anmase pour li.—Mat. 24:3.
2:12, 13—Dan ki fason Bondye i donn nou lavolonte e rann nou kapab pour akonplir tou? Lespri sen Zeova i kapab travay dan nou leker ek lespri e ogmant nou dezir pour fer tou nou mye dan servis ki nou ofer li. Alors, nou pa tousel pandan ki nou ‘travay pour nou delivrans.’
Leson pour nou:
1:3-5 (NW). Menm si zot pa ti ris, bann Kretyen Filip in kit en bon legzanp pour nou konsernan demontre zenerozite.—2 Kor. 8:1-6.
2:5-11. Parey legzanp Zezi i montre, limilite pa en siny febles, o kontrer i en lafors. Deplis, Zeova i glorifye bann ki annan limilite.—Prov. 22:4.
3:13. “Tou sa ki deryer” i kapab en travay kot ou ganny byen peye, sekirite ki en dimoun i annan kan i sorti dan en fanmir ris ouswa menm bann pese grav ki nou’n fer dan lepase e ki nou’n repantir e “ganny lave.” (1 Kor. 6:11) Nou devret oubliy sa bann keksoz, setadir oubliy zot e al ‘an avan pour ganny sa ki par devan.’
“RESTE TOUZOUR PLI FERM DAN LAFWA”
Dan son let pour bann Kolosyen, Pol ti fer resorti move pwennvi bann fo ansennyan. I ti dir ki delivrans pa depan lo respekte sa ki Lalwa i demande, me plito lo ‘reste dan lafwa.’ Pol ti ankouraz bann Kolosyen pour “kontinyen reste atase avek [Kris]. Viv anrasinen dan li; bati zot lavi lo li; reste touzour pli ferm dan lafwa.” Ki mannyer sa kalite stabilite ti devret annan lefe lo zot?—Kol. 1:23; 2:6, 7.
Pol ti ekrir: “E par lao tousala, annan lanmour ki soud tou keksoz parfetman ansanm dan larmoni. Ki lape Kris i diriz zot leker.” Sa zapot ti dir zot: ‘Dan tou sa ki zot fer, fer li avek tou zot leker, konmsi zot pe travay pour Zeova e non pa pour en zonm.’ Konsernan bann ki an deor kongregasyon, i ti dir: “Fer tou keksoz avek sazes” anver zot.—Kol. 3:14, 15, 23; 4:5.
Larepons pour bann kestyon lo Labib:
2:8—Kwa sa “lasazes imen” ki Pol ti pe averti bann Kolosyen? Sa i bann keksoz oubyen prensip dan lemonn Satan ki gid, diriz ouswa enfliyans sa lemonn. (1 Zan 2:16) Filozofi, materyalizm ek fo larelizyon sa lemonn i osi enkli parmi sa bann keksoz.
4:16—Akoz let pour bann Kretyen Laodise pa form parti Labib? Sa i kapab akoz sa let pa ti annan bann lenformasyon ki itil pour nou ozordi. Ouswa i kapab i ti pe repet bann pwen ki annan dan lezot let ki dan Labib.
Leson pour nou:
1:2, 20. Sa ranson ti en dispozisyon ki Bondye ti donnen atraver son lagras oubyen labonte ekstraordiner. I kapab donn nou en konsyans kler pour ki nou pa santi nou koupab e i donn nou lape enteryer.
2:18, 23. “Fo limilite” ouswa demontre limilite dan en zar pour enpresyonn lezot kan nou pa aksepte bann keksoz materyel oubyen tret nou lekor dir, i endik ‘lorgey san okenn rezon’ dan bann mazinasyon imen.